ଓଡ଼ିଶା ଲିଡ୍ସ(ବ୍ୟୁରୋ): ଗତ ୨୦୨୪ ନିର୍ବାଚନରେ ଦଳ ପରାଜିତ ହେବା, ନୂଆପଡା ଉପନିର୍ବାଚନରେ ଦଳ ପରାଜିତ ହେବା ସହିତ ତୃତୀୟ ସ୍ଥାନକୁ ଖସି ଆସିବା, କଂଗ୍ରେସକୁ ବିରୋଧ କରି ଦଳ ଗଢ଼ା ଯାଇଥିଲେ ମଧ୍ୟ ରାଜ୍ୟସଭା ନିର୍ବାଚନରେ କଂଗ୍ରେସ ସହିତ ହାତ ମିଳାଇବା ଓ ମିଳିତ ପ୍ରାର୍ଥୀ ପରାଜିତ ହେବା ୨୪ ବର୍ଷର ରାଜ୍ୟ ଶାସନ କରିଥିବା ବିଜେଡିକୁ ଅସମ୍ଭବ ଚାପରେ ପକାଇ ସାରିଛି । ପୂର୍ବରୁ ବିଜେଡିରେ ତୁଣ୍ଡ ଖୋଲିଲେ ମୁଣ୍ଡ ଗଡୁଥିଲା । ଏବେ ସମୟ ବଦଳି ଯାଇଛି ଦଳର ନେତା ଓ କର୍ମୀ ସିଧା ଦଳ ସଭାପତି ନବୀନ ପଟ୍ଟନାୟକ, ଭି.କେ.ପାଣ୍ଡିଆନଙ୍କ ଠାରୁ ନେଇ ଅନ୍ୟମାନଙ୍କ ବିରୁଦ୍ଧରେ ବିଶୋଦ୍ଗାର କରିବାକୁ ସାମାନ୍ୟ ସଙ୍କୋଚ କରୁନାହାନ୍ତି । କ୍ଷମତା ଯାଇଥିଲା ବେଳେ ଦଳୀୟ ସଙ୍ଗଠନକୁ କିଭଳି ମଜବୁତ କରାଯିବ, ସରକାରଙ୍କ ଭୁଲ ପଦକ୍ଷେପ ବିରୁଦ୍ଧରେ କିଭଳି ସ୍ୱର ଉତ୍ତୋଳନ କରାଯିବ ସେ ନେଇ ଦଳ ଚିନ୍ତା କରିବା ପରିବର୍ତ୍ତେ ଦଳୀୟ ନେତାଙ୍କୁ ନିଲମ୍ବିତ କରି ଚାଲିଛନ୍ତି । ନିଲମ୍ବିତ ନେତାଙ୍କ ବିରୁଦ୍ଧରେ ମଧ୍ୟ ଅନ୍ୟ ଗୋଷ୍ଠୀକୁ ଲଗାଇ ପ୍ରତିବାଦ, କୁଶପୁତ୍ତଳିକା ଦାହ ଭଳି ପଦକ୍ଷେପ ନେଉଛି ଦଳ । ହେଲେ ଯେଉଁ ବିନ୍ଦୁକୁ ନେଇ ନେତା ଓ କର୍ମୀ ସ୍ୱର ଉତ୍ତୋଲନ କରୁଛନ୍ତି ସେ ବିଷୟରେ ମୁହଁ ଖୋଲୁ ନାହାନ୍ତି କି ସ୍ପଷ୍ଟୀକରଣ ଦେଉ ନାହାନ୍ତି । ଯାହା ଦଳର ନେତା ଓ କର୍ମୀଙ୍କୁ କ୍ଷୁବ୍ଧ କରୁଛି । ଦଳରୁ ନିକଟରେ ନିଲମ୍ବିତ ବିଧାୟକ ଓ ବିଧାୟିକା ମାନେ ନିଲମ୍ବନ ହେଲା ପରେ ଅଧିକ ପ୍ରତିକ୍ରିୟା ଶୀଳ ହୋଇ ପଡିଛନ୍ତି । ଚୌଦ୍ୱାର-କଟକ ବିଧାୟକ ସୌଭିକ ବିଶ୍ୱାଳ କହିଛନ୍ତି ମୋତେ ବହିଷ୍କାର କରିଥିଲେ ଖୁସି ହୋଇ ଥାଆନ୍ତି । ଯାହା ଦୁଇଟି ଦିଗକୁ ଇଙ୍ଗିତ କରୁଛି ପ୍ରଥମତ ସୌଭିକ ବିଜେଡିର ଭବିଷ୍ୟତ ଅନ୍ଧାର ବୋଲି ଆକଳନ କରି ସାରିଲେଣି ଦ୍ଵିତୀୟତ ସେ ଆଉ କେବେ ବିଜେଡିକୁ ଫେରିବେ ନାହିଁ ବୋଲି ନିଷ୍ପତି ନେଇ ସାରିଲେଣି । ଅନ୍ୟପକ୍ଷରେ ନିଲମ୍ବିତ ନେତା ଓ ଅନ୍ୟ ବରିଷ୍ଠ ନେତା ମାନେ ବିଜୁ ଲିଗାସୀ କଥା କହି ଆଗକୁ ଅନ୍ୟଏକ ବିକଳ୍ପ ଆଞ୍ଚଳିକ ଦଳ ଗଠନ ନେଇ ଇଙ୍ଗିତ ମଧ୍ୟ ଦେଇଛନ୍ତି ।
ଏହି ଉପର ମହଲ ବିବାଦ କିନ୍ତୁ ତୃଣମୂଳ ସ୍ତରରେ ଦଳକୁ ବ୍ୟାପକ କ୍ଷତି ପହଞ୍ଚାଇବା ପାଇଁ ଯଥେଷ୍ଟ ହୋଇଛି । ପରାଜୟ ପରେ କର୍ମୀ ବିଜେଡି ଛାଡି ବିଜେପିରେ ସାମିଲ ହେଉଥିଲା ବେଳେ କିଛି ବିଧାୟକ ଓ ପୂର୍ବତନ ବିଧାୟକ ସେମାନଙ୍କୁ ଦଳ ସହିତ ଯୋଡି ରଖିବାକୁ ଆପ୍ରାଣ ଉଦ୍ୟମ କରୁଛନ୍ତି । ଯେଉଁ ମାନେ ବିଧାୟକ ଅଛନ୍ତି ସେମାନେ ଯେତିକି ପରିଶ୍ରମ କରୁନାହାନ୍ତି ପରାଜିତ ବିଧାୟକ ମାନେ ସେମାନଙ୍କ ଠାରୁ କାଇଁ କେତେଗୁଣ ଅଧିକ ପରିଶ୍ରମ କରୁଛନ୍ତି । ହେଲେ ସାଧାରଣ କର୍ମୀ କିନ୍ତୁ ଭିନ୍ନ ମତ ପୋଷଣ କରୁଛନ୍ତି । ଏଭଳି ସ୍ଥିତିରେ କର୍ମୀଙ୍କୁ ଦଳ ସହିତ ଯୋଡି ରଖିବା ନେତାଙ୍କ ପାଇଁ ଦୁରୁହ ବ୍ୟାପାର ହୋଇଛି । କିଛି ତୃଣମୂଳ ସ୍ତରର କର୍ମୀ ପ୍ରଶ୍ନ କରିଛନ୍ତି ଯାହା ପାଇଁ ଦଳ ୨୦୨୪ରେ ପରାଜିତ ହେଲା, ସମସ୍ତଙ୍କ ପ୍ରିୟ ନେତା ନବୀନ ପଟ୍ଟନାୟକ ପଦ ହରାଇଲେ ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ କାହିଁକି ହେଉନାହିଁ । ସେମାନଙ୍କୁ ନେଇ ନବୀନ ନିରବ କାହିଁକି ?
