ମଣ୍ଡି ଅବ୍ୟବସ୍ଥା: ଧାନ ବିକ୍ରି ଚିନ୍ତାରେ ଚାଷୀ ପରିବାର

ଓଡ଼ିଶା ଲିଡ୍ସ(ଯାଜପୁର): ରାଜ୍ୟରେ ଧାନ ବିକ୍ରିକୁ ନେଇ ଚାଷୀ କ୍ଷୁବ୍ଧ ହୋଇ ପଡିଛନ୍ତି । ରାଜ୍ୟର ବିଭିନ୍ନ ଜିଲ୍ଲାରେ ଚାଷୀଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ସୃଷ୍ଟି ହୋଇଛି । ସରକାର ଏ ନେଇ ଠୋସ ପଦକ୍ଷେପ ନ ନେବା ଚାଷୀଙ୍କୁ ଏକ ପ୍ରକାର ହତାଶ କରି ଦେଇଛି । ଖୋଦ ସମବାୟ ମନ୍ତ୍ରୀଙ୍କ ନିର୍ବାଚନ ମଣ୍ଡଳୀରେ ବି ଏହି ଅବ୍ୟବସ୍ଥା ଦେଖିବାକୁ ମିଳିଛି । ଆଜି ପୂର୍ବତନ ମନ୍ତ୍ରୀ ଇଂ ପ୍ରୀତିରଞ୍ଜନ ଘଡାଇ ସୁକିନ୍ଦାର ଏକ ଗ୍ରାମକୁ ଗସ୍ତ କରିବା ସମୟରେ ଜଣେ ବୟସ୍କା ମହିଳା ଧାନ ପାଛୁଡୁ ଥିବା ଦେଖି ସେଠାରେ ଅଟକି ଯାଇ ତାଙ୍କ ନିକଟକୁ ଯାଇଥିଲେ । ମହିଳାଙ୍କ ପରିବାର ଚାଷ କରି ଜୀବିକା ନିର୍ବାହ କରୁଥିଲା ବେଳେ ଧାନ ବିକ୍ରି ହୋଇ ପାରୁ ନଥିବା କହି ଘର ଆଗରେ ଘଡାଇ ରଖା ଯାଇଥିବା ଧାନକୁ ଦେଖାଇ ଥିଲେ । ସେ କହିଥିଲେ ଆମେ ଧାର ଉଦ୍ଧାର କରି ଧାନ ଚାଷ କରିଛୁ । ଧାନ ବିକ୍ରି ହେଲେ ଆମେ ଉଦ୍ଧାର ସୁଝିବୁ । ହେଲେ ସରକାର ଆମ ଠାରୁ ଧାନ ନେଉ ନାହାନ୍ତି । ଯିଏ କରଜ ଦେଇଛି ସେ ବାରମ୍ବାର ଆସି ତା ପଇସା ମଗୁଛି । ଆମେ ଏବେ କରିବୁ କଣ ବୋଲି ସେ ଓଲଟା ପ୍ରଶ୍ନ କରିଥିଲେ ।