ଓଡ଼ିଶା ଲିଡ୍ସ(ବ୍ୟୁରୋ): ରାଜ୍ୟରେ ଡବଲ ଇଞ୍ଜିନ ସରକାର ଚାଲିଛି । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ତାଙ୍କ ସରକାରକୁ ଲୋକ ସରକାରର ଆଖ୍ୟା ଦେଇଛନ୍ତି । ହେଲେ ଲୋକ ସରକାରରେ ସାଧାରଣ ଲୋକଙ୍କ ଜୀବନ ପ୍ରତି ବିପଦ ସୃଷ୍ଟି କରୁଥିବା ଏକ କମ୍ପାନୀ ବିରୁଦ୍ଧରେ ପଦକ୍ଷେପ ନେଇ ଲୋକଙ୍କ ଜୀବନ ବଞ୍ଚାଇବାକୁ ଉଦ୍ୟମ ନକରିବା ଚିନ୍ତାର ବିଷୟ ହୋଇଛି । ରାଜ୍ୟ ସରକାର କିମ୍ବା ଯାଜପୁର ଜିଲ୍ଲା ପ୍ରଶାସନ ପଦକ୍ଷେପ ନ ନେଇ ଚୁପ ବସିବା ସାଧାରଣ ଲୋକଙ୍କ ପ୍ରତି ସରକାର କେତେ ଦାୟିତ୍ୱବାନ ତାକୁ ମଧ୍ୟ ପ୍ରମାଣିତ କରୁଛି ବୋଲି କହିଛନ୍ତି ପୂର୍ବତନ ମନ୍ତ୍ରୀ ତଥା ବିଜେଡିର ବରିଷ୍ଠ ସାଧାରଣ ସମ୍ପାଦକ ଇଂ ପ୍ରୀତିରଞ୍ଜନ ଘଡାଇ । ଇଂ ଘଡାଇ କହିଛନ୍ତି ସୁକିନ୍ଦାରେ ସ୍ଥାପିତ ହୋଇଥିବା ରାମକୀ ୱେଷ୍ଟ ମ୍ୟାନେଜମେଣ୍ଟ ୟୁନିଟ ଚତୁର୍ପାର୍ଶ୍ୱରେ ଥିବା ସୁକିନ୍ଦା ବ୍ଳକର ୭ ଗୋଟି ପଞ୍ଚାୟତର ଜନ ସାଧାରଣଙ୍କ ଜୀବନ ବିପଦରେ ପଡିଛି । ରାମକୀର ଏହି ୟୁନିଟ ପାଇଁ ଏହି ୭ ପଞ୍ଚାୟତର ଭୂତଳ ଜଳ ଏବେ ବ୍ୟବହାର ଯୋଗ୍ୟ ହୋଇ ରହିନାହିଁ । ଏହି ପାଣି ବ୍ୟବହାର କରିବା ଦ୍ୱାରା ଲୋକମାନେ ମାରାତ୍ମକ ଚର୍ମ ରୋଗ, କିଡନୀ ରୋଗ ସହିତ କ୍ୟାନ୍ସର ରୋଗରେ ପୀଡିତ ହେଉଛନ୍ତି । ଦିନକୁ ଦିନ ଏହି ଅଞ୍ଚଳରେ ବିଭିନ୍ନ ମାରାତ୍ମକ ରୋଗ ବ୍ୟାପୁଥିଲା ବେଳେ ଏହା ଗମ୍ଭୀର ଚିନ୍ତାର ବିଷୟ ହୋଇଛି । ପଶୁ ପକ୍ଷୀ ମଧ୍ୟ ଏହି ପାଣି ବ୍ୟବହାର କରି ମୃତ୍ୟୁ ମୁଖରେ ପଡୁଛନ୍ତି ।
ଏହାକୁ ନେଇ ଅଭିଯୋଗ ହେଲା ପରେ ନିକଟରେ ଓଡିଶା ରାଜ୍ୟ ଷ୍ଟେଟ ପଲ୍ୟୁସନ କଂଟ୍ରୋଲ ବୋର୍ଡ ଏହି ଜଳର ପରୀକ୍ଷଣ କରି ଏହି ଜଳରେ ମାରାତ୍ମକ ହେଭି ମେଟାଲ(ଲିଡ଼, ଫ୍ଲୋରାଇଡ଼ ଓ ଅନ୍ୟ ରସାୟନ)ଥିବା ପ୍ରକାଶ କରିଛନ୍ତି । ଯାହା ଦ୍ୱାରା ଏହି ପାଣିକୁ ବ୍ୟବହାର କରିବା ଦ୍ୱାରା ଲୋକମାନେ ମାରାତ୍ମକ ରୋଗରେ ପୀଡିତ ହେଉଛନ୍ତି । କେବଳ ସେତିକି ନୁହେଁ ବର୍ଷା ଦିନେ ଏହି ବିଷାକ୍ତ ପାଣି ନାଳ, ପୋଖରୀ, ନଳକୂପ ଓ ଅନ୍ୟ ଜଳ ଉତ୍ସରର ମିଶିବା ଦ୍ୱାରା ଏହାକୁ ବ୍ୟବହାର କରୁଥିବା ମଣିଷ ଓ ପଶୁପକ୍ଷୀ ମଧ୍ୟ ପ୍ରଭାବିତ ହେଉଛନ୍ତି । ଏହା ଦ୍ୱାରା ଚାଷ ମଧ୍ୟ ପ୍ରଭାବିତ ହେଉଛି । ଓଡ଼ିଶା ଷ୍ଟେଟ ପଲ୍ୟୁସନ କଂଟ୍ରୋଲ ବୋର୍ଡ ଏହି ମାରାତ୍ମକ ରିପୋର୍ଟ ଦେଲା ପରେ ମଧ୍ୟ ସରକାର ଏହାର ଅଧିକ ପରୀକ୍ଷଣ ପାଇଁ ସେଣ୍ଟ୍ରାଲ ଗ୍ରାଉଣ୍ଡ ୱାଟର ବୋର୍ଡ଼କୁ ପାଣିର ଅଧିକ ପରୀକ୍ଷଣ ପାଇଁ ନ ପଠାଇବା ଚିନ୍ତାର ବିଷୟ ହୋଇଛି । ରାମକୀ କମ୍ପାନୀର ଏହି ୟୁନିଟରୁ ନିର୍ଗତ ରାସାୟନିକ ପଦାର୍ଥ ମିଶ୍ରିତ ଜଳ ଭୂତଳ ଜଳରେ ମିଶି ଏହାକୁ ମରାତ୍ମକ ଭାବେ ଅଶୋଧିତ କରି ଦେଇଛି । ଏହି କମ୍ପାନୀର ୱେଷ୍ଟ ମ୍ୟାନେଜମେଣ୍ଟ ୟୁନିଟକୁ ଜିଲ୍ଲା ପ୍ରଶାସନ ତୁରନ୍ତ ବନ୍ଦ କରିବା ବଦଳରେ ଏହାକୁ ଚାଲୁରଖି ସୁକିନ୍ଦାର ହଜାର ହଜାର ନିରୀହ ଲୋକଙ୍କ ଜୀବନ ସହିତ ଖେଳ ଖେଳ ଖେଳିବା ଭଳି ହୋଇଛି । ତୁରନ୍ତ ଏ ବିଷୟରେ ପଦକ୍ଷେପ ନ ନେଲେ ହଜାର ହଜାର ନିରୀହ ଲୋକଙ୍କ ଜୀବନ ସହିତ ପଶୁ ପକ୍ଷୀଙ୍କ ଜୀବନ ଦୀପ ଅଦିନରେ ଲିଭିଯିବାର ଆଶଙ୍କା ସୃଷ୍ଟି ହୋଇଛି । ଏ ନେଇ ରାଜ୍ୟ ସରକାର ଓ ଯାଜପୁର ଜିଲ୍ଲା ପ୍ରଶାସନ ତୁରନ୍ତ ପଦକ୍ଷେପ ନେବା ଜରୁରୀ ବୋଲି ମତ ଦେଇଛନ୍ତି ଇଂ ଘଡାଇ ।
