ସ୍ୱାସ୍ଥ୍ୟ ପାଇଁ ନାଲି ଚାଉଳ : ଚାଉଳରେ ଓଜନ କମାଇବା ସହ ବିଭିନ୍ନ ରୋଗକୁ ନାଶ କରିବାର ରହିଛି ଶକ୍ତି

ଓଡ଼ିଶା ଲିଡ୍ସ(ବ୍ୟୁରୋ): ଭାରତ ବର୍ଷର ପ୍ରମୁଖ ଖାଦ୍ୟ ହେଲା ଭାତ । ଦିନ ହେଉ ଅବା ରାତି ସମସ୍ତଙ୍କ ଖାଇବା ଥାଳିରେ ଭାତ ପରସାଯାଏ । ଆଜି ସମୟରେ ମଧୁମେହ ରୋଗୀ ଭାତ ଖାଇବାକୁ ଡାକ୍ତର ବାରଣ କରିଛନ୍ତି । ହେଲେ ସର୍ବାଧିକ ଲୋକ ଭାତ ଖାଇବାକୁ ପସନ୍ଦ କରନ୍ତି । ଭାତ ଖାଇବାକୁ ଭଲ ପାଉଥିବା ଦେଶ ହେଉଛି ଭାରତ । ଭାରତରେ ବିଭିନ୍ନ ପ୍ରକାର ଚାଉଳ ଉପଲବ୍ଧ । ବିଭିନ୍ନ ପ୍ରକାର ଚାଉଳ ମଧ୍ୟରୁ ନାଲି ଚାଉଳ ସ୍ବାସ୍ଥ୍ୟ ପାଇଁ ହିତକର ବୋଲି ପ୍ରମାଣିତ ହୋଇଛି । ଅନ୍ୟ ଚାଉଳରେ କାର୍ବୋହାଇଡ୍ରେଟର ମାତ୍ରା ଅଧିକ ଥିବା ବେଳେ ନାଲି ଚାଉଳରେ ଫାଇବର, ପ୍ରୋଟିନ୍ ଏବଂ ଆଣ୍ଟିଅକ୍ସିଡେଣ୍ଟସର ପ୍ରଚୁର ମାତ୍ରା ମହଜୁଦ ଥିବା ପରୀକ୍ଷାରୁ ଜଣାଯାଇଛି । ହୃଦ ଜନିତ ରୋଗରୁ ଆରମ୍ଭ କରି ମଧୁମେହ ଭଳି ଅନେକ ରୋଗକୁ ଅଟକାଇବାର ଶକ୍ତି ନାଲି ଚାଉଳରେ ରହିଛି । ନାଲି ଚାଉଳ ଖାଇବା ଦ୍ୱାରା ଶରୀରକୁ ଶକ୍ତି ମିଳିଥାଏ । ବିଭିନ୍ନ ଆଣ୍ଟିଅକ୍ସିଡେଣ୍ଟସର ମାତ୍ରା ନାଲି ଚାଉଳରେ ଥାଏ ଯାହା ବିଭିନ୍ନ ରୋଗକୁ ପ୍ରତିରୋଧ କରିଥାଏ ।ଗବେଷଣା ଜଣା ଯାଇଛି ଯେ ଏହି ସବୁ ତତ୍ତ୍ବ କୋଶିକାରୁ ଫ୍ରି ରେଡିକଲ୍ସକୁ ବାହାର କରି ଅକ୍ସିଡେଟିଭ୍ ଷ୍ଟ୍ରେସ୍ କମ୍ କରେ ନାଲି ଚାଉଳ । ଏହାକୁ ବ୍ୟବହାର କରିବା ଦ୍ବାରା କ୍ୟାନ୍ସର ସମେତ ହୃଦରୋଗ, ମଧୁମେହ ଭଳି ରୋଗର ଆଶଙ୍କା କମ ହୋଇଥାଏ । ନାଲି ଚାଉଳ ଶରୀରରେ ଇନଫ୍ଲାମେସନକୁ କମ୍ କରିଥାଏ । ଇନଫ୍ଲାମେସନ୍ କାରଣରୁ କୋଷିକାରେ ସମସ୍ୟା ଦେଖିବାକୁ ମିଳେ ଯାହା କ୍ୟାନ୍ସର, ଆଣ୍ଠୁଗଣ୍ଠି ବ୍ୟଥା ଭଳି ଅନେକ ସମସ୍ୟାକୁ ଜନ୍ମ ଦେଇପାରେ । ଏଭଳି ସ୍ଥିତିରେ ଯଦି ଆପଣ ନିୟମିତ ନାଲି ଚାଉଳ ଖାଉଛନ୍ତି ତେବେ ଏଭଳି ଘାତକ ରୋଗରୁ ଆପଣ ମୁକ୍ତି ପାଇପାରିବେ । ନାଲି ଚାଉଳରେ ମଧ୍ୟ ମ୍ୟାଗ୍ନେସିୟମର ମାତ୍ରା ପ୍ରଚୁର ପରିମାଣରେ ମିଳିଥାଏ, ଯାହା ଶ୍ବାସ ସମ୍ବନ୍ଧୀୟ ରୋଗରୁ ମଧ୍ୟ ମୁକ୍ତି ଦିଏ । ସେଥିପାଇଁ ଡାକ୍ତର ଆସ୍ଥମା ରୋଗୀଙ୍କୁ ନାଲି ଚାଉଳ ଖାଇବା ପାଇଁ ମଧ୍ୟ ପରାମର୍ଶ ଦେଇଥାନ୍ତି । ଏହା ତ୍ବଚା ପାଇଁ ମଧ୍ୟ ବରଦାନ ଭଳି କାର୍ଯ୍ୟ କରେ । ସମୟ ପୂର୍ବରୁ ତ୍ବଚାରେ ଦେଖାଯାଉଥିବା କୁଞ୍ଚନକୁ ନାଲି ଚାଉଳ ମଧ୍ୟ ଦୂର କରେ । ଓଜନ କମ କରାଇବାରେ ମଧ୍ୟ ନାଲି ଚାଉଳ ଅଧିକ ପ୍ରଭାବିଶାଳୀ ବୋଲି ପ୍ରମାଣିତ ହୋଇଛି ।