ଓଡ଼ିଶା ଲିଡ୍ସ(ବ୍ୟୁରୋ): ଚିଲିକା ହ୍ରଦରେ ସରକାରୀ ଓ ବେସରକାରୀ ଡଙ୍ଗା ଚଳାଚଳରେ ବ୍ୟାପକ ଅନିୟମିତତା ଏବଂ କର୍ମଚାରୀଙ୍କ ମନମୁଖୀ ଶାସନ ଯୋଗୁଁ ସାଧାରଣ ଯାତ୍ରୀ ଅତିଷ୍ଠ ହୋଇପଡ଼ିଛନ୍ତି। ନିର୍ଦ୍ଧାରିତ ସମୟ କୁ ଫୁ କରି ଉଡ଼ାଇ ଦେବା ସହ ଯାତ୍ରୀଙ୍କୁ ସେମାନଙ୍କ ଗନ୍ତବ୍ୟ ସ୍ଥଳରେ ନ ପହଞ୍ଚାଇ ଜବରଦସ୍ତି ଅନ୍ୟତ୍ର ନେଇଯିବା ଭଳି ସମ୍ବେଦନଶୀଳ ଘଟଣା ଏବେ ସାମ୍ନାକୁ ଆସିଛି।
ଆଜି ସକାଳ ସମୟରେ ସାତପଡ଼ା ଅଭିମୁଖେ ଯିବାକୁ ଥିବା ଶତାଧିକ ଯାତ୍ରୀଙ୍କୁ ନେଇ ଯାଉଥିବା ଡଙ୍ଗାକୁ କର୍ମଚାରୀମାନେ ଜୋର ଜବରଦସ୍ତ ଜହ୍ନିକୁଦା ଅଭିମୁଖେ ନେଇ ଯାଇଥିଲେ। ଯାତ୍ରୀମାନେ ଏହାର ପ୍ରତିବାଦ କରିଥିଲେ ମଧ୍ୟ ସେମାନଙ୍କ କଥାକୁ କର୍ମଚାରୀମାନେ କର୍ଣ୍ଣପାତ କରିନଥିଲେ। ସୂଚନାଯୋଗ୍ୟ ଯେ, ସକାଳ ୫:୩୦ ସୁଦ୍ଧା ଡଙ୍ଗା ପହଞ୍ଚିବା କଥା, କିନ୍ତୁ ସମୟ ଅତିକ୍ରାନ୍ତ ହେବା ପରେ ମଧ୍ୟ ଯାତ୍ରୀମାନେ ମଝି ଚିଲିକାରେ ହଇରାଣ ହେଉଥିବା ଦେଖିବାକୁ ମିଳିଥିଲା । ଏହି ଯାତ୍ରୀଙ୍କ ମଧ୍ୟରେ ଅନେକ ସରକାରୀ କର୍ମଚାରୀ, ଦିନ ମଜୁରିଆ ଏବଂ ଜରୁରୀ କାମରେ ଯାଉଥିବା ବ୍ୟକ୍ତି ବିଶେଷ ରହିଥିଲେ । ଡଙ୍ଗା କର୍ମଚାରୀଙ୍କ ଏଭଳି ଦାୟିତ୍ୱହୀନତା ଏବଂ ପ୍ରଶାସନର ନିରବତାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ଚିଲିକା ଉନ୍ନୟନ କର୍ତ୍ତୃପକ୍ଷ (CDA) ଏବଂ ଜିଲ୍ଲା ପ୍ରଶାସନ ଏହି ଘଟଣାର ତୁରନ୍ତ ତଦନ୍ତ କରି ଦୋଷୀ କର୍ମଚାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବୀ ହୋଇଛି ।
