ଓଡ଼ିଶା ଲିଡ୍ସ(ବ୍ୟୁରୋ): ଆୟର୍ଲାଣ୍ଡ ଗସ୍ତରେ ଥିବା ଭାରତୀୟ ଦଳ ପ୍ରଥମ ଟ୍ବେଣ୍ଟି-୨୦ ଶୁକ୍ରବାର ବେଲଫାଷ୍ଟ୍ଠାରେ ଖେଳିବ। ଏହି ମ୍ୟାଚକୁ ନେଇ ସାରା ବିଶ୍ୱରେ ଚର୍ଚ୍ଚା ଆରମ୍ଭ ହୋଇଛି । ଏହି ମ୍ୟାଚ୍ରେ ଭାରତୀୟ କ୍ରିକେଟ୍ର ବିସ୍ମୟ ବାଳକ ବୈଭବ ସୂର୍ଯ୍ୟବଂଶୀ ପଦାର୍ପଣ କରିବାର ସମ୍ଭାବନା ରହିଛି । ଯଦି ବୈଭବ ଆୟର୍ଲାଣ୍ଡ ବିପକ୍ଷରେ ଖେଳିବାର ସୁଯୋଗ ପାଆନ୍ତି ତେବେ ସେ ଭାରତର କିମ୍ବଦନ୍ତୀ କ୍ରିକେଟର ସଚିନ ତେନ୍ଦୁଲକରଙ୍କ ରେକର୍ଡ ଭାଙ୍ଗିବାରେ ସକ୍ଷମ ହେବେ । ନିକଟରେ ଶ୍ରେୟସ ଆୟର ଭାରତୀୟ ଟ୍ବେଣ୍ଟି-୨୦ ଦଳର ଅଧିନାୟକ ନିଯୁକ୍ତ ହୋଇଛନ୍ତି । ଶ୍ରେୟସ୍ ଆୟରଙ୍କ ନେତୃତ୍ବରେ ଏହା ହେବ ଭାରତର ପ୍ରଥମ ଶୃଙ୍ଖଳା। ଆୟର୍ଲାଣ୍ଡ ମଧ୍ୟ ତା’ର ନବ ନିଯୁକ୍ତ ଅଧିନାୟକ ଲୋର୍କାନ ଟକର୍ଙ୍କ ନେତୃତ୍ବରେ ପ୍ରଥମ ଥର ପାଇଁ ମ୍ୟାଚ ଖେଳିବ। ଭାରତୀୟ ଦଳ ବେଲ୍ଫାଷ୍ଟରେ ପୂର୍ବରୁ ଦିନିକିଆ ମ୍ୟାଚ୍ ଖେଳିଥିବାବେଳେ ଏଥର ପ୍ରଥମ ଥର ପାଇଁ ଟ୍ବେଣ୍ଟି-୨୦ ମ୍ୟାଚ ଖେଳିବାକୁ ଯାଉଛି। ଆଇପିଏଲରେ ବୈଭବଙ୍କ ସଫଳତା ଓ ପରେ ଲିଷ୍ଟ ଏ ମ୍ୟାଚରେ ସଫଳତା ପରେ ସାରା ବିଶ୍ୱର କ୍ରିକେଟ ପ୍ରେମୀଙ୍କ ନଜର ଏବେ ତାଙ୍କ ଉପରେ କେନ୍ଦ୍ରୀଭୂତ ହୋଇଛି । ଆଇପିଏଲ ସଫଳତା ପରେ ତାଙ୍କୁ ଭାରତୀୟ ସିନିୟର ଦଳରେ ସାମିଲ କରାଯାଇଛି । ଆଜି ମ୍ୟାଚ ଖେଳିବାର ସୁଯୋଗ ମିଳିଲେ ସେ ବିଶ୍ୱର ସବୁ ଠାରୁ କମ ବର୍ଷରେ ଆନ୍ତର୍ଜାତିକ କ୍ରିକେଟ ଖେଳାଳି ହେବାର ଗୌରବ ଅର୍ଜନ କରିବେ ।
orissaleads@admin
June 26, 2026
