ଓଡ଼ିଶା ଲିଡ୍ସ(ବ୍ୟୁରୋ): ଦିନକୁ ଦିନ ରାଜଧାନୀ ଭୁବନେଶ୍ୱରର ଆଇନ କାନୁନ ବ୍ୟବସ୍ଥା ବିଗିଡି ଯାଉଛି । କଥା କଥାକେ ଖଣ୍ଡା ଓ କଟୁରୀ ବୁଲୁଛି । ଅପରାଧୀ ଆକ୍ରମଣ କରି ଲହୁ ଲୁହାଣ କରୁଥିଲା ବେଳେ ମହିଳା ବି ବର୍ତ୍ତୁ ନାହାନ୍ତି । ଆଜି ସନ୍ଧ୍ୟାରେ ପୁଲିସ ପାଖକୁ କାହିଁକି ଗଲୁ ବୋଲି କହି ଦୁର୍ବୁତ୍ତ ଜଣେ ମହିଳା ବ୍ୟବସାୟୀଙ୍କୁ ଦୋକାନକୁ ଆସୁଥିବା ବେଳେ ଏକ ଧାରୁଆ କଟୁରୀରେ ମରଣାନ୍ତକ ଆକ୍ରମଣ କରି ଲହୁ ଲୁହାଣ କରିଛି । ରାଜଧାନୀର ଛାତି ଉପରେ ଏହି ଭଳି ଗୁଣ୍ଡାରାଜ ସଂଖ୍ୟା ଦିନକୁ ଦିନ ବଢି ଚାଲିଛି । ଏହି ଘଟଣା ଘଟିଛି ସହିଦ ନଗର ଥାନା ଅନ୍ତର୍ଗତ ସତସଙ୍ଗ ବିହାର ଅଞ୍ଚଳରେ ।
ସୂଚନା ଅନୁଯାୟୀ, ସହିଦ ନଗର ତାରିଣୀ ବସ୍ତିର କନକଲତା ସାହୁ ନାମ୍ନୀ ମହିଳା ସତସଙ୍ଗ ବିହାର ପାର୍କ ନିକଟରେ ଏକ ମକା ଦୋକାନ କରି ପରିବାର ଚଳାନ୍ତି । ଗତକାଲି ତାଙ୍କ ପାଖରୁ ମୋବାଇଲ୍ ଏବଂ ଟଙ୍କା ଚୋରି ହୋଇଥିଲା । ଏନେଇ ସେ ସହିଦ ନଗର ଥାନାରେ ଲିଖିତ ଅଭିଯୋଗ କରିଥିଲେ । କିନ୍ତୁ ଥାନାରେ ଏହି ଅଭିଯୋଗ ତାଙ୍କ ପାଇଁ କାଳ ହୋଇଛି । ପୁଲିସ ପାଖକୁ କାହିଁକି ଗଲୁ ବୋଲି କହି ଦୁର୍ବୁତ୍ତ ଜଣକ ଆଜି ସନ୍ଧ୍ୟାରେ କନକଲତା ଦୋକାନକୁ ଆସୁଥିବା ବେଳେ ଏକ ଧାରୁଆ କଟୁରୀରେ ତାଙ୍କୁ ମରଣାନ୍ତକ ଆକ୍ରମଣ କରିଛି ।
ତାଙ୍କୁ ତୁରନ୍ତ ଉଦ୍ଧାର କରାଯାଇ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି । ଘଟଣାସ୍ଥଳରେ ସହିଦ ନଗର ଥାନା ପୋଲିସ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି । ତେବେ ଜନଗହଳିପୂର୍ଣ୍ଣ ସ୍ଥାନରେ ଜଣେ ମହିଳାଙ୍କୁ ଏଭଳି ମରଣାତ୍ମକ ଆକ୍ରମଣ କରିବା ଘଟଣା ସ୍ଥାନୀୟ ଅଞ୍ଚଳରେ ଭୟର ବାତାବରଣ ଖେଳାଇ ଦେଇଛି। ଏହି ଘଟଣା ଖୋଦ ରାଜଧାନୀର ଆଇନ କାନୁନ ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି କରିଛି ।
