ଓଡ଼ିଶା ଲିଡ୍ସ(ବ୍ୟୁରୋ): ପୁଣି ପ୍ରଶ୍ନପତ୍ର ଲିକ, ପୁଣି ପରୀକ୍ଷା ବାତିଲ। ନିଟ ୟୁଜି ପରୀକ୍ଷା ୨୦୨୬ ବାତିଲ ପରେ ୨୨ ଲକ୍ଷରୁ ଉର୍ଦ୍ଧ୍ଵ ଛାତ୍ରଛାତ୍ରୀ ନିରାଶ ହୋଇ ପଡିଛନ୍ତି । ମେ’ ୩ ତାରିଖରେ ୨୨ ଲକ୍ଷରୁ ଉର୍ଦ୍ଧ୍ଵ ପିଲା ଏହି ପରୀକ୍ଷା ଦେଇଥିଲେ। କେନ୍ଦ୍ର ଶିକ୍ଷା ବିଭାଗର ଅବହେଳା ପାଇଁ ଏବେ ଏହା ବାତିଲ ହୋଇ ଯାଇଛି। ଏହାକୁ ନେଇ ଵିରୋଧି ଦଳ ନେତା ରାହୁଲ ଗାନ୍ଧି ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି ।
ସାରା ଦେଶରେ ନିଟ ୟୁଜି ପରୀକ୍ଷାର ପ୍ରଶ୍ନପତ୍ର ଲିକକୁ ନେଇ ଝଡ଼ ଦେଖିବାକୁ ମିଳିଛି। ପ୍ରତିବାଦରେ ଛାତ୍ରଛାତ୍ରୀ ରାସ୍ତାକୁ ଓହ୍ଲାଇଛନ୍ତି । ଵିରୋଧି ଦଳ ନେତା ରାହୁଲ ଗାନ୍ଧି କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ତଥାକଥିତ ଅମୃତ କାଳ ଏବେ ଦେଶ ପାଇଁ ବିଷ କାଳରେ ପରିଣତ ହୋଇ ଯାଇଛି। ଦୁର୍ନୀତି ଗ୍ରସ୍ତ ବିଜେପି ଶାସନ ଯୋଗୁ ଏବେ ୨୨ ଲକ୍ଷରୁ ଅଧିକ ଶିକ୍ଷାର୍ଥୀଙ୍କ କଠିନ ପରିଶ୍ରମ, ବଳିଦାନ ଓ ସ୍ୱପ୍ନ ଧୂଳିସାତ ହୋଇ ଯାଇଛି। ସେ ଏକ୍ସରେ ପୋଷ୍ଟ କରି ଏହା ଲେଖିଛନ୍ତି । ସେ ଆହୁରି ଲେଖିଛନ୍ତି କିଛି ପିଲାଙ୍କ ବାପା ଋଣ କରିଥିଲେ, କିଛି ପିଲାଙ୍କ ମା’ ନିଜର ଅଳଙ୍କାର ବିକ୍ରି କରି ଦେଇଥିଲେ, ଲକ୍ଷାଧିକ ପିଲା ରାତି ରାତି ଅନିଦ୍ରା ରହି ପରୀକ୍ଷା ପାଇଁ ପାଠ ପଢ଼ିଥିଲେ। ଏହା ବଦଳରେ ସେମାନେ ପାଇଛନ୍ତି ପ୍ରଶ୍ନପତ୍ର ଲିକ, ସରକାରୀ ଅବହେଳା ଓ ଶିକ୍ଷା ବ୍ୟବସ୍ଥାରେ ଥିବା ସଂଗଠିତ ଦୁର୍ନୀତି।
ଏହା କେବଳ ଗୋଟିଏ ବିଫଳତା ନୁହେଁ, ଏହା ଆମ ଯୁବଗୋଷ୍ଠୀଙ୍କ ଭବିଷ୍ୟତ ବିରୋଧରେ ଅପରାଧ। ପ୍ରତିଥର ପ୍ରଶ୍ନପତ୍ର ମାଫିଆ ବେଶ ଆରାମରେ ଖସି ଯାଉଛନ୍ତି। ହେଲେ ସ୍ୱଚ୍ଛ ଶିକ୍ଷାର୍ଥୀମାନେ ଦଣ୍ଡ ପାଉଛନ୍ତି। ଏବେ ଲକ୍ଷାଧିକ ପିଲା ସମାନ ମାନସିକ ଚାପ, ଆର୍ଥିକ ବୋଝ ଓ ଅନିଶ୍ଚିତାର ସମ୍ମୁଖୀନ ହେବେ।
ଯଦି ଜଣଙ୍କ ଭାଗ୍ୟ କଠିନ ପରିଶ୍ରମ ବଦଳରେ ଟଙ୍କା ଦ୍ୱାରା ନିର୍ଦ୍ଧାରିତ ହେବ, ତା’ହେଲେ ଶିକ୍ଷାର ମୂଲ୍ୟ କ’ଣ ରହିଲା ବୋଲି ସେ ପ୍ରଶ୍ନ କରିଛନ୍ତି । ପ୍ରଧାନମନ୍ତ୍ରୀଙ୍କ ତଥାକଥିତ ଅମୃତକାଳ ଏବେ ଦେଶ ପାଇଁ ବିଷ କାଳରେ ପରିଣତ ହୋଇଛି ବୋଲି କହି ତୀବ୍ର ଆକ୍ଷେପ କରିଛନ୍ତି ।
