ମୁଖ୍ୟମନ୍ତ୍ରୀଙ୍କ କଳିଙ୍ଗନଗର ଗସ୍ତ ସମୟରେ ଚାକିରୀ ପାଇଁ ବେକାରୀ ଯୁବକ ସଂଘର ଦାବି, ୪୮ଜଣକୁ ଅଟକ ରଖିଲା ପୋଲିସ

ଓଡ଼ିଶା ଲିଡ୍ସ(ଯାଜପୁର): କଳିଙ୍ଗନଗର ଶିଳ୍ପାଞ୍ଚଳରେ ଥିବା ବିଭିନ୍ନ ଘରୋଇ କାରଖାନାର ବିଭିନ୍ନ ପ୍ରକଳ୍ପ ଉଦଘାଟନ ଓ ଭୂମି ପୂଜନ କାର୍ଯ୍ୟକ୍ରମ ଆଜି ଆୟୋଜିତ ହୋଇ ଯାଇଛି । ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଜି କଳିଙ୍ଗ ନଗର ଗସ୍ତରେ ଆସି ଉଦଘାଟନ ସହିତ ଶିଳାନ୍ୟାସ କରିଥିଲେ । ମୁଖ୍ୟମନ୍ତ୍ରୀଙ୍କ ଗସ୍ତ ସମୟରେ ବିଭିନ୍ନ ଦାବି ନେଇ ସ୍ଥାନୀୟ ବ୍ୟାସ ବେକାରୀ ଯୁବ ସଂଗଠନ ଓ ଯୁବ କଂଗ୍ରେସ ପକ୍ଷରୁ ମିଲିଟାରୀ ଛକ ଠାରେ ଶତାଧିକ ଯୁବକ ଏକତ୍ରିତ ହୋଇଥିଲେ । ସଭାସ୍ଥଳକୁ ଦାବି ପତ୍ର ନେଇ ଯିବା ସମୟରେ ପୋଲିସ ସେମାନଙ୍କୁ ଅଟକାଇ ଥିଲା । ସେମାନେ ଯାଉଥିବା ରାସ୍ତାକୁ ଅବରୋଧ କରି ୪୮ ଜଣ ଯୁବକଙ୍କୁ ଯାଜପୁର ରୋଡ ଥାନାକୁ ନେଇ ଅଟକ ରଖିଥିଲେ । ଆଜିର ଏହି କାର୍ଯ୍ୟକ୍ରମରେ ବରିଷ୍ଠ ଶ୍ରମିକନେତା ବିଦ୍ୟାଧର ମହାନ୍ତି, ବ୍ୟାସ ବେକାରୀ ଯୁବସଂଗଠନର ସଭାପତି ପଦ୍ମନାଭ ନାୟକ, ସମ୍ପାଦକ ଲଷ୍ମୀଧର ପାତ୍ର, ଇଞ୍ଜିନିୟର ଅବିନାଶ ମହାନ୍ତି, ଯୁବ କଂଗ୍ରେସ ନେତା ରାକେଶ ସାହୁ, ବ୍ରିଜ୍ଞାଜୟ ବଳ, ସେକ ବଦ୍ରିଉଦ୍ଦିନ, ଅନିଲ କୁମାର ଜେନା ବିଦ୍ୟାଧର ଯେନା, ସୁଦର୍ଶନ ନାୟକ ପ୍ରମୁଖ ଏକ ପ୍ରତିବାଦ ସଭା ଜରିଆରେ ବିଜେପି ସରକାର ସ୍ଥାନୀୟ ଲୋକଙ୍କ ସ୍ୱାର୍ଥକୁ ନଦେଖି ଶିଳ୍ପପତି ମାନଙ୍କୁ ସୁରକ୍ଷା ଦେଉଥିବା ଅଭିଯୋଗ କରି ଏହାର ଦୃଢ଼ ନିନ୍ଦା କରିଥିଲେ। ଏହା ସହିତ ମନ୍ତ୍ରୀ ପ୍ରଦୀପ ବଳସାମନ୍ତ ମଧ୍ୟ ସ୍ଥାନୀୟ ଯୁବକଙ୍କ ନିଯୁକ୍ତି ପ୍ରତି ଆଖିବୁଜି ଦେଇଥିବା ଅଭିଯୋଗ କରିଥିଲେ । ଜିଲ୍ଲାରେ ୨ଟି କର୍ମ ନିୟୋଜନ ସଂସ୍ଥା ଥିଲେ ମଧ୍ୟ ସେଠାରେ ପଞ୍ଜିକୃତ ୭୦ ହଜାରୁ ଉର୍ଦ୍ଧ୍ଵ ବୈଷୟିକ ଜ୍ଞାନଧାରୀ ଯୁବକ ଯୁବତୀ ମାନଙ୍କୁ ସାକ୍ଷାତକାରକୁ ଡକାଯାଏ ନାହିଁ ବୋଲି ଅଭିଯୋଗ କରିଥିଲେ । ଏଠାରେ ୧୭ ଗୋଟି ବଡ ଛୋଟ କାରଖାନା ଥିଲେ ମଧ୍ୟ ଆରପିଡିଏସି ବୈଠକ ନ ଡାକି ଅଣ ଓଡ଼ିଆ ଓ ରାଜ୍ୟ ବାହାର ଲୋକଙ୍କୁ ନିଯୁକ୍ତି ଦିଆଯାଉଛି ବୋଲି ଅଭିଯୋଗ କରିଥିଲେ । କାରଖାନା ଦ୍ୱାରା ସମଗ୍ର ଅଂଚଳ ପ୍ରଦୂଶିତ ହେଉଛି ଓ ସାଧାରଣ ଲୋକେ ବିଭିନ୍ନ ରୋଗରେ ପୀଡିତ ହେଉଛନ୍ତି ବୋଲି ଅଭିଯୋଗ କରିଥିଲେ । ହେଲେ ଶିଳ୍ପ ସଂସ୍ଥା ଗୁଡିକ ଏହାର ପାରିପାର୍ଶ୍ବିକ ଉନ୍ନୟନ ଉପରେ ଧାନ୍ୟ ନ ଦେବାକୁ ନେଇ ଉଦବେଗ ପ୍ରକାଶ କରିଥିଲେ । ବହୁଦିନ ଧରି ଶିଳ୍ପାନୁଷ୍ଠାନ ଦ୍ୱାରା ୧୦୦ ଶଯ୍ୟା ବିଶିଷ୍ଟ ଏକ ମେଡିକାଲ ସ୍ଥାପନ ଦାବି କାର୍ଯ୍ୟକାରୀ ହେଉନଥିବାକୁ ଶ୍ରମିକନେତା ଶ୍ରୀ ମହାନ୍ତି ଦୃଢ଼ ନିନ୍ଦା କରିଥିଲେ । ମୁଖ୍ୟମନ୍ତ୍ରୀ ଗସ୍ତ ସାରି ଯିବା ପରେ ପୋଲିସ ଅଟକ ନେତା ମାନଙ୍କୁ ଛାଡି ଦେଇଥିଲା ।