ଓଡ଼ିଶା ଲିଡ୍ସ(ଯାଜପୁର):ଆଜି ସମଗ୍ର ରାଜ୍ୟରେ ବିଭିନ୍ନ ଗୋ ମାଫିଆଙ୍କ ଘରେ ଚଢ଼ାଉ ଜାରି ରହିଥିବା ବେଳେ ଯାଜପୁର ସଦର ଥାନା ଅନ୍ତର୍ଗତ ଜମଧର ପଞ୍ଚାୟତ ପାଣ୍ଡିଆ ଗୋପୀନାଥପୁର ଗ୍ରାମର ଶେଖ୍ ସରିଫଙ୍କ ଘରେ ମଧ୍ୟ ଚଢ଼ାଉ କରାଯାଇଛି । ଆଜି ଭୋର ୪ ଟା ସମୟରେ କେନ୍ଦୁଝର ସଦର ଥାନା ଅଧିକାରୀ ଅମିତ କୁମାର ଭୂଇଁଆ, ଏସଆଇ ସମ୍ପଦ କୁମାର ମହାନ୍ତି, ଏ ଏସ ଆଇ ଦିଲ୍ଲୀପ କୁମାର ମୁର୍ମୁ ୨ ପ୍ଲାଟୁନ୍ ପୋଲିସ୍ ଫୋର୍ସ ଓ ଯାଜପୁର ସଦର ଥାନା ଅଧିକାରିଣୀ ଚିନ୍ମୟୀ ବେହେରା, ଏଏସଆଇ ରଞ୍ଜିତା ମହାରଣା, ଏଏସଆଇ ସୁଶାନ୍ତ କୁମାର ଦାଶ, ଏଏସଆଇ ସୁମନ୍ତ କୁମାର ସାମନ୍ତରାୟଙ୍କ ସହ ମିଳିତ ଭାବେ ଗୋ ମାଫିଆ ଶେଖ୍ ସରିଫଙ୍କ ୨ ଟି ରହିବା ଘର ଓ ଗୋଟିଏ ଗୋଦାମ ଘର ଉପରେ ଚଢ଼ାଉ କରାଯାଇଛି ।
ଚଢ଼ାଉ ସମୟରେ ଘରେ କୌଣସି ପୁରୁଷ ସଦସ୍ୟ ନଥିବା ଦେଖିବାକୁ ମିଳିଥିଲା। ଦୀର୍ଘ ୧୪ ଘଣ୍ଟା ଧରି ପୋଲିସ ପକ୍ଷରୁ ଚଢାଉ କରାଯାଇ ଥିଲା । ଚଢ଼ାଉ ସମୟରେ ଗୋ ମାଫିଆଙ୍କ ଘରୁ ନଗଦ ୧,୬୫,୦୦୦ ଟଙ୍କା ସହ ୩୫ ଗ୍ରାମ ସୁନା ଗହଣା, ୫୨୦ ଗ୍ରାମ ରୂପା ଗହଣା,୧୩ ଗୋଟି ମୋବାଇଲ ଫୋନ୍,୧୭ ଗୋଟି ମୂଲ୍ୟବାନ ଜମି ପଟ୍ଟା, ଗୋଟିଏ ଚାରି ଚକିଆ ଥାର ଗାଡି, ଗୋଟିଏ କ୍ରେଟା କାର୍, ଗୋଟିଏ ମାରୁତି ଡିଜେଆର୍, ଦୁଇଟି ବୁଲେଟ୍, ଗୋଟିଏ ସ୍କୁଟି ସହ ୧୦ କିଲୋରୁ ଉର୍ଦ୍ଧ ଗୋମାଂସ, ବିଭିନ୍ନ ବ୍ୟାଙ୍କ ପାସ ବୁକ୍ ଜବତ ହୋଇଥିବା ଜଣାପଡିଛି । ଏହି ଘଟଣା ସମଗ୍ର ଜିଲ୍ଲାରେ ଚର୍ଚ୍ଚାର ବିଷୟ ହୋଇଛି ।
