ଓଡ଼ିଶା ଲିଡ୍ସ(ବ୍ୟୁରୋ): ଦୀର୍ଘ ଦିନ ପରେ ମଇଦାନକୁ ଓହ୍ଲାଇବେ ଵିରୋଧି ଦଳ ନେତା ନବୀନ ପଟ୍ଟନାୟକ । ଆସନ୍ତା କାଲି ଭୁବନେଶ୍ୱରରେ ଆୟୋଜିତ ହେଉଛି ବିଜୁ ଜନତା ଦଳର ଚାଷୀ ସମାବେଶ । ଏହି ସମାବେଶକୁ ବିଶାଳ କରିବାକୁ ବିଜୁ ଜନତା ଦଳ ଭରପୁର ଉଦ୍ୟମ କରୁଛି । ରାଜ୍ୟର ବିଗିଡା ଆଇନ କାନୁନ ବ୍ୟବସ୍ଥା ସହିତ ଚାଷୀ ମାନେ ଭୋଗୁଥିବା ବିଭିନ୍ନ ସମସ୍ୟା ପ୍ରତିବାଦରେ ଏହି ସମାବେଶ ଆୟୋଜନ ହେଉଛି । ଦଳର ସମସ୍ତ ବିଧାୟକ, ବିଧାୟିକା ଓ ନେତୃମଣ୍ଡଳୀ ଏହି ସମାବେଶରେ ଯୋଗଦେଇ ସରକାର ବିରୁଦ୍ଧରେ ବିଶୋଦଗାର କରିବେ । ହେଲେ ଦଳର ସଭାପତି ତଥା ଵିରୋଧି ଦଳ ନେତା ନବୀନ ପଟ୍ଟନାୟକ ଏହି ପ୍ରତିବାଦ ସଭାର ମୁଖ୍ୟ ଆକର୍ଷଣ ହେବାକୁ ଯାଉଛନ୍ତି । ନିକଟରେ ନବୀନ ନିଜର ଆଭିମୁଖ୍ୟରେ ବ୍ୟାପକ ପରିବର୍ତ୍ତନ କରିଥିବା ପରିଲକ୍ଷିତ ହେଉଛି । ସରକାର ବିରୁଦ୍ଧରେ ଆକ୍ରମଣାତ୍ମକ ଆଭିମୁଖ୍ୟ ଗ୍ରହଣ କରି ବିବୃତି ମାନ ଦେଉଛନ୍ତି ।
ରାଜ୍ୟ ରାଜନୀତି ଏବେ ରାଜ୍ୟସଭା ନିର୍ବାଚନକୁ ନେଇ ଉଷ୍ମ ଥିଲା ବେଳେ ନବୀନ ଚତୁର୍ଥ ଆସନ ପାଇଁ କି ପଦକ୍ଷେପ ନେବେ ତା ଉପରେ ସମସ୍ତଙ୍କ ନଜର କେନ୍ଦ୍ରୀଭୂତ ହୋଇଛି । ଆସନ୍ତା କାଲିର ସମାବେଶରେ ନବୀନ ଯୋଗଦେଇ ଦଳ ଆଗାମି ଦିନରେ ଦଳ କେଉଁ ଆଭିମୁଖ୍ୟ ଗ୍ରହଣ କରିବ ସେ ନେଇ କିଛି ସଂକେତ ଦେବାର ଆଶା କରାଯାଉଛି । ନବୀନ ଏହି ସମାବେଶରେ ଯୋଗଦେବେ ବୋଲି ଆଜି ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ ସ୍ପଷ୍ଟ କରିଛନ୍ତି । ଏହାକୁ ନେଇ ଦଳ ମଧ୍ୟରେ ବ୍ୟାପକ ଉତ୍ସାହ ଦେଖା ଦେଇଛି ।
