ଅହିୟାସ ବଜାରରେ ବନ୍ୟା ପାଣି, ବଡ଼ ବନ୍ୟା ଆଶଙ୍କାରେ ଜନସାଧାରଣ
ଓଡ଼ିଶା ଲିଡ୍ସ(ଦଶରଥପୁର): ଲଘୁଚାପ ଜନିତ ଲଗାଣ ବର୍ଷା ଯୋଗୁ ବୈତରଣୀ ଓ ତାର ଶାଖା ନଦୀ କାଣୀରେ ୭ମ ବନ୍ୟାର ଆଶଙ୍କା ସୃଷ୍ଟି ହୋଇଛି । ଉପର ମୁଣ୍ଡରେ ବର୍ଷା ହେବାରୁ ରବିବାର ସକାଳୁ ବୈତରଣୀରେ ଜଳସ୍ତର ବୃଦ୍ଧି ପାଇବାରେ ଲାଗିଛି। ଯଦି ରାତିରେ ଅଧିକ ବର୍ଷା ହୁଏ ତେବେ ଜଳସ୍ତର ଆହୁରି ବୃଦ୍ଧି ପାଇ ବନ୍ୟା ସ୍ଥିତି ଉପୁଜିବାର ସମ୍ଭାବନା ରହିଛି । ଅନ୍ୟ ପକ୍ଷରେ ତରପଦା ପଞ୍ଚାୟତ ଡୋଭାବିଲ ଗାଁ ପଟଣାସାହିର ମୁକୁଳା ଘାଇରୁ ମାଡୁଥିବା ବନ୍ୟାଜଳ ପ୍ରଭାବରେ ରବିବାର ସନ୍ଧ୍ୟା ସୁଦ୍ଧା ତଳ ମୁଣ୍ଡରେ ଥିବା ତରପଦା, କସପା, ମଲ୍ଲିକାପୁର, ଛଞ୍ଚିଣା, ଶୁଶୁଆ, ଦୁଦୁରାଅନ୍ତା, ନିଜାମପୁର, ଖାନନଗର, କମାରଢିହି, କଁୟା ଅଞ୍ଚଳ ଜଳମଗ୍ନ ହେବାରେ ଲାଗିଛି। ମୁକୁଳା ଘାଇ ଦେଇ ପ୍ରଚୁର ବନ୍ୟା ପାଣି ତଳିଆ ଅଞ୍ଚଳକୁ ମାଡି ଚାଲିଥିବାରୁ ରାତି ସୁଦ୍ଧା ବନ୍ୟା ପାଣି ଅବଶିଷ୍ଟ ପଞ୍ଚାୟତରେ ପ୍ରବେଶ କରିବା ସମ୍ଭାବନା ରହିଥିବା ଜଳସମ୍ପଦ ବିଭାଗ ସହକାରୀ ଯନ୍ତ୍ରୀ ଅନ୍ତର୍ଯ୍ୟାମୀ ମହାନ୍ତି ଓ କନିଷ୍ଠ ଯନ୍ତ୍ରୀ ଅରୁଣ କୁମାର ତ୍ରିପାଠୀ ସୂଚନା ଦେବା ସହିତ ଜିଲ୍ଲାପାଳଙ୍କ ନିର୍ଦ୍ଦେଶରେ ବିଭାଗ ପକ୍ଷରୁ ବନ୍ୟା ସ୍ଥିତି ଉପରେ ସତର୍କ ନଜର ରଖାଯାଇଥିବା କହିଛନ୍ତି। କସପା, ତରପଦା, ମଲ୍ଲୀକାପୁର ପଞ୍ଚାୟତ ଜନସାଧାରଣଙ୍କ ପ୍ରମୁଖ ବ୍ୟବସାୟ ସ୍ଥଳୀ ଅହିୟାସ ବଜାରରେ ପୁନର୍ବାର ବନ୍ୟା ପାଣି ପ୍ରବେଶ କରିଛି। ବଜାର ରାସ୍ତାରେ ୨ ଫୁଟ ଉଚ୍ଚର ବନ୍ୟା ଜଳ ଲହଡି ମାରୁଥିବା ବେଳେ ବଜାରର ଅଧିକାଂଶ ଦୋକାନରେ ବନ୍ୟା ପାଣି ପ୍ରବେଶ କରି ସାରିଛି। ବନ୍ୟା ସ୍ଥିତିରେ ଦଶରଥପୁର ବ୍ଲକ ଦାୟୀତ୍ୱରେ ଥିବା ଅତିରିକ୍ତ ଜିଲ୍ଲାପାଳଙ୍କ ଅନୁସାରେ ଏବେ ସୁଦ୍ଧା ବନ୍ୟାରେ ବ୍ଲକର ୧୯ଟି ପଞ୍ଚାୟତର ୬୨ଟି ଗାଁ ପ୍ରଭାବିତ ହୋଇଛି। ପ୍ରଶାସନ ପକ୍ଷରୁ ପ୍ରଭାବିତ ଅଞ୍ଚଳରେ ବିପନ୍ନଙ୍କ ସୁରକ୍ଷାକୁ ସର୍ବାଧିକ ଗୁରୁତ୍ତ୍ୱ ଦିଆଯାଉଛି। ଏବେ ସୁଦ୍ଧା ବନ୍ୟାରେ ମୋଟ ୧ଲକ୍ଷ ୧୦ହାଜରରୁ ଅଧିକ ଲୋକ ପ୍ରଭାବିତ ହୋଇଛନ୍ତି। ବନ୍ୟା ପ୍ରଭାବିତ ଅଞ୍ଚଳରୁ ୮ହଜାର ୯୮୩ ଜଣ ବିପନ୍ନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇ ବିଭିନ୍ନ ଅସ୍ଥାୟୀ ଆଶ୍ରୟ ସ୍ଥଳରେ ଥଇଥାନ କରାଯାଇଛି । ରନ୍ଧାଖାଦ୍ୟ କେନ୍ଦ୍ର ମାଧ୍ୟମରେ ରନ୍ଧା ଖାଦ୍ୟ ଯୋଗାଇ ଦିଆଯାଉଛି। ବନ୍ୟା ପ୍ରଭାବିତ ଅଞ୍ଚଳରେ ସ୍ୱାସ୍ଥ୍ୟସେବାକୁ ସର୍ବାଧିକ ପ୍ରାଥମିକତା ଦିଆଯାଇଛି। ପ୍ରଭାବିତ ଅଞ୍ଚଳରେ ଜିଲ୍ଲା ସ୍ୱାସ୍ଥ୍ୟ ବିଭାଗ ପକ୍ଷରୁ ୧୮ଟି ଶିବିର ଖୋଲାଯାଇଛି। ଏଠାରେ ନିୟୋଜିତ ୧୦ଟି ସ୍ୱାସ୍ଥ୍ୟ ଟିମ୍ ପ୍ରଭାବିତଙ୍କୁ ଆବଶ୍ୟକ ସ୍ୱାସ୍ଥ୍ୟସେବା ପ୍ରଦାନ କରୁଛନ୍ତି । ବନ୍ୟା ସମୟରେ ୧୮ ଜଣ ଗର୍ଭବତୀ ମହିଳାଙ୍କୁ ସ୍ୱାସ୍ଥ୍ୟକେନ୍ଦ୍ରକୁ ସ୍ଥାନାନ୍ତର କରାଯାଇଛି। ପ୍ରାଣୀ ସମ୍ପଦର ସୁରକ୍ଷା ପାଇଁ ୧୨ଟି ଭ୍ରାମ୍ୟମାଣ ଚିକିତ୍ସା ଟିମ୍ ଏବଂ ୮ଟି ପ୍ରାଣୀ ଚିକିତ୍ସା ଶିବିର କାର୍ଯ୍ୟକ୍ଷମ ରହିଛି। ଆବଶ୍ୟକତା ଅନୁସାରେ ପ୍ରାଣୀଙ୍କ ଚିକିତ୍ସା, ଟିକାକରଣ, ଔଷଧ ଉପଲବ୍ଧ କରାଯାଉଛି। ଜରୁରୀ ପରିସ୍ଥିତିରେ ଉଦ୍ଧାର କାର୍ଯ୍ୟ ପାଇଁ ୨ଟି ଓଡ୍ରାଫ୍ ଟିମ୍ ୨୪ଘଣ୍ଟା ସଜାଗ ରହିଛନ୍ତି ବୋଲି କହିଛନ୍ତି ଅତିରିକ୍ତ ଜିଲ୍ଲାପାଳ । ଅନ୍ୟ ପକ୍ଷରେ ଲଘୁଚାପ ଫଳରେ ଉପର ମୁଣ୍ଡରେ ପ୍ରବଳ ବର୍ଷା ହେଉଥିବାରୁ ଦଶରଥପୁରବାସୀ ବନ୍ୟାକୁ ନେଇ ଆତଙ୍କିତ ହୋଇ ପଡିଛନ୍ତି ।
