ଓଡ଼ିଶା ଲିଡ୍ସ(ବ୍ୟୁରୋ): ଗତକାଲି ଓଡ଼ିଶା ବିଧାନସଭାର ମୌସୁମୀ ଅଧିବେଶନ ଆରମ୍ଭ ହୋଇଛି । ଅଧିବେଶନର ପ୍ରଥମ ଦିନରେ କଂଗ୍ରେସ ଅନାସ୍ଥା ପ୍ରସ୍ତାବ ଆଗତ କରିଛି ଶାସକ ବିଜେପି ସରକାର ବିରୁଦ୍ଧରେ । ଚଳିତ ବିଧାନସଭାରେ କଂଗ୍ରେସ ତୃତୀୟ ସଂଖ୍ୟା ଗରିଷ୍ଠ ଦଳ । କଂଗ୍ରେସର ବିଧାୟକ ସଂଖ୍ୟା ମାତ୍ର ୧୪ । ହେଲେ ସଂଖ୍ୟା ହିସାବକୁ ପଛରେ ଛାଡି କଂଗ୍ରେସ ଶାସକ ଦଳ ବିରୁଦ୍ଧରେ ଅନାସ୍ଥା ପ୍ରସ୍ତାବ ଆଗତ କରିଛି । ୧୪ ଜଣିଆ କଂଗ୍ରେସ ଦଳକୁ କମ୍ୟୁନିଷ୍ଟ ପାର୍ଟିର ଏକ ମାତ୍ର ବିଧାୟକ ସମର୍ଥନ କରୁଛନ୍ତି । ମାତ୍ର ୧୫ ସଂଖ୍ୟାକୁ ନେଇ ସରକାରର କୌଣସି କ୍ଷତି କଂଗ୍ରେସ କରି ପାରିବ ନାହିଁ ଏହା ମଧ୍ୟ କଂଗ୍ରେସ ନୁହେଁ ସବୁ ରାଜନୈତିକ ଦଳ ଜାଣିଛନ୍ତି । ଏପରି ସ୍ଥଳେ କଂଗ୍ରେସ ବିଜେଡିର ସହଯୋଗ ମାଗିଛି । ବିଧାନସଭା ଆରମ୍ଭର ବହୁ ପୂର୍ବରୁ କଂଗ୍ରେସଗ ବିଜେଡିକୁ ଅନାସ୍ଥା ଡାକିବାର ଆହ୍ୱାନ ଦେଇଥିଲା । ଏହା ସହିତ ବିଜେଡି ଅନାସ୍ଥା ଡାକିଲେ କଂଗ୍ରେସ ତାର ସମର୍ଥନ ଦେବ ବୋଲି ବି ପ୍ରତିଶୃତି ଦେଇଥିଲା । ହେଲେ ମୁଖ୍ୟ ଵିରୋଧି ଦଳ ବିଜେଡି ଅନାସ୍ଥା ଡାକିବାରୁ ଦୁରେଇ ଯିବା କାରଣରୁ କଂଗ୍ରେସ ଅନାସ୍ଥା ଡାକରା ଦେଇଛି ।
ହେଲେ କଂଗ୍ରେସର ଅନାସ୍ଥା ଡାକରାକୁ ବିଜେଡି ସମର୍ଥନ କରିବାର କୌଣସି ସଂକେତ ଦେଇନାହିଁ । ବିଜେଡି ଆଗକୁ ଯେ କଂଗ୍ରେସକୁ ସମର୍ଥନ ଦେବ ସେମିତି ଆଶା ବି ଦେଖା ଯାଉନାହିଁ । ଅନ୍ୟ ପକ୍ଷରେ ବିଜେଡି ଓ କଂଗ୍ରେସ ମିଶିଲେ ବି ଅନାସ୍ଥା ପ୍ରସ୍ତାବ କାଟ ଖାଇବା ନିଶ୍ଚିତ । ବିଜେପି ମଧ୍ୟ କହିଛି କଂଗ୍ରେସ ସରକାର ବିରୁଦ୍ଧରେ ଅନାସ୍ଥା ଡାକି ଲୋକହସା ହେବ । ଏପରି ସ୍ଥଳେ କଂଗ୍ରେସ କାହିଁକି ସରକାର ବିରୁଦ୍ଧରେ ଅନାସ୍ଥା ଡାକରା ଦେଲା ତାକୁ ନେଇ ଚର୍ଚ୍ଚା ହେଉଛି । ହେଲେ କଂଗ୍ରେସ ଯେ କିଛି ରଣନୀତି ନକରି ଅନାସ୍ଥା ଡାକି ଲୋକହସା ହେଉଛି ତାହା ଆଦୌ ନୁହେଁ । ପ୍ରକୃତ କଥା ହେଲା କଂଗ୍ରେସ ଅନାସ୍ଥାରୁ ଆସ୍ଥା ଖୋଜୁଛି । ଆଜକୁ୨୪ ବର୍ଷ ତଳେ କଂଗ୍ରେସକୁ ରାଜ୍ୟବାସୀ ପ୍ରତ୍ୟାଖ୍ୟାନ କରିଥିଲେ । ବିଜେଡି ଓ ବିଜେପି ମିଳିତ ସରକାର ଗଠନ କରିଥିଲେ । ଉଭୟ ଦଳର ଟାର୍ଗେଟରେ ଥିଲା କଂଗ୍ରେସ ଓ ତାର ଅତୀତ ଇତିହାସ । ଯାହା ଏବେ ବିଜେପି ଓ କଂଗ୍ରେସ ଭିତରେ ଦେଖିବାକୁ ମିଳୁଛି । ସେବେଠାରୁ କଂଗ୍ରେସ ରାଜ୍ୟରେ ଆଉ ମୁଣ୍ଡ ଟେକି ପାରୁନାହିଁ । ଏହା ପଛରେ କଂଗ୍ରେସ ନେତାଙ୍କର ଯେ ଭୂମିକା ନାହିଁ ଏହା କଂଗ୍ରେସ ମଧ୍ୟ କହି ପାରିବ ନାହିଁ ।
କଂଗ୍ରେସର ଦଳୀୟ କନ୍ଦଳ ମଧ୍ୟ ସବୁ ସମୟରେ ରାଜ୍ୟବାସୀଙ୍କ ବିମୁଖତା କୁ ବଢ଼ାଇଛି ଦଳ ପ୍ରତି । ନୂତନ ଭାବେ ପିସିସି ସଭାପତି ହେବା ପରେ ଭକ୍ତ ଦାସ କଂଗ୍ରେସରେ ପ୍ରାଣ ପ୍ରତିଷ୍ଠା କରିଛନ୍ତି କହିଲେ ଅତ୍ୟୁକ୍ତି ହେବ ନାହିଁ । ସମସ୍ତଙ୍କୁ ସାଥିରେ ନେଇ ଚାଲିବାର ଉଦ୍ୟମ କରି ଦଳକୁ ଆଗକୁ ନେଉଛନ୍ତି ଭକ୍ତ । ଜଣେ ଅନୁଭବୀ ରାଜନେତା ଭାବେ ଭକ୍ତ ଜାଣିଛନ୍ତି ବିଜେଡିର କ୍ଷତି ହେଲେ କଂଗ୍ରେସ ଲାଭବାନ ହେବ । ବିଜେଡି ମୁଖ୍ୟ ଵିରୋଧି ଦଳ ଭାବେ ସରକାରକୁ ଯେତିକି ବିରୋଧ କରି ନାହିଁ କଂଗ୍ରେସ ତା ଠାରୁ ଅଧିକ ବିରୋଧ କରି ରାଜ୍ୟବାସୀଙ୍କ ବିଶ୍ୱାସ ଓ ଭରସା ଜିତିବାକୁ ଉଦ୍ୟମ କରିଛି ଓ କିଛି ମାତ୍ରାରେ ସଫଳ ମଧ୍ୟ ହୋଇଛି । କଂଗ୍ରେସ ରାଜ୍ୟରେ ଟ୍ରାକକୁ ଫେରୁଥିଲା ବେଳେ ଏତିକି ବେଳେ ଅନାସ୍ଥାର ଡାକ ଦେଇ ବଡ଼ ଗୋଟି ଖେଳିଛନ୍ତି ପିସିସି ସଭାପତି । ଅନାସ୍ଥାକୁ ବିଜେଡି ସମର୍ଥନ ନ କଲେ କଂଗ୍ରେସ ରାଜ୍ୟବାସୀଙ୍କୁ ବାର୍ତ୍ତା ଦେବ ବିଜେଡି ବିଜେପିକୁ ସମର୍ଥନ କରୁଛି, ଆଉ ଏଥିରୁ ଫାଇଦା ନେବ । ଯାହା କଂଗ୍ରେସ ପାଇଁ ବେଶ ଅନୁକୂଳ ମଧ୍ୟ ହେବ । ଗତକାଲି କଂଗ୍ରେସ ଆଉ ଏକ ଗୋଟି ଖେଳି ସାରିଛି । ନବୀନ ପଟ୍ଟନାୟକ ଦିଲ୍ଲୀରେ ଥିଲା ବେଳେ କଂଗ୍ରେସ ଜାଣି ଶୁଣି ତାଙ୍କ ଚାମ୍ବରକୁ ଯାଇ ରାଜ୍ୟବାସୀଙ୍କୁ ବାର୍ତ୍ତା ଦେଇଛି ଯେ ବିଧାନସଭା ଭଳି ଗୁରୁତ୍ୱପୂର୍ଣ୍ଣ ସମୟରେ ଵିରୋଧି ଦଳ ନେତା ଅନୁପସ୍ଥିତ ରହୁଛନ୍ତି । ଅନାସ୍ଥାରୁ ଆସ୍ଥା ଖୋଜୁଥିବା କଂଗ୍ରେସ କେତେ ସଫଳ ହେଉଛି ତାହା ଆଗାମି ଦିନରେ ଅଧିକ ସ୍ପଷ୍ଟ ହେବ ।
