ଜି.ସି କଲେଜରେ ବନ୍ୟା ଜଳ

ଓଡ଼ିଶା ଲିଡ୍ସ(ଯାଜପୁର): ବନ୍ୟାରେ ବରୀ ବ୍ଲକ ବ୍ୟାପକ ପ୍ରଭାବିତ ହୋଇଛି । ୨୯ ପଞ୍ଚାୟତର ଲକ୍ଷାଧିକ ବ୍ୟକ୍ତି ବନ୍ୟା ଦ୍ୱାରା ପ୍ରଭାବିତ ହୋଇଥିଲା ବେଳେ ସମସ୍ତ ଶିକ୍ଷାନୁଷ୍ଠାନ ବନ୍ଦ ହୋଇ ଯାଇଛି । ଜିଲ୍ଲାର ଦ୍ଵିତୀୟ ପୁରାତନ ମହାବିଦ୍ୟାଳୟ ଗୋପବନ୍ଧୁ ଚୌଧୁରୀ ମହାବିଦ୍ୟାଳୟରେ ବ୍ରାହ୍ମଣୀ ନଦୀର ବନ୍ୟା ଜଳ ପ୍ରବେଶ କରିଛି । ବନ୍ୟା ଜଳ ବଢ଼ୁଥିଲା ବେଳେ କଲେଜ କାର୍ଯ୍ୟାଳୟ ସହିତ ଶ୍ରେଣୀ ଗୃହରେ ବନ୍ୟା ଜଳ ପ୍ରବେଶ କରିବାର ଆଶଙ୍କା ରହିଛି । ବନ୍ୟାକୁ ଦୃଷ୍ଟିରେ ରଖି କଲେଜର ବିଭିନ୍ନ ଆସବାବପତ୍ର କିଭଳି ସୁରକ୍ଷିତ ରହିବ ସେ ନେଇ କଲେଜ ଅଧ୍ୟକ୍ଷ ପ୍ରଫେସର ପ୍ରବୋଧ କୁମାର ସାମଲ ବନ୍ୟା ପୂର୍ବରୁ ତ୍ୱରିତ ପଦକ୍ଷେପ ନେଇ ବିଭିନ୍ନ କାଗଜପତ୍ର, କମ୍ପ୍ୟୁଟର ଓ ଅନ୍ୟାନ୍ୟ ଜିନିଷକୁ ଉଚ୍ଚ ସ୍ଥାନକୁ ସ୍ଥାନାନ୍ତର କରିଥିଲେ । ବନ୍ୟା ସମୟରେ ସ୍ଥାନୀୟ କର୍ମଚାରୀଙ୍କ ଜରିଆରେ ଅଧ୍ୟକ୍ଷ କଲେଜ ଉପରେ ଦୃଷ୍ଟି ରଖିଥିବା ଜଣା ଯାଇଛି ।