ଓଡ଼ିଶା ଲିଡ୍ସ(ଯାଜପୁର): ଯାଜପୁର ଟାଉନ ମହାବୀର ନଗର ସ୍ଥିତ ମନ୍ଦିରର ନବମ ବାର୍ଷିକ ଉତ୍ସବ ମହା ଆଡ଼ମ୍ବରରର ଆୟୋଜିତ ହୋଇଛି । ବଡ଼ି ସକାଳୁ ପୁଣ୍ୟତୋୟା ବୈତରଣୀରୁ ପବିତ୍ର ଜଳ ଅଣାଯାଇ ମହାବୀରଙ୍କ ମହାସ୍ନାନ କରାଯାଇଥିଲା । ପରେ ମହାବୀରଙ୍କ ବେଶ କରାଯାଇ ପୂଜାର୍ଚ୍ଚନା ଆରମ୍ଭ ହୋଇଥିଲା । ଏହା ପରେ ପଣ୍ଡିତ ମାନଙ୍କ ଦ୍ୱାରା ହୋମ ଯଜ୍ଞ କାର୍ଯ୍ୟ ଆରମ୍ଭ ହୋଇଥିଲା । ଦିନ ଯାକ ବିଭିନ୍ନ ପୂଜା ସହିତ ହନୁମାନ ଚାଳିସା, ସୁନ୍ଦରା କାଣ୍ଡ ପାଠ ସହିତ ଯଜ୍ଞରେ ଦୁଇ ହଜାର ଛତିଶ ଆହୁତି ପ୍ରଦାନ କରାଯାଇଥିଲା । ସନ୍ଧ୍ୟାରେ ପୂର୍ଣ୍ଣାହୁତି କାର୍ଯ୍ୟ ସମାପନ ହୋଇଥିଲା ।
ଦିନ ଯାକ ମନ୍ଦିରରେ ଶ୍ରଦ୍ଧାଳୁ ପହଞ୍ଚି ମହାବୀରଙ୍କ ଆଶିର୍ବାଦ କାମନା କରିଥିଲେ । ସନ୍ଧ୍ୟାରେ ଶତାଧିକ ଶ୍ରଦ୍ଧାଳୁ ମନ୍ଦିରରେ ପହଞ୍ଚି ମହାବୀରଙ୍କ ଦର୍ଶନ କରିବା ସହିତ ଆଶିର୍ବାଦ କାମନା କରିଥିଲେ । ମନ୍ଦିର ପରିଚାଳନା କମିଟି ପକ୍ଷରୁ ଭଜନ ସନ୍ଧ୍ୟା କାର୍ଯ୍ୟକ୍ରମ ଆୟୋଜିତ ହୋଇଥିଲା । ରାଜ୍ୟର ପ୍ରତିଷ୍ଠିତ କଣ୍ଠଶିଳ୍ପୀ ମାନେ ଭଜନ ପରିବେଷଣ କରିଥିଲେ । ସମସ୍ତ ଶ୍ରଦ୍ଧାଳୁଙ୍କ ପାଇଁ ପରିଚାଳନା କମିଟି ପକ୍ଷରୁ ପ୍ରସାଦ ସେବନର ବ୍ୟବସ୍ଥା ହୋଇଥିଲା । ମୁଖ୍ୟ ପୁରୋଧା ପ୍ରଦୀପ କୁମାର କର ସମସ୍ତ କାର୍ଯ୍ୟର ପରିଚାଳନା କରିଥିଲେ । ପରିଚାଳନା କମିଟି ସଦସ୍ୟଙ୍କ ସହିତ ସ୍ଥାନୀୟ ବ୍ୟକ୍ତି ମାନେ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ । ବାର୍ଷିକ ଉତ୍ସବ ପାଇଁ ମହାବୀର ନଗରରେ ଆଧ୍ୟାତ୍ମିକ ପରିବେଶ ସୃଷ୍ଟି ହୋଇଥିଲା ।
