ଓଡ଼ିଶା ଲିଡ୍ସ(ବ୍ରହ୍ମଗିରି): ଚିଲିକା ହ୍ରଦ ମଧ୍ୟରେ ଥିବା କୃଷ୍ଣପ୍ରସାଦ ବ୍ଲକର ହରିପୁର ଗ୍ରାମବାସୀଙ୍କ ପାଇଁ ଡିଜିଟାଲ୍ ସେବା ଏବେ ଏକ ବଡ଼ ଦୁଃସ୍ୱପ୍ନ ପାଲଟିଛି । ରିଲାଏନ୍ସ ଜିଓ ପରି ପ୍ରତିଷ୍ଠିତ କମ୍ପାନୀର ନେଟୱର୍କ ସେବା ଏଠାରେ ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଛି । ଫଳରେ ହରିପୁରବାସୀ ବିଶେଷ କରି ଛାତ୍ରଛାତ୍ରୀମାନେ ନେଟୱର୍କ ଟିକେ ପାଇବା ବିଭିନ୍ନ ସ୍ଥାନକୁ ବିପଦପୂର୍ଣ୍ଣ ଭାବେ ଯିବାକୁ ବାଧ୍ୟ ହେଉଛନ୍ତି ।
ହରିପୁରର କୋମଳମତି ଛାତ୍ରଛାତ୍ରୀମାନେ ଅନ୍ଲାଇନ୍ ପାଠପଢ଼ା ଏବଂ ଗୁରୁତ୍ୱପୂର୍ଣ୍ଣ ଶିକ୍ଷା ସମ୍ବନ୍ଧୀୟ ତଥ୍ୟ ପାଇବା ପାଇଁ ଗ୍ରାମଠାରୁ ଦୂରରେ ଥିବା ଉଚ୍ଚା ବନ୍ଧ କିମ୍ବା ପାହାଡ଼ିଆ ସ୍ଥାନକୁ ଯାଇ ଘଣ୍ଟା ଘଣ୍ଟା ଧରି ବସି ରହୁଛନ୍ତି । ନେଟୱର୍କ ଅଭାବରୁ ସେମାନଙ୍କର ଶିକ୍ଷା ଗ୍ରହଣରେ ବଡ଼ ବାଧା ସୃଷ୍ଟି ହେଉଛି । ନେଟୱର୍କ ଖୋଜିବା ପାଇଁ ଛାତ୍ରଛାତ୍ରୀମାନେ ଅନେକ ସମୟରେ ବିପଦପୂର୍ଣ୍ଣ ଘର ଉପରେ ଚଢ଼ୁଛନ୍ତି କିମ୍ବା ନିଛାଟିଆ ସ୍ଥାନକୁ ଯାଉଛନ୍ତି, ଯେଉଁଠାରେ ବନ୍ୟଜନ୍ତୁ କିମ୍ବା ସରୀସୃପଙ୍କ ଭୟ ଲାଗି ରହିଥାଏ । ହରିପୁର ବାସିନ୍ଦା ଅଭିଯୋଗ କରିଛନ୍ତି ଯେ, ଜିଓ କମ୍ପାନୀ ପ୍ରତି ମାସରେ ମୋଟା ଅଙ୍କର ରିଚାର୍ଜ ଟଙ୍କା ନେଉଛି, କିନ୍ତୁ ଗ୍ରାମରେ ସେବା ପ୍ରଦାନ କରିବାରେ ସମ୍ପୂର୍ଣ୍ଣ ବିଫଳ ହୋଇଛି । ଆମେ ଡିଜିଟାଲ୍ ଇଣ୍ଡିଆ କଥା ଶୁଣୁଛୁ, କିନ୍ତୁ ହରିପୁରରେ ଆମ ପିଲାମାନଙ୍କୁ ପାଠ ପଢିବା ପାଇଁ ନେଟୱର୍କ ମିଳୁନାହିଁ ବୋଲି ଜଣେ ସ୍ଥାନୀୟ ଅଭିଭାବକ କ୍ଷୋଭର ସହ କହିଛନ୍ତି ।
ହରିପୁର ବାସିନ୍ଦାଙ୍କ ଏହି ସମସ୍ୟା ସମାଧାନ ପାଇଁ ସ୍ଥାନୀୟ ବୁଦ୍ଧିଜୀବୀ ଦାବି କରିଛନ୍ତି । ଚିଲିକା ଟାପୁ ଅଞ୍ଚଳରେ ତୁରନ୍ତ ଏକ ନୂତନ ଶକ୍ତିଶାଳୀ ମୋବାଇଲ୍ ଟାୱାର ସ୍ଥାପନ କରାଯିବାକୁ ଦାବି ହୋଇଛି ।
