ଗଣ ଦୌଡ଼ ଓ ଶପଥ ପାଠରେ ଛାତ୍ରଛାତ୍ରୀ ସାମିଲ
ଓଡ଼ିଶା ଲିଡ୍ସ(ଦଶରଥପୁର): ଲୌହ ମାନବ ସର୍ଦ୍ଦାର ବଲ୍ଳଭ ଭାଇ ପଟେଲଙ୍କ ଜନ୍ମ ଦିବସ ଉପଲକ୍ଷେ ସାରା ଦେଶରେ ପାଳିତ ହେଉଥିବା ରାଷ୍ଟ୍ରୀୟ ଏକତା ଦିବସ ଅବସରରେ ଦଶରଥପୁର ଥାନା ପକ୍ଷରୁ ଏକ ଗଣଦୌଡର ଆୟୋଜନ କରାଯାଇଥିଲା। ଦଶରଥପୁର ପିଏମଶ୍ରୀ ସରକାରୀ ହାଇସ୍କୁଲ ନିକଟରୁ ଆରମ୍ଭ ହୋଇଥିବା ଏହି ଗଣଦୌଡକୁ ଦଶରଥପୁର ଥାନାଧିକାରୀ ସୁବ୍ରତ କୁମାର ସାହୁ ପତାକା ଦେଖାଇ ଅନୁଷ୍ଠାନିକ ରୂପେ ଶୁଭାରମ୍ଭ କରିଥିଲେ। କାର୍ଯ୍ୟକ୍ରମରେ ବିଦ୍ୟାଳୟର ପ୍ରଧାନ ଶିକ୍ଷକ ରଜନୀକାନ୍ତ ମଲ୍ଲିକଙ୍କ ସମେତ ଶିକ୍ଷକ, ଶିକ୍ଷୟିତ୍ରୀ, ଶିକ୍ଷାବିତ ନାରାୟଣ ଚନ୍ଦ୍ର ସାହୁ, ପୂର୍ବତନ ସରପଞ୍ଚ ଲକ୍ଷ୍ମଣ ମଲ୍ଲିକ, ସମାଜସେବୀ ଧର୍ମାନନ୍ଦ ଧୀର, ସତ୍ୟ ରଞ୍ଜନ ଓଝା, ପଞ୍ଚାନନ ବେହେରା, ଭାବଗ୍ରାହୀ ପୁହାଣ ପ୍ରମୁଖ ଅତିଥିଭାବେ ଯୋଗ ଦେଇ ଜନନାୟକ ସର୍ଦ୍ଦାର ପଟେଲଙ୍କ ପଥ ଅନୁସରଣ କରି ଅଖଣ୍ଡ ଭାରତ ଓ ଏକତା ବଜାୟ ରଖିବା ପାଇଁ ଶପଥ ପାଠ କରିବା ସହ ଗଣଦୌଡରେ ସାମିଲ ହୋଇଥିବା ହାଇସ୍କୁଲ ଛାତ୍ରଛାତ୍ରୀଙ୍କୁ ଉତ୍ସାହିତ କରିଥିଲେ। ଗଣଦୌଡ଼ ଝୁମ୍ପୁରୀ ବଜାର ଅତିକ୍ରମ କରି କଁୟାଗୋଲା-କୁଆଖିଆ ୨୦ନଂ ଜାତୀୟ ରାଜପଥ ଅନ୍ତର୍ଗତ କଟିକଟା ପଞ୍ଚାୟତ ପଞ୍ଜରାସାହି ଛକରେ ପହଞ୍ଚିଥିଲା। ଦଶରଥପୁର ଥାନାର ଅନ୍ୟ କର୍ମଚାରୀ ମାନେ ଗଣଦୌଡ଼ ପରିଚାଳନା କରିଥିବା ବେଳେ ଅଂଶଗ୍ରହଣ କରିଥିବା ସମସ୍ତ ଛାତ୍ରଛାତ୍ରୀଙ୍କୁ ଓ ଥାନାର ଗୃହରକ୍ଷୀଙ୍କୁ ସାନ୍ତ୍ୱନାମୂଳକ ପୁରସ୍କାର ପ୍ରଦାନ କରାଯାଇଥିଲା।ପରେ ବିଦ୍ୟାଳୟ ପରିସରରେ ଆୟୋଜିତ କୁଇଜ ପ୍ରତିଯୋଗିତାର କୃତୀ ପ୍ରତିଯୋଗୀଙ୍କୁ ଟ୍ରଫି ଓ ମାନପତ୍ର ପ୍ରଦାନ କରାଯାଇଥିଲା। ଏହି ପରିପ୍ରେକ୍ଷୀରେ ଥାନା ସମ୍ମୁଖରେ ଅନୁଷ୍ଠିତ ସ୍ୱତନ୍ତ୍ର କାର୍ଯ୍ୟକ୍ରମରେ ଅଖଣ୍ଡ ଭାରତ ଓ ଏକତା ବଜାୟ ରଖିବା ପାଇଁ ଜନନାୟକ ତଥା ଲୌହ ମାନବ ସର୍ଦ୍ଦାର ପଟେଲଙ୍କ ପଥ ଅନୁସରଣ ନିମନ୍ତେ ଛାତ୍ରଛାତ୍ରୀ, ଅତିଥିଗଣଙ୍କ ସମେତ ଥାନାର ସମସ୍ତ କର୍ମଚାରୀ ଶପଥ ପାଠ ମଧ୍ୟ କରିଥିଲେ।
