ଓଡ଼ିଶା ଲିଡ୍ସ(ବ୍ୟୁରୋ): କେଉଁ ଦଳ ମଙ୍ଗୁଆଳ ନେଇ ନିଷ୍ପତ୍ତି ନେଇ ପାରୁ ନାହିଁ ତ ଆଉ କେଉଁ ଦଳ ଛାମୁଁଆ ସଂଗଠନ ଗଢି ପାରୁନାହିଁ । ରାଜ୍ୟର ତିନି ପ୍ରମୁଖ ଦଳରେ ସମାନ ସ୍ଥିତି ଦେଖିବାକୁ ମିଳିଛି । ଶାସକ ଦଳ ବିଜେପି ରାଜ୍ୟ ସଭାପତିଙ୍କ ନାମ ଘୋଷଣା କରି ପାରୁ ନଥିଲା ବେଳେ ବିଜେଡି ଓ କଂଗ୍ରେସର ସଭାପତି ଥାଇ ମଧ୍ୟ ଛାମୁଆ ସଂଗଠନ ଗଠନ ହେଇ ପାରୁ ନାହିଁ । ଏଭଳି ସ୍ଥିତି ଏବେ ରାଜ୍ୟ ରାଜନୀତିରେ ଚର୍ଚ୍ଚାର ବିଷୟ ହୋଇଛି । ତେବେ ସବୁଠାରୁ ଚର୍ଚ୍ଚାରେ ରହିଛି ମୁଖ୍ୟ ଵିରୋଧି ଦଳ ବିଜୁ ଜନତା ଦଳ। ଗତ ମାସ ସୁଦ୍ଧା ନିର୍ବାଚନ ପ୍ରକ୍ରିୟା ସାରିବାକୁ ଦଳ ନିର୍ବାଚନ କମିଶନଙ୍କ ଠାରୁ ସମୟରେ ମାଗିଥିଲା କିନ୍ତୁ ମାସ ସରିଥିଲେ ମଧ୍ୟ ରାଜ୍ୟ କାର୍ଯ୍ୟକାରିଣୀ ଘୋଷଣା କରି ପାରୁ ନାହିଁ ବିଜୁ ଜନତା ଦଳ । ଦଳ ଭିତରେ ଗୋଷ୍ଠି କନ୍ଦଳ ବଢୁଥିଲା ବେଳେ ରାଜ୍ୟ କାର୍ଯ୍ୟକାରିଣୀ ଗଠନ ଦଳ ପାଇଁ ଆହ୍ୱାନ ସୃଷ୍ଟି କରିଛି । ହେଲେ ରାଜ୍ୟ କାର୍ଯ୍ୟକାରିଣୀ ଗଠନରେ ବିଳମ୍ବ ହେବା ଦ୍ୱାରା ଗୋଷ୍ଠୀ କନ୍ଦଳ ଆହୁରି ତେଜୁଛି। ଓଡ଼ିଶା କଂଗ୍ରେସରେ ବି ସମାନ ସ୍ଥିତି । କମିଟି ଅଙ୍କ ଛିଡି ପାରୁନଥିବା ବେଳେ ଦଳୀୟ ନେତାଙ୍କ ମଧ୍ୟରେ ଛକା ପଞ୍ଝା ଲାଗିରହିଛି । ରାଜ୍ୟ ବିଜେପିର ନୂଆ ସଭାପତି ମଧ୍ୟ ଏଯାଏଁ ଚୟନ ହୋଇପାରିନି। ଘୋଷଣା ତାରିଖ ଗାଡି ଚାଲୁଥିଲା ବେଳେ ଦଳୀୟ ନେତା ଓ କର୍ମୀ ଆଶଙ୍କା ଭିତରେ ଗତି କରୁଛନ୍ତି ।
ଗତ ଏପ୍ରିଲ ୧୯ ତାରିଖରେ ବିଜେଡି ସଭାପତି ନିର୍ବାଚନ ହୋଇଥିଲା। ନବୀନ ନିର୍ଦ୍ବନ୍ଦ୍ବରେ ନବମ ଥର ପାଇଁ ସଭାପତି ଭାବେ ନିର୍ବାଚିତ ହୋଇଥିଲେ । ଦଳର ନିୟମ ଅନୁଯାୟୀ ୩୫୫ ଜଣ ସଦସ୍ୟଙ୍କୁ ନେଇ ରାଜ୍ୟ ପରିଷଦ ଓ ୮୧ ଜଣ ସଦସ୍ୟଙ୍କୁ ନେଇ ରାଜ୍ୟ କାର୍ଯ୍ୟକାରିଣୀ ଗଠନ ହେବା କଥା। ରାଜ୍ୟ କାର୍ଯ୍ୟକାରିଣୀ ସଦସ୍ୟ ସଭାପତି ନିର୍ବାଚିତ କରିବା କଥା । ବିଜେଡି ସଭାପତି ନିର୍ବାଚନ ସରିଥିଲେ ବି ରାଜ୍ୟ କାର୍ଯ୍ୟକାରିଣୀ ଓ ପରିଷଦରେ କିଏ ଅଛନ୍ତି ତାହା ସ୍ପଷ୍ଟ ହୋଇ ନାହିଁ । ବିଜେଡିର ଗୋଟିଏ ଗୋଷ୍ଠି ଜାଣିଶୁଣି କାର୍ଯ୍ୟକାରିଣୀ ତାଲିକାକୁ ଲୁଚାଯାଉଛି ବୋଲି ଅଭିଯୋଗ କରୁଛନ୍ତି । ସେପଟେ ଦଳ କହୁଛି, ଠିକ୍ ସମୟରେ ଦଳ ସଭାପତି ଏ ନେଇ ନିଷ୍ପତ୍ତି ନେବେ।
ପୁରାତନ ଦଳ କଂଗ୍ରେସର ମଙ୍ଗ ଧରିଛନ୍ତି ପୁରୁଖା ତଥା ଅନୁଭବୀ ନେତା ଭକ୍ତ ଦାସ । ଦଳ ରାଜ୍ୟ ସଭାପତି ହେବା ପରେ ଦଳରେ ପ୍ରାଣ ସଞ୍ଚାର ହୋଇଛି । ଭକ୍ତ ସମସ୍ତଙ୍କୁ ନେଇ ଚାଲିବାର ଉଦ୍ୟମ କରୁଥିବା ବେଳେ ଦଳ ମଧ୍ୟରେ ଉତ୍ସାହ ଦେଖାଦେଇଛି । ହେଲେ ବିଜେଡି ଭଳି ଦଳ ରାଜ୍ୟ କାର୍ଯ୍ୟକାରିଣୀ ଗଠନ ହେବାରେ ବିଳମ୍ବ ହେବା ଦଳୀୟ ନେତା ଓ କର୍ମୀଙ୍କୁ ନିରାଶ କରୁଛି ।
