ଓଡ଼ିଶା ଲିଡ୍ସ(ବ୍ୟୁରୋ): ମହାଭାରତ ମଞ୍ଚସ୍ଥ ବେଳେ ମହାଭାରତ କାଣ୍ଡ ଘଟି ୧୬ ଜଣ ଆହତ ହେବା ସହିତ ୧୦ ଜଣ ଗିରଫ ହୋଇଛନ୍ତି । ବ୍ରହ୍ମପୁର ସହର ଉପକଣ୍ଠ ଗୋଳନ୍ଥରା ଥାନା ମାର୍କଣ୍ଡି ଗ୍ରାମରେ ଗତକାଲି ରାତିରେ ଏହି ଘଟଣା ଘଟିଛି । ଠାକୁରାଣୀ ଯାତ୍ରା ଉପଲକ୍ଷେ ଦୁଇ ନାଟକ ଦଳ ପକ୍ଷରୁ ମହାଭାରତ ନାଟକ ମଞ୍ଚସ୍ଥ ବେଳେ ଗୋଷ୍ଠୀ ସଂଘର୍ଷ ଆରମ୍ଭ ହୋଇ ବୋମାମାଡ଼ରେ ୧୬ ଜଣ ଆହତ ହୋଇଛନ୍ତି । ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚିଥିଲା । ପୋଲିସ ମାମଲା ରୁଜୁ କରି ଉଭୟ ପକ୍ଷର ୧୦ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି। ସୂଚନା ଅନୁଯାୟୀ ରାମପଲ୍ଲୀ ଓ ଗୋବିନ୍ଦପୁର ଗ୍ରାମର ନାଟ୍ୟଦଳ ଗାଁରେ ମହାଭାରତ ପରିବେଷଣ କରୁଥିଲେ। କୌଣସି କାରଣକୁ ନେଇ ଉଭୟ ପକ୍ଷ ମଧ୍ୟରେ ଯୁକ୍ତିତର୍କ ହେବା ପରେ ଏହା ଉଗ୍ର ରୂପ ନେଇଥିଲା। ଉଭୟ ପକ୍ଷ ପରସ୍ପରକୁ ଟେକାପଥର, କାଚ ବୋତଲ, ଇଟା ଫିଙ୍ଗାଫୋପଡ଼ା କରିଥିଲେ। ଏହା ପରେ ଗୋଟିଏ ଗୋଷ୍ଠି ବୋମାମାଡ଼ କରିଥିଲେ ।
ପୁଲିସ ସୂଚନା ପାଇ ସେଠାରେ ପହଞ୍ଚି ଉଭୟ ପକ୍ଷଙ୍କୁ ବୁଝାସୁଝା କରିଥିଲେ ହେଁ ସେମାନେ ପୋଲିସକୁ ଗାଳିଗୁଲଜ କରିବା ସହ ଟେକାପଥର ଫୋପାଡ଼ିଥିଲେ ବୋଲି ଅଭିଯୋଗ ହୋଇଛି । ବହୁ ଉଦ୍ୟମ ପରେ ପୋଲିସ ପରିସ୍ଥିତିକୁ ନିୟନ୍ତ୍ରଣକୁ ଆଣିବାସହ ଆହତଙ୍କୁ ଚିକିତ୍ସା ପାଇଁ ବ୍ରହ୍ମପୁର ବଡ଼ ଡାକ୍ତରଖାନା ପଠାଇଥିଲା। ପରେ ପୋଲିସ ନିଜଆଡୁ ମାମଲା ରୁଜୁ କରି ଉଭୟ ପକ୍ଷର ୧୦ ଜଣଙ୍କୁ ଗିରଫ କରି ଘଟଣାର ତଦନ୍ତ କରୁଛି ।
