ଆସନ୍ତୁ ପରିବର୍ତ୍ତନ ପାଇଁ ସଂକଳ୍ପ ନେବା-ଡ୍ୟାନି
ଓଡ଼ିଶା ଲିଡ୍ସ(ଯାଜପୁର): ସୁକିନ୍ଦା ବ୍ଲକ ହରିପୁର ପଞ୍ଚାୟତରେ ବିଜେଡିର ସାଙ୍ଗଠନିକ ବୈଠକ ଅନୁଷ୍ଠିତ ହୋଇ ଯାଇଛି । ବୈଠକରେ ମୁଖ୍ୟ ଅତିଥି ଭାବେ ଯୋଗଦେଇ ଆଗାମି ରଣନୀତି ବିଷୟରେ ଆଲୋଚନା କରିଥିଲେ ବିଜେଡିର ବରିଷ୍ଠ ସାଧାରଣ ସମ୍ପାଦକ ଇଂ ପ୍ରୀତିରଞ୍ଜନ ଘଡାଇ । ଚର୍ଚ୍ଚାରେ ଥିବା ଡ୍ୟାନିଙ୍କ ଆମ୍ବତୋଟା ରାଜନୀତି ଆଜି ପୁଣି ଦେଖିବାକୁ ମିଳିଥିଲା । ଆଡ଼ମ୍ବର ନଥିଲେ ମଧ୍ୟ କର୍ମୀଙ୍କ ଗହଳି ଦେଖିବାକୁ ମିଳିଥିଲା ଏହି ବୈଠକରେ । ନିଜ ବକ୍ତବ୍ୟରେ ପୂର୍ବତନ ମନ୍ତ୍ରୀ କହିଥିଲେ ପରିବର୍ତ୍ତନ ଆମ ଠାରୁ ବିକାଶ ଛଡାଇ ନେଇଛି, ପରିବର୍ତ୍ତନ ଆପଣ ମାନଙ୍କ ଆଖିରେ ଲୁହ ଦେଇଛି । ସୁକିନ୍ଦା ମାଟି ଏବେ ବିକାଶକୁ ଖୋଜୁଛି । ଆଗାମି ଦିନରେ ପରିବର୍ତ୍ତନ କରିବାକୁ ଆପଣ ମାନେ ସଂକଳ୍ପ ନିଅନ୍ତୁ । ଯେଉଁ ପରିବର୍ତ୍ତନ ଲୁହ ଦେଇଛି, ସେଇ ପରିଵର୍ତନ ଆପଣଙ୍କ ମୁହଁରେ ହସ ଫୁଟାଇବ । ପଞ୍ଚାୟତର ନେତୃବୃନ୍ଦ ଓ କର୍ମୀ ନିଜ ମତ ରଖି ହରିପୁର ପଞ୍ଚାୟତ ପରିବର୍ତ୍ତନ ପାଇଁ ପ୍ରତିଶ୍ରୁତି ବଦ୍ଧ ବୋଲି ମତ ଦେଇଥିଲେ ।
