ଓଡ଼ିଶା ଲିଡ୍ସ(ବ୍ରହ୍ମଗିରି)(ପିଙ୍କୁନ ଜେନା): ବ୍ରହ୍ମଗିରି ନିର୍ବାଚନ ମଣ୍ଡଳୀ କୃଷ୍ଣପ୍ରସାଦ ବ୍ଲକରେ ମଧ୍ୟ ରାତ୍ରିରେ ତାଣ୍ଡବ ରଚିଛି କାଳ ବୈଶାଖୀ । ମାଲୁଦରୁ କୃଷ୍ଣପ୍ରସାଦ ଏବଂ ମାଲୁଦରୁ ମୋରଡା ଦେଇ ଜହ୍ନିକୁଦା ଯାଏ ରାସ୍ତାରେ ବଡ ବଡ ଗଛ ଭାଙ୍ଗି ପଡିବା ଫଳରେ ଗତଗତରେ ବାଧା ସୃଷ୍ଟି ହୋଇଛି । ବ୍ଲକ ମୁଖ୍ୟ କାର୍ଯ୍ୟାଳୟରୁ ଜିଲ୍ଲା ମୁଖ୍ୟ କାର୍ଯ୍ୟାଳୟ ପୁରୀ ପର୍ଯ୍ୟନ୍ତ ଯାତାୟାତ ବିଶେଷ ଭାବେ ପ୍ରଭାବିତ ହୋଇଛି। ସେହିଭଳି ବାଲୁଗାଁ ଠାରୁ କୃଷ୍ଣପ୍ରସାଦ ଯାତାୟାତ କରୁଥିବା ଲଞ୍ଚ ବନ୍ଦ ହୋଇଥିବା ବେଳେ ସାତପଡ଼ା ଜହ୍ନିକୁଦାକୁ ଯାତାୟାତ କରୁଥିବା ଭସାପୋଲ ଚଳାଚଳକୁ ବନ୍ଦ କରାଯାଇଛି। ଯାହାଦ୍ୱାରା କୃଷ୍ଣପ୍ରସାଦ ଅଞ୍ଚଳବାସୀ ବାହ୍ୟଜଗତରୁ ବିଚ୍ଛିନ୍ନ ହୋଇଛନ୍ତି । ସେହିଭଳି କୃଷ୍ଣପ୍ରସାଦ ବ୍ଲକ ବୁଦ୍ଧିବର ଗ୍ରାମ ପଞ୍ଚାୟତ ପ୍ରଧାନଗାଁରେ ଏକ ବିରାଟକାୟ ବର ଗଛ ଉପୁଡି ପଡିବାରୁ ଗୋଟିଏ ଛାତ ଘର, ଚାଳ ଛପର ଘର, ଗୋଟିଏ କ୍ୟାଭିନ ଭାଙ୍ଗି ପଡିଛି।
ବଜ୍ରପାତ ଯୋଗୁ ପ୍ରଧାନଗାଁର ଗୋଟିଏ ଛାତ ଘର କାନ୍ଥ ମଧ୍ୟ ଭାଙ୍ଗି ଯାଇଥିବା ଜଣାଯାଇଛି। ଖବରପାଇ କୃଷ୍ଣପ୍ରସାଦ ଥାନା ଅଧିକାରୀ ବିଚିତ୍ରାନନ୍ଦ ପ୍ରଧାନ ଘଟଣାସ୍ଥଳରେ ପହଞ୍ଚି ଅଗ୍ନିଶମ ବିଭାଗକୁ ଖବର ଦେଇଥିଲେ। ଖବରପାଇ ମାଲୁଦ ଅଗ୍ନିଶମ ବିଭାଗ ମୁଖ୍ୟ ଅଗ୍ନିକ ଦିବ୍ୟ ସୁନ୍ଦର କୁଅଁରଙ୍କ ସହିତ ଅନ୍ୟ କର୍ମଚାରୀ ଘଟଣାସ୍ଥଳରେ ପହଞ୍ଚି ଗଛ କାଟି ରାସ୍ତା ଘାଟ ସଫା କରିଥିଲେ। ଗଛ ପଡି ପ୍ରଧାନ ଗାଁର ବଂଶୀଧର ପ୍ରଧାନ, ପ୍ରଭାତ କୁମାର ପ୍ରଧାନ, ମେଘନାଦ ପ୍ରଧାନ, ଆରତ ପ୍ରଧାନ ବିପିନ ପ୍ରଧାନଙ୍କ ଘର ଭାଙ୍ଗି ଥିବା ଜଣାଯାଇଛି। କ୍ଷତିଗ୍ରସ୍ତ ପରିବାର ପକ୍ଷରୁ ସରକାରୀ କ୍ଷତିପୂରଣ ଦାବି ହୋଇଛି ।
