ଓଡ଼ିଶା ଲିଡ୍ସ(ବ୍ୟୁରୋ): କେନ୍ଦ୍ରାପଡା ଜିଲ୍ଲା ମହାକାଳପଡା ବ୍ଲକ ତିଖିରି ପଞ୍ଚାୟତର ସରପଞ୍ଚ ଚାମେଲି ଓଝାଙ୍କ ସପକ୍ଷରେ ଉଚ୍ଚ ନ୍ୟାୟାଳୟ ମତ ଦେଇଛନ୍ତି । ତାଙ୍କ ବିରୋଧରେ ଆଗତ ହୋଇଥିବା ଅନାସ୍ଥା ପ୍ରସ୍ତାବକୁ ଉଚ୍ଚ ନ୍ୟାୟାଳୟ ଅସିଦ୍ଧ ଘୋଷଣା କରିଛନ୍ତି ।ଗ୍ରାମପଞ୍ଚାୟତ ଆଇନକୁ ସଠିକ ଢଙ୍ଗରେ କାର୍ଯ୍ୟକାରୀ କରାଯାଇନଥିବା କୋର୍ଟ ତାଙ୍କ ରାୟରେ ଉଲ୍ଲେଖ କରିଛନ୍ତି । ତିଖିରି ପଞ୍ଚାୟତରେ ମୋଟ୍ ୨୨ ଜଣ ୱାର୍ଡ ମେମ୍ବର ଅଛନ୍ତି । ସେଥି ମଧ୍ୟରୁ ୨୧ ଜଣ ଅନାସ୍ଥା ପ୍ରସ୍ତାବକୁ ସମର୍ଥନ କରିଛନ୍ତି । ଏହାପରେ ଜୁଲାଇ ୨୭ ତାରିଖରେ ଅନାସ୍ଥା ଭୋଟିଂ ପାଇଁ ପ୍ରଶାସନ ପକ୍ଷରୁ ପ୍ରକ୍ରିୟା ଧାର୍ଯ୍ୟ କରାଯାଇଥିଲା । ଅଗଷ୍ଟ ୧୩ ତାରିଖରେ ଅନାସ୍ଥା ଭୋଟିଂ ହେବା ନେଇ ଦିନ ଧାର୍ଯ୍ୟ ହୋଇଥିଲା । ଏହାକୁ ଚ୍ୟାଲେଞ୍ଜ କରି ସରପଞ୍ଚ ଚାମେଲୀ ଓଝା ଉଚ୍ଚ ନ୍ୟାୟାଳୟଙ୍କ ଦ୍ୱାରସ୍ଥ ହୋଇଥିଲେ । ଆଇନ ଅନୁଯାୟୀ ଅନାସ୍ଥା ପୂର୍ବରୁ ଅନାସ୍ଥା ନୋଟିସ୍, ରିଜୁଲେସନ ଓ ରିକୁଜେଶନ କପି ସରପଞ୍ଚଙ୍କୁ ଦେବା କଥା । ଏହା ୧୫ ଦିନର ସମୟ ବ୍ୟବଧାନ ମଧ୍ୟରେ ଦେବାର ନିୟମ ରହିଛି । ଅନାସ୍ଥା ଭୋଟିଂ ପାଇଁ ଏହି ସମୟ ଭିତରେ ସରପଞ୍ଚ ନିଜକୁ ପ୍ରସ୍ତୁତ କରିବା ଲାଗି ପ୍ରାବଧାନ ରହିଛି । ସେସବୁର ବ୍ୟତିକ୍ରମ ହୋଇଥିବାର ଅଭିଯୋଗ କରି ଚାମେଲି ଉଚ୍ଚ ନ୍ୟାୟାଳୟଙ୍କ ଦ୍ୱାରସ୍ଥ ହୋଇଥିଲେ ।
orissaleads@admin
October 28, 2026
