ମନ୍ତ୍ରୀଙ୍କ ନିର୍ଦେଶକୁ ମାନୁ ନାହିଁ ବିଭାଗ, ବିଦ୍ୟୁତ କାଟରେ ଡ଼ହଳ ବିକଳ ଛାତ୍ରଛାତ୍ରୀ

ଓଡ଼ିଶା ଲିଡ୍ସ(ଯାଜପୁର): ନିକଟରେ ଖରା ଓ ଅସହ୍ୟ ଗରମକୁ ଦୃଷ୍ଟିରେ ରଖି ରାଜସ୍ୱ ଓ ବିପର୍ଯ୍ୟୟ ପ୍ରଶମନ ମନ୍ତ୍ରୀ ବିଦ୍ୟୁତ ବିଲ ପୈଠ ନ କଲେ ବି କାହାର ବିଦ୍ୟୁତ ସଂଯୋଗ ବିଚ୍ଛିନ୍ନ ନ କରିବାକୁ ନିର୍ଦେଶ ଦେଇଥିଲେ । ହେଲେ ବିଦ୍ୟୁତ ବିଲ ପୈଠ କରି ମଧ୍ୟ ଆଜକୁ ୧୫ ଦିନ ହେଲା ଏକ ସରକାରୀ ବିଦ୍ୟାଳୟର ବିଦ୍ୟୁତ ସଂଯୋଗକୁ କାଟି ଦେଇଛି ବିଦ୍ୟୁତ ବିଭାଗ । ଫଳରେ ଗରମରେ ଡ଼ହଳ ବିକଳ ହେଉଛନ୍ତି ୭୦ ଜଣ ଛାତ୍ରଛାତ୍ରୀ । ଯାଜପୁର ଟାଉନ ଉଆସାହି ସ୍ଥିତ ମହେସପୁର ୟୁଜି.ଏମ.ଇ ସ୍କୁଲ କର୍ତ୍ତୃପକ୍ଷ ବିଲ ପୈଠ କରିଥିବା ବେଳେ ବିଭାଗ ସ୍କୁଲର ବିଦ୍ୟୁତ ସଂଯୋଗ କାଟି ଦେଇଛନ୍ତି । ସୂଚନା ଅନୁଯାୟୀ ଗତ ଫେବୃୟାରୀ ମାସ କର୍ତ୍ତୃପକ୍ଷ ୩୧୯୬ ଟଙ୍କା ଦାଖଲ କରିଥିଲା ବେଳେ ମାର୍ଚ୍ଚ ମାସ ୨୦ ତାରିଖ ଦିନ ପୁନର୍ବାର ୨୯୧ ଟଙ୍କା ବିଲ ପ୍ରଦାନ କରିଛନ୍ତି । ହେଲେ ବିଦ୍ୟାଳୟର ବିଦ୍ୟୁତ ସଂଯୋଗ କଟାଯାଇଛି । ଏ ନେଇ ହେଲ୍ପ ଲାଇନରେ ଯୋଗାଯୋଗ କରାଯାଇଥିଲେ ମଧ୍ୟ ବିଦ୍ୟୁତ ସଂଯୋଗ କରାଯାଉନାହିଁ ବୋଲି ଅଭିଯୋଗ ହୋଇଛି । ଆଜି ଏ ନେଇ ବିଦ୍ୟାଳୟ ପ୍ରଧାନ ଶିକ୍ଷକ ପରେଶ କୁମାର ଉପାଧ୍ୟାୟ ଉଚ୍ଚ କର୍ତ୍ତୃପକ୍ଷଙ୍କୁ ଲିଖିତ ଅଭିଯୋଗ କରିଥିବା ଜଣାଯାଇଛି । ମନ୍ତ୍ରୀଙ୍କ ନିର୍ଦ୍ଦେଶ ପରେ ବିଭାଗ ପକ୍ଷରୁ କିଭଳି ଏକ ସରକାରୀ ବିଦ୍ୟାଳୟର ବିଦ୍ୟୁତ ସଂଯୋଗକୁ ବିଚ୍ଛିନ୍ନ କରାଗଲା ସେ ନେଇ ଅବିଭାବକ ମାନେ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି । ବିଭାଗୀୟ ଅଧିକାରୀ ଏ ନେଇ ତୁରନ୍ତ ପଦକ୍ଷେପ ଗ୍ରହଣ କରିବାକୁ ଦାବି ହୋଇଛି ।