ଭକ୍ତଙ୍କ ଭାବାବେଗ ସହିତ ଖେଳ ଖେଳିଲେ ଦଇତାପତି ! ରାଜ୍ୟ ବ୍ୟାପି ପ୍ରତିକ୍ରିୟା, ସରକାରଙ୍କ ତଦନ୍ତ ନିର୍ଦ୍ଦେଶ

ଓଡିଶା ଲିଡ୍ସ(ବ୍ୟୁରୋ): ପ୍ରତି ଓଡ଼ିଆଙ୍କ ପରିଚୟ ମହାପ୍ରଭୁ ଶ୍ରୀଜଗନ୍ନାଥ । ଶ୍ରଦ୍ଧାଳୁଙ୍କ ଭାବାବେଗ ଜଡିତ କାଳିଆ ଠାକୁରଙ୍କ ସହିତ । ହେଲେ ଦଇତାପତି ରାମକୃଷ୍ଣ ଦାସ ମହାପାତ୍ର କୋଟି କୋଟି ଭକ୍ତଙ୍କ ଭାବାବେଗ ସହିତ ଖେଳ ଖେଳିଥିବାର ଅଭିଯୋଗ ହୋଇଛି । ଯାହାକୁ ନେଇ ସାରା ରାଜ୍ୟରେ ତୀବ୍ର ପ୍ରତିକ୍ରିୟା ସୃଷ୍ଟି ହୋଇଛି । ପ୍ରତିକ୍ରିୟା ବଢିବା ପରେ ସରକାର ଏହାର ତଦନ୍ତ ନିର୍ଦ୍ଦେଶ ଦେଇଛନ୍ତି । ପଶ୍ଚିମ ବଙ୍ଗର ଦୀଘା ଠାରେ ପଶ୍ଚିମ ବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଉଦ୍ୟମରେ ବିଶାଳ ଜଗନ୍ନାଥ ମନ୍ଦିର ନିର୍ମାଣ ହୋଇଛି । ମନ୍ଦିର ପ୍ରତିଷ୍ଠା ଉତ୍ସବକୁ ଯାଇଥିଲେ ବରିଷ୍ଠ ଦଇତାପତି ରାମକୃଷ୍ଣ ଦାସ ମହାପାତ୍ର । କାର୍ଯ୍ୟକ୍ରମରେ ଉପସ୍ଥିତ ରହିବା ପରେ ଏକ ଚ୍ୟାନେଲକୁ ସାକ୍ଷାତକାରରେ ସେ କହିଥିଲେ ନବକଳେବର ଦାରୁ ଯାହା ଶ୍ରୀମନ୍ଦିର ଭିତରେ ରହିଥାଏ ମୁଁ ସେଇ ଦାରୁରେ ବିଗ୍ରହ ତିଆରି କରି ଏଠାକୁ ଆଣିଛି । ଏହି କେଇପଦ କଥା କୋଟି କୋଟି ଓଡ଼ିଆ ଜଗନ୍ନାଥ ଭକ୍ତଙ୍କୁ ବେଶ ଆଘାତ ଦେଇଛି । ଭକ୍ତଙ୍କ ମଧ୍ୟରେ ସେବାୟତ ରାମକୃଷ୍ଣ ଦାସ ମହାପାତ୍ର ସୀମା ଟପିଛନ୍ତି ବୋଲି ପ୍ରତିକ୍ରିୟା ସୃଷ୍ଟି ହୋଇ ତୀବ୍ର ହେଉଛି । ଦୀଘାରେ ନିର୍ମାଣ ହୋଇଥିବା ଜଗନ୍ନାଥ ମନ୍ଦିରରେ ପଥର ମୂର୍ତ୍ତି ନିର୍ମାଣ ହୋଇଥିଲା । ପଥର ମୂର୍ତ୍ତିରେ ପ୍ରାଣ ପ୍ରତିଷ୍ଠା ହୁଏ ନାହିଁ ବୋଲି କହି ସେଠାକୁ ନିମନ୍ତ୍ରିତ ହୋଇଥିବା ରାମକୃଷ୍ଣ ଦାସ ମହାପାତ୍ର ଦାରୁ ବିଗ୍ରହ ନେଇ ଯାଇଥିଲେ । ଆଉ ଯେଉଁ ଦାରୁରେ ବିଗ୍ରହ ନିର୍ମାଣ ହୋଇଥିଲା ତାହା ଶ୍ରୀ ମନ୍ଦିରରେ ଥିବା ଦାରୁରେ ନିର୍ମାଣ ହୋଇଥିବା ଅଭିଯୋଗ ହୋଇଛି । ନବ କଳେବର ସମୟରେ ବିଗ୍ରହ ନିର୍ମାଣ ପାଇଁ ଆସିଥିବା ଦାରୁରେ ବିଗ୍ରହ ନିର୍ମାଣ ହୁଏ । ବିଗ୍ରହ ନିର୍ମାଣ ପରେ ବଳକା ଦାରୁ ମନ୍ଦିରରେ ସୁରକ୍ଷିତ ରଖାଯାଏ । କାରଣ ଯଦି କୌଣସି କାରଣରୁ ଶ୍ରୀ ଅଙ୍ଗରେ କିଛି ତ୍ରୁଟି ଦେଖାଯାଏ ତେବେ ଏହି ଗଚ୍ଛିତ ଦାରୁ ବ୍ୟବହାର ହୁଏ । ହେଲେ ଏହି ଦାରୁରେ ପ୍ରତିମା ନିର୍ମାଣ କରି ଶ୍ରୀ ଦାସ ମହାପାତ୍ର ଦୀଘା ନେଇଥିବା ଅଭିଯୋଗ ହୋଇଛି । ଚ୍ୟାନେଲରେ ପ୍ରତିକ୍ରିୟା ଦେଇ ବିବାଦରେ ଛନ୍ଦି ହେବା ପରେ ଏବେ ଏହାକୁ ଖଣ୍ଡନ କରୁଛନ୍ତି ଦଇତା ପତି ଶ୍ରୀ ଦାସ ମହାପାତ୍ର । ଖବର ଜଣା ପଡିବା ପରେ ରାଜ୍ୟରେ ତୀଵ୍ର ପ୍ରତିକ୍ରିୟା ପ୍ରକାଶ ପାଇଛି । ଏହାକୁ ନେଇ ସରକାର କଡା ଆଭିମୁଖ୍ୟ ଦେଖାଇଛନ୍ତି। ତଦନ୍ତ ପାଇଁ ଶ୍ରୀମନ୍ଦିର ପ୍ରଶାସନକୁ ନିର୍ଦ୍ଦେଶ ଦେବା ସହିତ ଦୋଷୀ ସାବ୍ୟସ୍ତ ହେଲେ ଦଣ୍ଡ ବିଧାନ କରାଯିବ ବୋଲି ମଧ୍ୟ ଚେତାବନୀ ଦେଇଛନ୍ତି । ପଶ୍ଚିମ ବଙ୍ଗରେ ବହୁ ଜଗନ୍ନାଥ ଭକ୍ତ ରହିଥିଲା ବେଳେ ବର୍ଷ ତମାମ ପର୍ଯ୍ୟଟକ ଭାବେ ପୁରୀ ଆସନ୍ତି । ଯାହା ପୁରୀ ଶ୍ରୀମନ୍ଦିର ସହିତ ପୁରୀର ଆର୍ଥିକ ବିକାଶ କରେ । ରାଜ୍ୟବାସୀଙ୍କ ଅଭିଯୋଗ ଅନୁଯାୟୀ ଏହି ପର୍ଯ୍ୟଟକ ମାନଙ୍କୁ ଅଟକାଇବା ପାଇଁ ସମୁଦ୍ର ଥିବା ଦୀଘାରେ ମମତା ଜଗନ୍ନାଥଙ୍କ ମନ୍ଦିର ନିର୍ମାଣ କରିଛନ୍ତି । ଏହା ରାଜ୍ୟ ବିରୋଧରେ ଏକ ଷଡ଼ଯନ୍ତ୍ର । ଆଉ ଏହି ଷଡ଼ଯନ୍ତ୍ରରେ ସାମିଲ ହୋଇ ଯାଇଛନ୍ତି ବରିଷ୍ଠ ଦଇତାପତି । ଅନ୍ୟ ପକ୍ଷରେ ପ୍ରଶ୍ନ ଉଠିଛି ଯଦି ଶ୍ରୀ ଦାସ ମହାପାତ୍ର ଦାରୁ ନେଇ ବିଗ୍ରହ ପ୍ରତିଷ୍ଠା କରିଥିଲେ ତେବେ ସେ ଶ୍ରୀମନ୍ଦିର ମୁଖ୍ୟ ପ୍ରଶାସକ, ଗଜପତି ମହାରାଜ ଓ ପୁରୀ ଶଙ୍କରାଚାର୍ଯ୍ୟଙ୍କ ଅନୁମତି ନେଇ ଥିଲେ କି ? ଆଜି ଶ୍ରୀମନ୍ଦିର ପରିଚାଳନା କମିଟି ପକ୍ଷରୁ ଏକ ଗୁରୁତ୍ୱପୂର୍ଣ୍ଣ ବୈଠକ ବସୁଥିଲା ବେଳେ ଏ ବିଷୟରେ ଆଲୋଚନା ହେବ ବୋଲି ସୂଚନା ମିଳିଛି ।