ବିଜେପିରୁ ମନମୋହନ, ସୁଜିତ ବିଜୟୀ
ବିଜେଡିରୁ ସଂତୃପ୍ତ ବିଜୟୀ
ଚତୁର୍ଥ ପ୍ରାର୍ଥୀ ଭାବେ ଦିଲ୍ଲୀପ ବିଜୟୀ
ବିଜେଡିରୁ ୮ ବିଧାୟକଙ୍କ କ୍ରସ ଭୋଟିଂ
କଂଗ୍ରେସରୁ ୩ ବିଧାୟକଙ୍କ କ୍ରସ ଭୋଟିଂ
ଚକମା ଦେଉଥିବା ନବୀନଙ୍କୁ ଚକମା ଦେଲେ ବିଜେଡି ବିଧାୟକ
ଓଡ଼ିଶା ଲିଡ୍ସ(ବ୍ୟୁରୋ): ସରିଛି ରାଜ୍ୟର ସର୍ବାଧିକ ଚର୍ଚ୍ଚିତ ରାଜ୍ୟସଭା ନିର୍ବାଚନ । ଭୋଟ ଗଣତି ପରେ ନିର୍ବାଚିତ ସଦସ୍ୟ ମାନଙ୍କ ନାମ ଘୋଷଣା ହୋଇଛି । ବିଜେପିର ମନମୋହନ ସାମଲ ଓ ସୁଜିତ କୁମାର ବିଜୟୀ ହୋଇଥିଲା ବେଳେ ବିଜେଡି ପ୍ରାର୍ଥୀ ସଂତୃପ୍ତ ମିଶ୍ର ବିଜୟୀ ହୋଇଛନ୍ତି । ହେଲେ ଚତୁର୍ଥ ପ୍ରାର୍ଥୀ ଭାବେ ଅନୁଭବୀ ତଥା ବରିଷ୍ଠ ନେତା ଦିଲ୍ଲୀପ ରାୟ ବିଜୟୀ ହେବା ସବୁ ଠାରୁ ଅଧିକ ଚର୍ଚ୍ଚା ସୃଷ୍ଟି କରିଛି । ବିଜେଡି ଓ କଂଗ୍ରେସ ସମର୍ଥନରେ ପ୍ରାର୍ଥୀ ହୋଇ ବିଜୟର ସ୍ୱପ୍ନ ଦେଖୁଥିବା ଡାକ୍ତର ଦତ୍ତେଶ୍ୱର ହୋତାଙ୍କୁ ପରାଜିତ କରିଛନ୍ତି ଅନୁଭବୀ ଦିଲ୍ଲୀପ ରାୟ । ବିଜେଡି ଓ କଂଗ୍ରେସ ଦଳରେ ଘଳିଆ ପକାଇ ଦିଲ୍ଲୀପ ଉଭୟ ଦଳରୁ ୧୧ ବିଧାୟକଙ୍କ ଭୋଟ ନିଜ ସପକ୍ଷକୁ ଆଣିବାରେ ସକ୍ଷମ ହୋଇଛନ୍ତି । ରାଜ୍ୟ ଇତିହାସରେ ସର୍ବାଧିକ ୧୧ ଜଣ ବିଧାୟକ କ୍ରସ ଭୋଟିଂ କରିବା ମଧ୍ୟ ଚର୍ଚ୍ଚାର ବିଷୟ ହୋଇଛି ।
ଅନ୍ୟପକ୍ଷରେ ବିଜେଡିର ୮ ଜଣ ବିଧାୟକ କ୍ରସ ଭୋଟିଂ କରିଥିବା ବିଜେଡି ସ୍ୱୀକାର କରିଛି । ଦଳ ପକ୍ଷରୁ ବିଧାୟକ ପ୍ରତାପ ଦେବ ଏହି ସୂଚନା ଦେଇଛନ୍ତି । ଦଳ ମଧ୍ୟରେ ଦିନକୁ ଦିନ ଅସନ୍ତୋଷ ଯେ ତୀବ୍ର ହେଉଛି ଆଜିର ଭୋଟ ତାହା ପ୍ରମାଣିତ କରୁଛି । ନିଜ ରାଜନୈତିକ ଜୀବନରେ ଅନ୍ୟ ମାନଙ୍କୁ ଚକମା ଦେଉଥିବା ନବୀନ ପଟ୍ଟନାୟକଙ୍କୁ ତାଙ୍କ ବିଧାୟକ ମାନେ ଚକମା ଦେବା ରାଜ୍ୟବାସୀଙ୍କୁ ଚକିତ କରିଛି । କଂଗ୍ରେସ ଦଳରେ ମଧ୍ୟ ଅସନ୍ତୋଷ ରହିଥିବା ମଧ୍ୟ ପ୍ରମାଣିତ ହୋଇଛି । ଦଳର ତିନିଜଣ ବିଧାୟକ କ୍ରସ ଭୋଟିଂ କରିବା ଏହାକୁ ମଧ୍ୟ ପ୍ରମାଣିତ କରୁଛି ।
