ପଦକ୍ଷେପ ନେଉ ନାହିଁ ପୋଲିସ: ପ୍ରତିବାଦରେ ସାଇକେଲରେ ଶବ ବୁହା

ଓଡ଼ିଶା ଲିଡ୍ସ(ବ୍ୟୁରୋ): ଏକଦା ନିଜ ପତ୍ନୀଙ୍କ ଶବକୁ ନିଜ କାନ୍ଧରେ ବୋହି ଚର୍ଚ୍ଚାର କେନ୍ଦ୍ରବିନ୍ଦୁ ସାଜିଥିଲେ ଦାନ ମାଝୀ । ଯାହା ରାଜ୍ୟ ସମ୍ମାନରେ ଆଞ୍ଚ ଆଣିଥିଲା । ନିକଟରେ କେନ୍ଦୁଝରର ଜିତୁ ମୁଣ୍ଡା ବ୍ୟାଙ୍କରୁ ଟଙ୍କା ଉଠାଇ ନପାରି ନିଜ ଭଉଣୀର କଙ୍କାଳକୁ କାନ୍ଧରେ ଧରି ବ୍ୟାଙ୍କକୁ ଯିବା ଘଟଣା ସାରା ଦେଶରେ ଚର୍ଚ୍ଚିତ ହାଇଥିଲା । ଏହି ଚର୍ଚ୍ଚା ଥମି ନଥିଲା ବେଳେ ପୁଣି ସାଇକେଲରେ ବୁହା ହେଲା ଶବ। ଗତକାଲି ବାଲେଶ୍ବର ହରିପୁର ଗାଁରେ ଛାତ ପକାକୁ କେନ୍ଦ୍ର କରି ଦୁଇ ମହିଳାଙ୍କୁ ଆକ୍ରମଣ ହୋଇଥିଲା । ଆକ୍ରମଣରେ ଜଣଙ୍କର ମୃତ୍ୟୁ ହୋଇଥିଲା ବେଳେ ଅନ୍ୟ ଜଣେ ଗୁରୁତର ହୋଇ ଚିକିତ୍ସିତ ହେଉଛନ୍ତି । ଉଭୟ ମୃତକ ଓ ଆହତ ସମ୍ପର୍କରେ ନଣନ୍ଦ-ଭାଉଜ ବୋଲି ଜଣା ଯାଇଛି । ଆକ୍ରମଣ ପରେ ଉଭୟଙ୍କୁ ଉଦ୍ଧାର କରି ଖଇରା ମେଡିକାଲ ଓ ପରେ କଟକ ସ୍ଥାନାନ୍ତର କରାଯାଇଥିଲା । ସେଠାରେ ଜଣେ ମହିଳାଙ୍କ ମୃତ୍ୟୁ ହୋଇଥିଲା ବେଳେ ଅନ୍ୟ ଜଣେ ଏବେ ଗୁରୁତର ଭାବେ ଚିକିତ୍ସିତ ହେଉଛନ୍ତି। ଗତକାଲି ମୃତା ମହିଳା କମଳା ସେଠୀଙ୍କ ଶବ ଘରେ ପହଞ୍ଚିବା ପରେ ଆଜି ସକାଳୁ ଗାଁ ଲୋକେ ଶବକୁ ସାଇକେଲରେ ନେଇ ଖଇରା ଥାନାକୁ ଯାଇଛନ୍ତି। ଅଭିଯୁକ୍ତଙ୍କ ବିରୁଦ୍ଧରେ ପୋଲିସ କାର୍ଯ୍ୟାନୁଷ୍ଠାନ ନେଇ ନଥିବା ପ୍ରତିବାଦରେ ପରିବାର ଲୋକ ଏଭଳି କରିଥିବା ସୂଚନା ମିଳିଛି । ଏହି ଖବର ପାଇ ପୋଲିସ ପରିବାର ଲୋକଙ୍କୁ ବୁଝାଇବାକୁ ଉଦ୍ୟମ କରୁଥିବା ଜଣା ଯାଇଛି ।