ବନ୍ୟାରେ ନିଖୋଜଙ୍କ ମୃତ ଦେହ ଉଦ୍ଧାର

ଓଡ଼ିଶା ଲିଡ୍ସ(ଦଶରଥପୁର): ଗତକାଲି ଶୌଚ ହେବାକୁ ଯାଇ କାଣୀ ନଦୀର ଉଛୁଳା ପାଣିରେ ଭାସି ଯାଇ ସକାଳୁ ନିଖୋଜ ହୋଇଥିବା ତରପଦା ପଞ୍ଚାୟତ ପାଟଣାସାହିର ମହେଶ୍ୱର ସୂତାର(୫୨)ଙ୍କ ମୃତ ଦେହ ଆଜି ଓଡ୍ରାଫ ଟିମ ଉଦ୍ଧାର କରିଛି। ମୃତ ମହେଶ୍ୱରଙ୍କୁ କାଣୀ ନଦୀ ଅବବାହିକା ପାଟଣାସାହି ଘାଇ ଠାରୁ କିଛି ଦୁର ଡୋଭାବିଲ ଗ୍ରାମ ନିକଟରୁ ଉଦ୍ଧାର କରାଯଇଥିଲା । ପରେ ଦଶରଥପୁର ପୋଲିସ ସହାୟତାରେ ଆମ୍ବୁଲାନ୍ସ ଯୋଗେ ମୃତଦେହ ବ୍ୟବଛେଦ ପାଇଁ ଜିଲ୍ଲା ମେଡିକାଲକୁ ସ୍ଥାନାନ୍ତର କରାଯାଇଥିଲା। ସୂଚନା ଥାଉକି ଗତକାଲି ବଡ଼ି ଭୋର ସମୟରେ ମହେଶ୍ୱର ନଦୀ କୂଳକୁ ଶୌଚ ହେବାକୁ ଯାଇଥିବା ବେଳେ ମାଟି ଅତଡ଼ା ଖସିବା କାରଣରୁ ସେ ନଦୀରେ ଭାସି ନିଖୋଜ ହୋଇଯାଇଥିଲେ।ଖବର ପାଇ ଦଶରଥପୁର ଅଗ୍ନିଶମ ବାହିନୀ ମହେଶ୍ୱରଙ୍କୁ ଠାବ କରିବାକୁ ଦିନ ତମାମ୍ ଖୋଜାଖୋଜି କରିଥିଲେ ମଧ୍ୟ ତାଙ୍କର ପତ୍ତା ମିଳିନଥିଲା। ଆଜି ସକାଳୁ ଓଡ୍ରାଫ ଟିମ ପହଞ୍ଚି ଖୋଜା ଖୋଜି ଆରମ୍ଭ କରି ମୃତ ଦେହ ଠାବ କରିଥିଲା ।