ଓଡ଼ିଶା ଲିଡ୍ସ(ବ୍ୟୁରୋ): ୨୦୨୩ ଏକ ଦିବସୀୟ ବିଶ୍ୱକପ ଫାଇନାଲ ପୂର୍ବରୁ ଅଷ୍ଟ୍ରେଲିଆ ଅଧିନାୟକ ପାଟ୍ କମିନ୍ସ ଯାହା କହିଥିଲେ, ତାହା କରି ଦେଖାଇଥିଲେ ନରେନ୍ଦ୍ର ମୋଦି ଷ୍ଟାଡିୟମରେ । ଭାରତର ପ୍ରଦର୍ଶନରେ ମୋଦୀ ଷ୍ଟାଡିୟମ ଉପସ୍ଥିତ ଦର୍ଶକଙ୍କ ସହିତ ସାରା ଦେଶ ନିରବ ହୋଇ ଯାଇଥିଲା। ଦିନିକିଆ ବିଶ୍ଵକପ୍- ୨୦୨୩ ଫାଇନାଲରେ ଭାରତକୁ ହରାଇ ଚାମ୍ପିଅନ ହୋଇଥିଲା ଅଷ୍ଟ୍ରେଲିଆ। ଆସନ୍ତାକାଲି ସେଇ ନରେନ୍ଦ୍ର ମୋଦି ଷ୍ଟାଡିୟମରେ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଖେଳାଯିବ T-20 ବିଶ୍ଵକପ୍ ୨୦୨୬ର ଫାଇନାଲ। ସେଦିନ ଅଷ୍ଟ୍ରେଲିଆ ଅଧିନାୟକ କମିନ୍ସଙ୍କ ପରି କିଓ୍ଵି ଅଧିନାୟକ ମିଚେଲ୍ ସାଣ୍ଟନର ମଧ୍ୟ ଦମ୍ଭିକତା ଦେଖାଇ କହିଛନ୍ତି ଯେ, ଅହମ୍ମଦାବାଦରେ ୧୪୦ କୋଟି ଭାରତୀୟଙ୍କ ହୃଦୟ ଭାଙ୍ଗି ଯାଇପାରେ। ଆଜି ସାମ୍ବାଦିକ ସମ୍ମିଳନୀରେ ନ୍ୟୁଜିଲାଣ୍ଡ ଅଧିନାୟକ ସାଣ୍ଟନର ସାମ୍ବାଦିକଙ୍କ ପ୍ରଶ୍ନର ଉତ୍ତର ଦେଇ କହିଛନ୍ତି ଯେ, ଟ୍ରଫି ଉଠାଇବା ପାଇଁ ମୋତେ ପୁଣି ଥରେ କିଛି ହୃଦୟ ଭାଙ୍ଗିବାରେ ଆପତ୍ତି ନାହିଁ। ସାଣ୍ଟନରଙ୍କ ଏହି ବୟାନରୁ ସ୍ପଷ୍ଟ ହୋଇଛି ଯେ, ନ୍ୟୁଜିଲାଣ୍ଡ ବିଶ୍ଵକପ୍ ଜିତିବାକୁ ବ୍ୟଗ୍ର ହୋଇ ପଡିଛି ।
ଗତ ୧୧ ବର୍ଷ ମଧ୍ୟରେ ନ୍ୟୁଜିଲାଣ୍ଡର ପଞ୍ଚମ ଥର ଆଇସିସି ଫାଇନାଲ ଖେଳିଥିଲେ ମଧ୍ୟ ଦଳ ଥରୁଟିଏ ବି ଧଳା ବଲ୍ କ୍ରିକେଟରେ ଟ୍ରଫି ଜିତି ପାରିନାହିଁ । ଏଥର ଟ୍ରଫି ଜିତିବାକୁ ଯେମିତି ପଣ କରିଛି ନ୍ୟୁଜିଲାଣ୍ଡ ।ସାଣ୍ଟନର କହିଛନ୍ତି ଅହମ୍ମଦାବାଦର ଏକ ଲକ୍ଷ ଦର୍ଶକଙ୍କୁ ଶାନ୍ତ କରିବା ଆମର ଉଦ୍ୟେଶ୍ୟ ରହିଛି। ଟିମର ଉତ୍ସାହ ଚରମରେ ରହିଛି, ଟିମ ଘରୋଇ ଦଳ ଉପରେ ଚାପ ପକାଇ ପାରିବ । ଦକ୍ଷିଣ ଆଫ୍ରିକା ବିପକ୍ଷରେ ମିଳିଥିବା ଏକ ତରଫା ବିଜୟରେ ତାଙ୍କ ଦଳ ବହୁତ ଆତ୍ମବିଶ୍ଵାସ ସହ ମଇଦାନକୁ ଓହ୍ଲାଇବ।
ଅନ୍ୟପକ୍ଷରେ ଭାରତୀୟ ଦଳର ଶକ୍ତି ଉପରେ ସାଣ୍ଟନର କହିଛନ୍ତି ଯେ, ଭାରତ ପାଖରେ ଯଶପ୍ରୀତ ବୁମରାଙ୍କ ପରି ବିଶ୍ଵସ୍ତରୀୟ ବୋଲର ଅଛନ୍ତି, ଯିଏ କୌଣସି ବି ସମୟରେ ମ୍ୟାଚର ଗତିବିଧି ବଦଳାଇ ପାରନ୍ତି। ଭାରତ ନିକଟରେ ପ୍ରତିଭା ସମ୍ପନ୍ନ ବ୍ୟାଟର ଥିଲା ବେଳେ ବ୍ୟାଟିଂକ୍ରମକୁ ରୋକିବା ପାଇଁ ପାଓ୍ଵାର ପ୍ଲେରେ ଓ୍ଵିକେଟ୍ ନେବା ମଧ୍ୟ ଜରୁରୀ। ନଚେତ୍ ଭାରତ ୨୫୦ ରନ ପରି ବିଶାଳ ସ୍କୋର ମଧ୍ୟ କରି ପାରିବ। ଅବଶ୍ୟ ଆଉ କିଛି ଘଣ୍ଟା ପରେ ୧୪୦ କୋଟି ଭାରତୀୟ ନିରାଶ ହେଉଛନ୍ତି କି ଆତ୍ମବିଭୋର ହେଉଛନ୍ତି ତାକୁ ଅପେକ୍ଷା ।
