ବିଜେଡିରେ କୁହୁଳୁଛି ଅସନ୍ତୋଷ, ବରିଷ୍ଠଙ୍କ ପରେ ଛାତ୍ର ନେତାଙ୍କ ମଧ୍ୟରେ ଅସନ୍ତୋଷ

ଓଡ଼ିଶା ଲିଡ୍ସ(ବ୍ୟୁରୋ): ବିଭିନ୍ନ ଘଟଣା କ୍ରମକୁ ନେଇ ଅସମ୍ଭବ ଚାପରେ ଥିବା ରାଜ୍ୟର ମୁଖ୍ୟ ଵିରୋଧି ଦଳ ବିଜେଡିରେ ଅସନ୍ତୋଷ କୁହୁଳୁଛି । ବିଜେଡିର ବରିଷ୍ଠ ନେତାମାନେ ନିଜ ମନ ଭିତରେ ଚାପି ରଖିଥିବା ଅସନ୍ତୋଷକୁ ପ୍ରକାଶ କରିବା ଆରମ୍ଭ କରିଛନ୍ତି । ଏହି ତାଲିକାରେ ବରିଷ୍ଠ ନେତାଙ୍କ ନାମ ବଢି ବଢି ଚାଲିଛି । ଦଳ ମଧ୍ୟରେ ଏକ ପ୍ରକାର ଛକାପଞ୍ଝା ଲାଗି ରହିଥିଲା ବେଳେ ଆଜି ଛାତ୍ର ବିଜେଡିର କିଛି ନେତା ଭୁବନେଶ୍ୱର ଠାରେ ଏକ ରିସର୍ଟରେ ମେଳି କରିଥିବା ଖବର ପ୍ରକାଶ ପାଇଛି । ଘଟଣା ବିଷୟରେ କେହି ମୁହଁ ଖୋଲି ପ୍ରତିକ୍ରିୟା ଦେଇ ନଥିଲା ବେଳେ ବୈଠକରେ ନୂତନ ଭାବେ ଛାତ୍ର ବିଜେଡିର ସଭାନେତ୍ରୀ ଭାବେ ମନୋନୀତ ହୋଇଥିବା ଇପ୍ସିତା ସାହୁଙ୍କୁ ବିରୋଧ କରି ଆଲୋଚନା ହେଇଥିବା ଖବର ମିଳିଛି । ଯାହା ଦଳ ମଧ୍ୟରେ ସବୁ କିଛି ଠିକ ଠାକ ଚାଲି ନଥିବାକୁ ସ୍ପଷ୍ଟ କରିଛି । ଭି.କେ.ପାଣ୍ଡିଆନ ଓ ସୁଜାତା ପାଣ୍ଡିଆନଙ୍କୁ ନେଇ ବିଭିନ୍ନ ଆଲୋଚନା ସମାଲୋଚନା ଚାଲିଥିଲା ବେଳେ ଛାତ୍ର ନେତା ମାନେ ବୈଠକ କରିବା ଦ୍ୱାରା ଦିନକୁ ଦିନ ଦଳ ମଧ୍ୟରେ ଅସନ୍ତୋଷ ଅଧିକ ଘନୀଭୂତ ହେଉଥିବା ପ୍ରମାଣିତ ହୋଇଛି । ଦଳରୁ ବରିଷ୍ଠ ମାନେ ଦିନକୁ ଦିନ ଦୁରେଇ ଯାଉଥିଲା ବେଳେ ଗୋଟିଏ ଗୋଷ୍ଠି ନିଜକୁ ଅଧିକ ପ୍ରଭାବଶାଳୀ ପ୍ରମାଣିତ କରିବାକୁ ଉଦ୍ୟମ କରୁଛନ୍ତି । ଦଳରେ ଏକ ପ୍ରକାର ବରିଷ୍ଠ ମାନେ କୋଣଠେସା ହୋଇ ରହିଛନ୍ତି । ଦଳ ବରିଷ୍ଠଙ୍କ ମତାମତ ନେବାକୁ ମଧ୍ୟ ଉଚିତ ମଣୁନାହିଁ ବୋଲି ଚର୍ଚ୍ଚା ହେଉଛି । ଏହି ଭଳି ସମୟରେ ଛାତ୍ର ନେତା ମାନେ ଇପ୍ସିତଙ୍କୁ ନେଇ ବିରୋଧ ପ୍ରକଟ କରିବା ଦଳ ପାଇଁ ଚିନ୍ତାର ବିଷୟ ହୋଇଛି । ଦିନକୁ ଦିନ ସାରା ରାଜ୍ୟରେ ଦଳୀୟ ନେତା ଓ କର୍ମୀ ବିଜେପି ଆଡ଼କୁ ଢ଼ଳୁଥିଲା ବେଳେ ଦଳ ମଧ୍ୟରେ ଦେଖା ଦେଇଥିବା ଅସନ୍ତୋଷ ଏହାକୁ ଅଧିକ ବଳ ଦେଉଛି । ଦଳର ସବୁ ବର୍ଗର ନେତା ଓ ନେତ୍ରୀଙ୍କ ମତକୁ ଗୁରୁତ୍ୱ ଦେଇ ବିଭିନ୍ନ ପଦପଦବୀ ପ୍ରଦାନ କରାଯାଉ ନଥିଲା ବେଳେ ଏହାକୁ ନେଇ ଅସନ୍ତୋଷ ବଢି ଚାଲିଛି । ଆଗକୁ ଏହା ଭିନ୍ନ ମୋଡ଼ ନେବାକୁ ଯାଉଥିଲା ବେଳେ ଆଜି ନବୀନ ନିବାସରେ ବିଭିନ୍ନ ଛାତ୍ର ନେତାଙ୍କୁ ନେଇ ବୈଠକ ହୋଇଛି । ହେଲେ ଏହା ଆରମ୍ଭ ହୋଇଥିବା ବିଦ୍ରୋହକୁ କେତେ ପ୍ରଶମିତ କରିବ ତାହା ସମୟ କହିବ ।