ଓଡ଼ିଶା ଲିଡ୍ସ(ବ୍ୟୁରୋ): ଇଂଲଣ୍ଡ ବିପକ୍ଷରେ ଜବରଦସ୍ତ ଶତକ ହାସଲ କରିଛନ୍ତି ଋଷଭ ପନ୍ତ । ଏହି ଶତକ ସହିତ ସେ ମହାନ ଖେଳାଳି ଧୋନିଙ୍କ ରେକର୍ଡ଼ ଭାଙ୍ଗିଛନ୍ତି । ୧୪୬ଟି ବଲରୁ ୧୦ଟି ଚୌକା ଓ ୪ ଛକା ସହାୟତାରେ ଶତକ ହାସଲ କରିଥିଲେ ଋଷଭ ପନ୍ତ ।
ଏହା ତାଙ୍କ କ୍ୟାରିଅରର ସପ୍ତମ ଶତକ । ଏହି ଶତକ କରି ଭାରତୀୟ ୱିକେଟ କିପର ଭାବେ ଟେଷ୍ଟରେ ସର୍ବାଧିକ ଶତକ ହାସଲ କରିଛନ୍ତି । ପୂର୍ବରୁ ଧୋନି ୬ଟି ଶତକ ହାସଲ କରିଥିଲେ । ପନ୍ତ ୧୭୮ ବଲ୍ ଖେଳି ୧୩୪ ରନ୍ କରି ଆଉଟ ହୋଇଥିଲେ ।
ଅନ୍ୟପକ୍ଷରେ ଶୁଭମନ ଗିଲ୍ ଇଂଲଣ୍ଡ ବିପକ୍ଷ ସିରିଜର ଅଧିନାୟକ ଭାବେ ପ୍ରଥମ ମ୍ୟାଚ୍ରେ ଶତକ ହାସଲ କରିଛନ୍ତି । ଅଧିନାୟକ ଭାବରେ ତାଙ୍କର ଡେବ୍ୟୁ ଟେଷ୍ଟ ଇନିଂସ୍ରେ ଶତକ ହାସଲ କରିବାରେ ସେ ଚତୁର୍ଥ ଭାରତୀୟ ଖେଳାଳି ହୋଇଛନ୍ତି। ତାଙ୍କ ପୂର୍ବରୁ ବିଜୟ ହଜାରେ, ସୁନୀଲ ଗଭାସ୍କର ଓ ବିରାଟ କୋହଲି ଏହି ରେକର୍ଡ ସ୍ଥାପନ କରିଥିଲେ । ସେ ଇଂଲଣ୍ଡ ବିପକ୍ଷରେ ଚାଲିଥିବା ଟେଷ୍ଟରେ ଅଧିନାୟକ ଭାବରେ ତାଙ୍କର ପ୍ରଥମ ମ୍ୟାଚ୍ ଖେଳୁଛନ୍ତି ।
ସେପଟେ ଶୁଭମନ ଗିଲ୍ ଟେଷ୍ଟ କ୍ରିକେଟରେ ପ୍ରଥମ ଥର ପାଇଁ ୪ ନମ୍ବରରେ ବ୍ୟାଟିଂ କରୁଛନ୍ତି । ପୂର୍ବରୁ ଏହି ସ୍ଥାନରେ ବିରାଟ କୋହିଲି ବ୍ୟାଟିଂ କରୁଥିଲେ । ଇଂଲଣ୍ଡ ବିପକ୍ଷ ସିରିଜ ପୂର୍ବରୁ ଶୁଭମନ ଗିଲ ତାଙ୍କ ୩୨ ମ୍ୟାଚ୍ ବିଶିଷ୍ଟ ଟେଷ୍ଟ କ୍ୟାରିୟରରେ ୧୮୯୩ ରନ୍ କରିଥିଲେ। ଏବେ ଇଂଲଣ୍ଡ ବିପକ୍ଷରେ ୧୦୭ ରନ୍ କରିବା ପରେ ଟେଷ୍ଟ ଫର୍ମାଟରେ ୨୦୦୦ ରନ୍ ପୂରଣ କରିଛନ୍ତି । କ୍ୟାରିଅରର ୬୦ ତମ ଇନିଂସରେ ସେ ଏହି ଲକ୍ଷ ହାସଲ କରିଛନ୍ତି ।
