ଓଡ଼ିଶା ଲିଡ୍ସ(ବ୍ୟୁରୋ): ବରିଷ୍ଠ ଅଭିନେତା ତଥା ଦେଶାତ୍ମବୋଧକ ଚଳଚ୍ଚିତ୍ରର ଲୋକପ୍ରିୟ ଅଭିନେତା ମନୋଜ କୁମାରଙ୍କର ୮୭ ବର୍ଷ ବୟସରେ ମୁମ୍ବାଇର କୋକିଳାବେନ ଧିରୁଭାଇ ଅମ୍ବାନୀ ହସ୍ପିଟାଲ୍ରେ ଦେହାନ୍ତ ହୋଇଛି । ନିଜ ଫିଲ୍ମ କ୍ୟାରିୟରରେ ସ୍ୱର୍ଗତ ମନୋଜ ଏକାଧିକ ଦେଶାତ୍ମବୋଧକ ଚଳଚ୍ଚିତ୍ରରେ ଅଭିନୟ କରି ବେଶ ଲୋକପ୍ରିୟ ହୋଇଥିଲେ । ଯେଉଁଥିପାଇଁ ପ୍ରସଂଶକ ତାଙ୍କୁ ଶ୍ରଦ୍ଧାରେ ‘ଭାରତ କୁମାର’ ବୋଲି ସମ୍ବୋଧନ କରନ୍ତି । କ୍ରାନ୍ତି, ଉପକାର ଭଳି ଦେଶାତ୍ମବୋଧକ ଚଳଚ୍ଚିତ୍ର ପାଇଁ ବେଶ ଚର୍ଚ୍ଚିତ ଥିଲେ ମନୋଜ ।
ସହାରା, ଚାନ୍ଦ, ପୂରବ ଔର ପଶ୍ଚିମ, ନସିବ, ମେରି ଆୱାଜ ସୁନୋ, ନୀଳ କମଲ, ଉପକାର, ପଥର କେ ସନମ, ପିୟା ମିଲନ ଭଳି ଲୋକପ୍ରିୟ ଚଳଚ୍ଚିତ୍ରରେ କାମ କରି ସେ ବେଶ ପ୍ରସଂଶା ସାଉଁଟି ଥିଲେ । ନିଜର ଦକ୍ଷତା ବଳରେ ଜାତୀୟ ଚଳଚ୍ଚିତ୍ର ପୁରସ୍କାର ସହ ପଦ୍ମଶ୍ରୀ ଓ ଦାଦା ସାହେବ ଫାଲ୍କେ ଆୱାର୍ଡରେ ସମ୍ମାନିତ ହୋଇଥିଲେ ମନୋଜ ।
୧୯୫୭ରେ ଫିଲ୍ମ ଫ୍ୟାସନ ଜରିଆରେ ଚଳଚ୍ଚିତ୍ର ଜଗତରେ ପାଦ ଥାପିଥିଲେ ମନୋଜ କୁମାର । ୧୯୬୫ ମସିହା ଥିଲା ତାଙ୍କ କ୍ୟାରିୟର ଶୀର୍ଷରେ ପହଞ୍ଚିଥିଲା । ସେହି ବର୍ଷ ଆସିଥିବା ସହିଦ ଫିଲ୍ମ ତାଙ୍କ କ୍ୟାରିୟରକୁ ମାଇଲ ଖୁଣ୍ଟ ଥିଲା । ଏହା ପରେ ସେ ପଛକୁ ଫେରି ଚାହିଁ ନଥିଲେ । ସେ ଯେ କୌଣସି ଚରିତ୍ରରେ ନିଖୁଣ ଅଭିନୟ କରି ଦର୍ଶକଙ୍କ ମନ ଜିଣିବାରେ ସକ୍ଷମ ହେଉଥିଲେ । ତାଙ୍କ ଚଳଚ୍ଚିତ୍ରର ଗୀତ ଗୁଡିକ ମଧ୍ୟ ବେଶ ଲୋକପ୍ରିୟ ହେଉଥିଲା । ତାଙ୍କ ଅଭିନୀତ ଉପକାର ଫିଲ୍ମର ଗୀତ ‘ମେରେ ଦେଶ କି ଧରତୀ ସୋନା ଉଗଲେ, ଉଗଲେ ହୀରା ମୋତି’ ଆଜି ବି ବେଶ ଲୋକପ୍ରିୟ ।
୧୯୩୭ ମସିହା ଜୁଲାଇ ୨୪ ତାରିଖରେ ମନୋଜ କୁମାର ପରାଧୀନ ଭାରତ ତଥା ଏବର ପାକିସ୍ତାନରେ ଗ୍ରହଣ କରିଥିଲେ । ତାଙ୍କ ପ୍ରକୃତ ନାଁ ଥିଲା ହରିକୃଷ୍ଣ ଗିରି ଗୋସ୍ଵାମୀ । ଦେଶ ବିଭାଜନ ବେଳେ ତାଙ୍କ ପରିବାର ଦିଲ୍ଲୀ ପଳାଇ ଆସିଥିଲେ । ଏହା ପରେ ସେ ମୁମ୍ବାଇ ଯାଇ ନିଜ ଭାଗ୍ୟ ପରୀକ୍ଷା କରିଥିଲେ । ଆଉ ନିଜ ଫିଲ୍ମ କ୍ୟାରିଅରରେ ସଫଳତାର ଶୀର୍ଷକୁ ଯାଇ ପାରିଥିଲେ । ତାଙ୍କ ମୃତ୍ୟରେ ବଲିଉଡ ଫିଲ୍ମ ଦୁନିଆରେ ଶୋକର ଛାୟା ଖେଳି ଯାଇଥିଲା ବେଳେ ବହୁ ବିଶିଷ୍ଟ ବ୍ୟକ୍ତି ଶୋକ ବ୍ୟକ୍ତ କରିଛନ୍ତି ।
