ଜିଲ୍ଲା ମହୋତ୍ସବ ମଞ୍ଚ ଅସୁରକ୍ଷିତ
ଗୁଇନ୍ଦା ବିଭାଗ ପାରିବା ପଣିଆ ନେଇ ପ୍ରଶ୍ନବାଚୀ
ଅଘଟଣ ଘଟିଥିଲେ ଦାୟୀ ହୋଇଥାନ୍ତା କିଏ
ସରକାରଙ୍କ ପଦକ୍ଷେପକୁ ଅପେକ୍ଷା
ଓଡ଼ିଶା ଲିଡ୍ସ(ବ୍ୟୁରୋ): ଗତ କାଲି ଥିଲା ଯାଜପୁର ଜିଲ୍ଲା ମହୋତ୍ସବର ଚତୁର୍ଥ ସନ୍ଧ୍ୟା । ଲଗାତାର ଦୁଇ ସଂଧ୍ୟାରେ ନିମନ୍ତ୍ରିତ ଅତିଥି ଆସିନଥିଲା ବେଳେ ଗତକାଲି ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ କିନ୍ତୁ ଆସିଥିଲେ । ଆଇନମନ୍ତ୍ରୀ ଆସୁଥିବାରୁ ସୁରକ୍ଷା ବ୍ୟବସ୍ଥା କଡା କଡ଼ି କରାଯାଇଥିଲା ମହୋତ୍ସବ ସ୍ଥଳରେ । ବିଶେଷ କରି ମଞ୍ଚ ନିକଟରେ ସୁରକ୍ଷା ବ୍ୟବସ୍ଥା ଅଧିକ କଡା କଡ଼ି କରାଯାଇଥିଲା । ପୋଲିସ ବିଭାଗର ସୁରକ୍ଷା ବଳୟକୁ ଭେଦ କରି ନବ ନିର୍ମାଣ କୃଷକ ସଂଗଠନର ସଦସ୍ୟ ମାନେ ବାହୁଙ୍ଗି, ଅଖା, ଗୋଉଣି, ପ୍ଲାକାର୍ଡ ଧରି ମଞ୍ଚ ଉପରକୁ ଯାଇ ନାରାବାଜି କରିଥିଲେ । ଆମ ଧାନ କିଏ ନବ ବୋଲି ଡାକ ପକାଇଥିଲେ । ଯଦି ଧାନ ନେଉନାହଁ ମହୋତ୍ସବ ବନ୍ଦ କର ବୋଲି ଚିତ୍କାର କରିଥିଲେ । ଏହି ଘଟଣା ସମସ୍ତଙ୍କୁ ଚକିତ କରିଥିଲା ବେଳେ ଆୟୋଜକ ମାନଙ୍କୁ ସ୍ତବ୍ଧ କରି ଦେଇଥିଲା ।
ଧାନ ବିକ୍ରିକୁ ନେଇ ଚାଷୀଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ସୃଷ୍ଟି ହୋଇଥିଲା ବେଳେ ମହୋତ୍ସବ ପୂର୍ବରୁ ନବ ନିର୍ମାଣ କୃଷକ ସଙ୍ଗଠନ ଏ ନେଇ ଚେତାବନୀ ଦେଇଥିଲା । ହେଲେ ଯେଉଁ ମଞ୍ଚକୁ ଆଇନମନ୍ତ୍ରୀ ଆସୁଛନ୍ତି ସେଠାକୁ ଚାଷୀ ଚଢିଯିବା ଓ ନାରାବାଜି କରିବା କିଭଳି ସମ୍ଭବ ହେଲା ତାହା ପୋଲିସର କାର୍ଯ୍ୟ ଦକ୍ଷତା ନେଇ ପ୍ରଶ୍ନବାଚୀ ସୃଷ୍ଟି କରିବା ସ୍ୱାଭାବିକ । ସେମାନେ ସେଠାରେ କିଭଳି ପହଞ୍ଚିଲେ, ମଞ୍ଚ ଉପରକୁ କିଭଳି ଚଢ଼ିଲେ ଏହା କିଭଳି ଗୁଇନ୍ଦା ବିଭାଗ ଜାଣି ପାରିଲା ନାହିଁ ତାହା ଗୁଇନ୍ଦା ବିଭାଗ ପାରିବା ପଣିଆ ଉପରେ ଆଙ୍ଗୁଳି ନିର୍ଦ୍ଦେଶ କରିବାକୁ ଯଥେଷ୍ଟ ହୋଇଛି । ଯଦି ମଞ୍ଚ ଉପରେ କୃଷକ ମାନେ ଅତିଥି ମାନଙ୍କୁ ଆକ୍ରମଣ କରିଥାଆନ୍ତେ କିମ୍ବା ଅନ୍ୟ କୌଣସି ଅପ୍ରୀତିକର ଘଟଣା ଘଟି ଥାଆନ୍ତା ତେବେ କିଏ ଦାୟୀ ରହି ଥାଆନ୍ତା ବିଲି ମଧ୍ୟ ମତ ପ୍ରକାଶ ପାଇଛି । ଜିଲ୍ଲା ଗୁଇନ୍ଦା ବିଭାଗ ଯଦି ଯଯାତି ମହୋତ୍ସବ ମଞ୍ଚର ସୁରକ୍ଷାକୁ ନିଶ୍ଚିତ କରି ପାରୁ ନାହିଁ ତେବେ ଜିଲ୍ଲାର ସୁରକ୍ଷା ବ୍ୟବସ୍ଥା କେତେ ଦୁର୍ବଳ ତାହା ଗତକାଲି ପ୍ରମାଣିତ ହୋଇଛି । ରାଜ୍ୟ ସରକାରଙ୍କ ଗୃହ ବିଭାଗ ଏ ନେଇ କି ପଦକ୍ଷେପ ନେଉଛି ତାକୁ ଅପେକ୍ଷା ।
