ଓଡ଼ିଶା ଲିଡ୍ସ(ବ୍ୟୁରୋ): ବିଜେଡିର ଏକଦା ଗଡ଼ କୁହା ଯାଉଥିବା ଯାଜପୁର ଜିଲ୍ଲା ରାଜନୀତିରେ ପରିବର୍ତ୍ତନର ସ୍ୱର ଶୁଭୁଛି । ପରିବର୍ତ୍ତନ ରାଜନୀତିରେ ବିଜେଡି ପାଦ ତଳୁ ମାଟି ଧସିବା ଆରମ୍ଭ ହୋଇଛି । ଗତ ନିର୍ବାଚନରେ ୪ଟି ନିର୍ବାଚନ ମଣ୍ଡଳୀରେ ବିଜେଡି ପରାଜିତ ହେଲା ପରେ ଏବେ ବିଜେଡି ହାତରୁ ପଞ୍ଚାୟତ ସମିତି ଖସିବା ଆରମ୍ଭ କରିଛି ।
ଗତ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ବିଜେଡି ଯାଜପୁର ଜିଲ୍ଲାର ସମସ୍ତ ବ୍ଲକରେ ବିପୁଳ ବିଜୟ ହାସଲ କରିଥିଲା । ଏହା ସହିତ ଜିଲ୍ଲା ପରିଷଦକୁ ମଧ୍ୟ ନିଜ ଅକ୍ତିୟାରକୁ ନେଇଥିଲା ବିଜେଡି । ଯାଜପୁର ଜିଲ୍ଲାର ବଡ଼ଚଣା, ଧର୍ମଶାଳା, ରସୁଲପୁର, ବରୀ, ଯାଜପୁର, ଦଶରଥପୁର, ବିଂଝାରପୁର, କୋରେଇ, ଦାନଗଦି, ସୁକିନ୍ଦା ପଞ୍ଚାୟତ ସମିତିକୁ ବିଜେଡି ଦାଖଲ କରିଥିଲା । ହେଲେ ଏବେ ସେଗୁଡିକ ମଧ୍ୟରୁ ଦୁଇଟି ପଞ୍ଚାୟତ ସମିତି ବିଜେପି ପକ୍ଷକୁ ଯାଇ ସାରିଛି । ଧର୍ମଶାଳା ପଞ୍ଚାୟତ ସମିତିରେ ଅଧ୍ୟକ୍ଷଙ୍କ ବିରୁଦ୍ଧରେ ଅନାସ୍ଥା ଡାକରା ଦେଇଥିଲା ବିଜେପି । ଅନାସ୍ଥା ପୂର୍ବରୁ ସମିତି ଅଧ୍ୟକ୍ଷ ନିଜ ପଦରୁ ଇସ୍ତଫା ଦେଇ ଦେଇଥିଲେ । ବଡ଼ଚଣାରେ ସମିତି ଅଧ୍ୟକ୍ଷା, ଉପାଧ୍ୟକ୍ଷ ବିଜେପିରେ ସାମିଲ ହୋଇଗଲେ । ଆଗକୁ ଆହୁରି କିଛି ପଞ୍ଚାୟତ ସମିତି ବିଜେପି ହାତକୁ ଚାଲିଯିବାର ଆଶଙ୍କା ସୃଷ୍ଟି ହୋଇଛି । ଯାହା ବିଜେଡିର ଚିନ୍ତା ବଢ଼ାଇ ଦେଇଛି ।
ଯାଜପୁର ରାଜନୀତିକୁ ଦୃଷ୍ଟି ଦେଲେ ଏହା ଏକ ଅଣ କଂଗ୍ରେସ ଜିଲ୍ଲା ଭାବେ ପରିଚୟ ସୃଷ୍ଟି କରିଛି । ଏହି ଜିଲ୍ଲାର ରାଜନୈତିକ ପ୍ରଭାବ ରାଜ୍ୟ ରାଜନୀତି ଉପରେ ସବୁ ସମୟରେ ରହି ଆସିଛି । ଜିଲ୍ଲାର ବହୁ ନେତା ରାଜ୍ୟ ରାଜନୀତିରେ ପ୍ରଭାବଶାଳୀ ପ୍ରଦର୍ଶନ କରିଛନ୍ତି । ଦିବଙ୍ଗତ ନେତା ଅଶୋକ ଦାସ, ଦଳର ବରିଷ୍ଠ ନେତା ପ୍ରଫୁଲ୍ଲ ଚନ୍ଦ୍ର ଘଡାଇ, ଦିବଙ୍ଗତ କଳ୍ପତରୁ ଦାସ ପ୍ରମୁଖ ରାଜ୍ୟ ରାଜନୀତିରେ ବେଶ ପ୍ରଭାବୀ ପ୍ରଦର୍ଶନ କରିଛନ୍ତି । ବିଜୁ ପଟ୍ଟନାୟକଙ୍କ ଠାରୁ ଆରମ୍ଭ କରି ନବୀନ ପଟ୍ଟନାୟକଙ୍କ ପର୍ଯ୍ୟନ୍ତ ଏମାନେ ଦଳ ଓ ସରକାରରେ ବେଶ ପ୍ରଭାବଶାଳୀ ବୋଲି ପ୍ରମାଣିତ କରିଛନ୍ତି । ଏମାନଙ୍କ ସମୟରେ ବରିଷ୍ଠ ନେତା ଅମର ପ୍ରସାଦ ଶତପଥୀ, ପ୍ରମିଳା ମଲ୍ଲିକ, ଦେବାଶିଷ ନାୟକ ମଧ୍ୟ ପ୍ରଭାବୀ ପ୍ରଦର୍ଶନ କରିଛନ୍ତି ।
ଦ୍ଵିତୀୟ ପିଢୀ ଭାବେ ପ୍ରଫୁଲ୍ଲ ଘଡାଇଙ୍କ ପୁତ୍ର ଇଂ ପ୍ରୀତିରଞ୍ଜନ ଘଡାଇ, ଅଶୋକ ଦାସଙ୍କ ପୁତ୍ର ପ୍ରଣବ ପ୍ରକାଶ ଦାସ ଓ କଳ୍ପତରୁ ଦାସଙ୍କ ପୁତ୍ର ପ୍ରଣବ ବଳବନ୍ତ ରାୟ ମଧ୍ୟ ପ୍ରଭାବୀ ପ୍ରଦର୍ଶନ କରିଛନ୍ତି । ଏହି ତିନିଜଣଙ୍କ ମଧ୍ୟରୁ ଦୁଇଜଣ ଇଂ ପ୍ରୀତିରଞ୍ଜନ ଓ ପ୍ରଣବ ପ୍ରକାଶ ସରକାରରେ ମନ୍ତ୍ରୀ ମଧ୍ୟ ହୋଇଛନ୍ତି । ଦଳର ଗୁରୁତ୍ୱପୂର୍ଣ୍ଣ ସାଙ୍ଗଠନିକ ପଦରେ ରହିଛନ୍ତି । ହେଲେ ଗତ ନିର୍ବାଚନରେ ଏହି ତିନିଜଣ ଯାକ ପରାଜିତ ହୋଇଛନ୍ତି । ଦଳ ଅମରଙ୍କୁ ଟିକେଟ ଦେଇ ନଥିଲା ବେଳେ ପ୍ରମିଳା ସ୍ୱଳ୍ପ ବ୍ୟବଧାନରେ ବିଜୟୀ ହୋଇଛନ୍ତି । ଟିକେଟ ନପାଇ ଅମର ଦଳରୁ ଦୁରେଇ ଯାଇଛନ୍ତି । ହେଲେ ଅନ୍ୟ ମାନଙ୍କ ନିକଟରେ ପ୍ରଚୁର ଅନୁଭବ ଓ ଅନୁଭୂତି ଥିଲା ବେଳେ ନିର୍ବାଚନ ବିପର୍ଯ୍ୟୟ ପରେ ଦଳ ଏବେ ପୁନର୍ବାର ବିପର୍ଯ୍ୟୟର ସମ୍ମୁଖିନ ହେଉଛି ।
ଶାସକ ଦଳ ଭାବେ ବିଜେପି ସଙ୍ଗଠିତ ହେଉଥିଲା ବେଳେ ବିଜେଡି କର୍ମୀ ବିଜେଡି ଛାଡି ବିଜେପିରେ ସାମିଲ ହେଉଛନ୍ତି । ହେଲେ ଏହାକୁ ରୋକିବାକୁ ବିଜେଡି ସମର୍ଥ ହେଉନାହିଁ । ଆଗକୁ ଆହୁରି କିଛି ପଞ୍ଚାୟତ ସମିତି ବିଜେଡି ହାତରୁ ଖସିଗଲେ ଜିଲ୍ଲାରେ ବିଜେଡିର ସ୍ଥିତି ଦୋହଲି ଯିବ ଏଥିରେ ସନ୍ଦେହ ନାହିଁ । ହେଲେ ଏହାକୁ ନେଇ ଦଳୀୟ ନେତୃତ୍ୱ ସଚେତନ ହେଉଥିବା ଭଳି ଜଣା ଯାଉନାହିଁ । ଯାହା କର୍ମୀଙ୍କ ମଧ୍ୟରେ ଅସନ୍ତୋଷ ସୃଷ୍ଟି କରିଛି । ଜିଲ୍ଲାରେ ଦଳକୁ ସଙ୍ଗଠିତ କରିବାକୁ ସମସ୍ତ ନେତା ଏକତ୍ରିତ ହୋଇ ଉଦ୍ୟମର ଆଵଶ୍ୟକତା ଥିଲା ବେଳେ ଏହାକୁ କିନ୍ତୁ ବିଜେଡି ନେତା ଗୁରୁତ୍ୱ ଦେଉନଥିବା ଜଣାଯାଇଛି ।
