ଓଡ଼ିଶା ଲିଡ୍ସ(ବ୍ୟୁରୋ):ଓଡିଶା ଖଣି ନିଗମ ଦ୍ଵାରା ପ୍ରତିମାସରେ ଥରେ ସୁକିନ୍ଦା କ୍ରୋମାଇଟ ଖଣି ଗୁଡିକରୁ ନିଲାମ ଦ୍ଵାରା କ୍ରୋମପଥର ବିକ୍ରୟ କରାଯାଉଥିଲେ ହେଁ -୪୦% ଗ୍ରେଡର କ୍ରୋମାଇଟକୁ ନିଲାମ କରିବା ସମୟରେ ବିଗତ ଏକ ବର୍ଷ ହେବ (୨୦୨୫ ମସିହାରେ) ଏକ ସ୍ଥିରିକୃତ ଦରରେ ପାଖାପାଖି ୯୦୦୦ ଟଙ୍କା ପ୍ରତି ଟନ୍ ହିସାବରେ ବିକ୍ରୟ କରାଯାଉଛି । ବିଶ୍ଵ ବଜାରରେ ବିଭିନ୍ନ ସମୟରେ ଏହି ଦୁର୍ମୁଲ୍ୟ ଖଣିଜ ପଦାର୍ଥର ଦର ବଢୁଥିବା ଏବଂ କମୁଥିବା ବେଳେ ଏହା କିପରି ଭାବରେ -୪୦% ଗ୍ରେଡର କ୍ରୋମାଇଟ କ୍ଷେତ୍ରରେ ପାଖାପାଖି ସମାନ ରହୁଛି । ଏତଦ ବ୍ୟତିତ ୪୦% ଗ୍ରେଡର କ୍ରୋମାଇଟ ୨୧ରୁ ୨୨ ହଜାର ଟଙ୍କା ପ୍ରତି ଟନରେ ଏବଂ ଅନ୍ୟାନ୍ୟ ଗ୍ରେଡର କ୍ରୋମାଇଟ ଆହୁରି ଅଧିକ ଦରରେ ବିକ୍ରୟ ହେଉଥିବା ବେଳେ -୪୦% ଗ୍ରେଡର କ୍ରୋମାଇଟର ଦର ଏତେ କମ୍ କେମିତି ହେଉଛି ତାହା ସନ୍ଦେହ ସୃଷ୍ଟି କରୁଛି ।
ତେଣୁ ଏଥିରେ ରାଜ୍ୟ ତଥା ରାଜ୍ୟ ବାହାରର ବିଭିନ୍ନ ଶିଳ୍ପ ସଂସ୍ଥା, ଖଣି ନିଗମର କିଛି ପଦାଧିକାରୀ ଏବଂ ରାଜନେତାଙ୍କ ମଧ୍ୟରେ ଏକ ସିଣ୍ଡିକେଟ ଗଠନ ହୋଇ ଟେଣ୍ଡର ଫିକ୍ସି କରାଯାଉଥିବା ବେଳେ ରାଜ୍ୟ ସରକାର ମଧ୍ୟ ଶହ ଶହ କୋଟି ଟଙ୍କା ରାଜସ୍ୱ କ୍ଷତି ସହୁଛନ୍ତି । ତେଣୁ ଏହାର ସି.ବି.ଆଇ ଏବଂ ଇ.ଡି ଦ୍ଵାରା ତଦନ୍ତ କରି ଦୋଷିଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସୁକିନ୍ଦା ରିଜିଅନ କ୍ରୋମାଇଟ ଖାଦାନ ମଜଦୁର ସଂଘର ସଭାପତି ତଥା ପୂର୍ବତନ ମନ୍ତ୍ରୀ ଇଂ.ପ୍ରୀତିରଞ୍ଜନ ଘଡାଇ ଓଡିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ପତ୍ରଲେଖି ଅନୁରୋଧ କରିଛନ୍ତି । ଯଦି ଏହାର ସଠିକ ତଦନ୍ତ ନହୁଏ ତେବେ ଆଗାମୀ ଦିନରେ ଏଥିପାଇଁ ନ୍ୟାୟାଳୟର ଦ୍ବାରସ୍ଥ ହେବାପାଇଁ ପଛାଇବେ ନାହିଁ ବୋଲି ଶ୍ରୀ ଘଡାଇ ଏକ ପ୍ରେସ ବିବୃତିରେ ଜଣାଇଛନ୍ତି ।
