ଓଡ଼ିଶା ଲିଡ୍ସ(ବ୍ୟୁରୋ): ଆଗାମୀ ରାଜ୍ୟସଭା ନିର୍ବାଚନ ପାଇଁ ବିଜେପି ତାର ଦୁଇଜଣ ପ୍ରାର୍ଥୀଙ୍କ ନାମ ଆଜି ଘୋଷଣା କରିଛି । ବିଜେପିର ପ୍ରଥମ ପସନ୍ଦ ଭାବେ ଦଳର ସଭାପତି ମନମୋହନ ସାମଲ ଓ ଦ୍ଵିତୀୟ ପ୍ରାର୍ଥୀ ଭାବେ ସୁଜିତ କୁମାରଙ୍କ ନାମ ଦଳ ଘୋଷଣା କରିଛି । ଉଭୟଙ୍କ ଜିତିବାରେ କୌଣସି ସମସ୍ୟା ନଥିଲା ବେଳେ ଦଳ କିନ୍ତୁ ଚତୁରତାର ସହିତ ରାଜ୍ୟସଭାର ଚତୁର୍ଥ ପ୍ରାର୍ଥୀଙ୍କ ନାମ ଘୋଷଣା ନକରି ସମସ୍ତଙ୍କୁ ଆଶଙ୍କାରେ ପକାଇ ଦେଇଥିଲା । ଦଳ କଣ ବିଜେଡିର ଦ୍ଵିତୀୟ ପ୍ରାର୍ଥୀ ଦତ୍ତେଶ୍ୱର ହୋତାଙ୍କୁ ସମର୍ଥନ ଦେବ କି ବୋଲି ଆଲୋଚନା ହେଉଥିଲା ବେଳେ ହଠାତ ପୂର୍ବତନ କେନ୍ଦ୍ରମନ୍ତ୍ରୀ ତଥା ବିଶିଷ୍ଠ ଶିଳ୍ପପତି ଦିଲ୍ଲୀପ ରାୟ ସେ ଆଗାମି ୫ ତାରିଖ ଦିନ ପ୍ରାର୍ଥୀପତ୍ର ଦାଖଲ କରୁଥିବା ପ୍ରକାଶ କରି ସମସ୍ତଙ୍କୁ ଚକିତ କରି ଦେଇଥିଲେ । ଏହାର କିଛି କ୍ଷଣ ପରେ ବିଜେପି ସଭାପତି ମନମୋହନ ସାମଲ ବିଜେପି ଦିଲ୍ଲୀପଙ୍କୁ ସମର୍ଥନ କରୁଥିବା ପ୍ରକାଶ କରିଛନ୍ତି । ଦିଲ୍ଲୀପ ରାୟ ସ୍ୱାଧୀନ ପ୍ରାର୍ଥୀ ଭାବେ ଅବତୀର୍ଣ୍ଣ ହେବାକୁ ଯାଉଥିବା ନେଇ ଆଜି ଘୋଷଣା କରିବା ପରେ ଏହା ବିଜେଡିର ଚିନ୍ତା ବଢ଼ାଇ ଦେଇଛି । ମନମୋହନ ସାମଲଙ୍କ ଦ୍ୱାରା ତାଙ୍କ ପ୍ରାର୍ଥୀତ୍ବକୁ ଦଳର ସମର୍ଥନ ଘୋଷଣା ରାଜ୍ୟ ରାଜନୀତିକୁ ଏବେ ବେଶ ରୋଚକ କରି ଦେଇଛି ।
ପୂର୍ବରୁ ବିଜେଡ଼ି “କମନ୍ କ୍ୟାଣ୍ଡିଡେଟ୍” ଭାବେ ଯେତେବେଳେ ଡାକ୍ତର ଦତ୍ତେଶ୍ୱର ହୋତାଙ୍କ ନାମ ଘୋଷଣା ପରେ କଂଗ୍ରେସ ତାଙ୍କ ପ୍ରାର୍ଥୀତ୍ୱକୁ ସମର୍ଥନ ଜଣାଇଥିଲା । ହେଲେ ଦଳ ମଧ୍ୟରେ ଏହାକୁ ନେଇ ମତଭେଦ ରହିଥିବା ଜଳ ଜଳ ହୋଇ ଦେଖା ଯାଉଛି । ଫଳରେ ଦିଲ୍ଲୀପ ରାୟଙ୍କ ପ୍ରାର୍ଥୀତ୍ବ ଡାକ୍ତର ହୋତାଙ୍କ ପାଇଁ ଏବେ ମହଙ୍ଗା ସାବ୍ୟସ୍ତ ହେବାକୁ ଯାଉଛି ! ଏଭଳି ସ୍ଥିତିରେ ଆବଶ୍ୟକ ୩୦ ସଂଖ୍ୟାର ଭୋଟ ନ ଥାଇ ମଧ୍ୟ ଦିଲ୍ଲୀପ ରାୟ ୨୦୦୨ ମସିହାରେ ସ୍ୱାଧୀନ ପ୍ରାର୍ଥୀ ହୋଇ ନବୀନ ପଟ୍ଟନାୟକଙ୍କୁ ଚକମା ଦେଇ ରାଜ୍ୟସଭାକୁ ନିର୍ବାଚିତ ହୋଇଥିଲେ ! ଏବେ ବିଜେପି ତାଙ୍କୁ ସମର୍ଥନ ଘୋଷଣା କରିଥିବା ବେଳେ ବିଜେଡ଼ିରୁ ଦୁଇ ନିଲମ୍ବିତ ବିଧାୟକଙ୍କ ସମେତ ବିଜେଡ଼ି ଓ କଂଗ୍ରେସ ମଧ୍ୟରେ ଚାଲିଥିବା ଅନ୍ତଃ କନ୍ଦଳରୁ ଦିଲ୍ଲୀପ ଫାଇଦା ଉଠାଇ ରାଜ୍ୟସଭାକୁ ନିର୍ବାଚିତ ହେବାରେ ତାଙ୍କ ପାଇଁ ହୁଏତ ଆଦୌ ସମସ୍ୟା ହେବ ନାହିଁ ବୋଲି ଚର୍ଚ୍ଚା ଆରମ୍ଭ ହୋଇଛି । ଚତୁର୍ଥ ପ୍ରାର୍ଥୀଙ୍କୁ ନେଇ ରାଜ୍ୟସଭା ନିର୍ବାଚନରେ ବ୍ୟାପକ ଘୋଡା ବେପାର ଆଶଙ୍କା ସୃଷ୍ଟି ହୋଇଥିଲା ବେଳେ ବିଜେଡି ଓ କଂଗ୍ରେସ କିଭଳି ନିଜ ବିଧାୟକ ମାନଙ୍କୁ ଧରି ରଖି ପାରିବ ତାହା ଏବେ ରାଜନୈତିକ ମହଲରେ ମୁଖ୍ୟ ଆଲୋଚ୍ୟ ବିଷୟ ହୋଇଛି ।
