ଓଡ଼ିଶା ଲିଡ୍ସ(ଯାଜପୁର): ବ୍ରାହ୍ମଣୀ ନଦୀର ବନ୍ୟା ବରୀ ବ୍ଲକର ୨୯ ପଞ୍ଚାୟତକୁ ବେହାଲ କରିଛି । ବନ୍ୟା ଫଳରେ ଲକ୍ଷ ଲକ୍ଷ ଲୋକ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଛନ୍ତି । ବନ୍ୟାରେ ବ୍ୟାପକ ଅଞ୍ଚଳ ଜଳମଗ୍ନ ହୋଇଥିଲା । ଏବେ ନଦୀର ପାଣି କମିଛି, ହେଲେ ବିଭିନ୍ନ ଗାଁ ଦାଣ୍ଡରେ ଏବେ ବି ବନ୍ୟା ପାଣି ଲହଡି ଭାଙ୍ଗୁଛି । ବରୀ ବ୍ଲକର ପ୍ରମୁଖ ପଞ୍ଚାୟତ ଅଲିପୁର ପଞ୍ଚାୟତ ଏବେ ବି ଜଳାର୍ଣ୍ଣବ ହୋଇ ରହିଛି । ବ୍ଲକ ଠାରୁ ମାତ୍ର କେଇ ହାତ ଦୂରରେ ଥିବା ଏହି ପାଞ୍ଚାୟତର ବିଭିନ୍ନ ଗ୍ରାମରୁ ପାଣି ଛାଡି ନଥିଲା ବେଳେ ଗାଁ ଦାଣ୍ଡ ପାଣିରେ ଦଳ ଭାସୁଛି । ବିଭିନ୍ନ ଗ୍ରାମର ଗ୍ରାମବାସୀଙ୍କ ପାଇଁ କଦଳୀ ଗଛର ଭେଳା ସାହାରା ପାଲଟିଛି । ଘର ତଳ ରାସ୍ତାରେ ଅଣ୍ଟାଏ ଉପରେ ପାଣି ହେଉଥିବାରୁ ଭେଳାରେ ମୁଖ୍ୟ ରାସ୍ତାକୁ ଆସୁଛନ୍ତି ଗ୍ରାମବାସୀ । ଛୋଟ ଛୁଆ ମାନଙ୍କୁ ମଧ୍ୟ ଭେଳାରେ ବସାଇ ମୁଖ୍ୟ ରାସ୍ତାକୁ ଆଣିଲା ପରେ ସ୍କୁଲ ନେଉଛନ୍ତି । ବିଗତ ଦିନରେ ଗ୍ରାମବାସୀଙ୍କ ବିରୋଧ ସତ୍ତ୍ୱେ କିଛି ଜଳ ନିଷ୍କାସନ ବାଟକୁ ପୋତି ଦିଆଯିବା ଦ୍ୱାରା ଏହି ସ୍ଥିତି ସୃଷ୍ଟି ହୋଇଛି ବୋଲି ଅଭିଯୋଗ କରିଛନ୍ତି ପୂର୍ବତନ ଜିଲ୍ଲା ପରିଷଦ ସଭ୍ୟ ସୁଲଭ ବେଉରିଆ । ଗତକାଲି ରାତି ପର୍ଯ୍ୟନ୍ତ ବରୀ ଗୋଷ୍ଠି ସ୍ୱାସ୍ଥ୍ୟକେନ୍ଦ୍ର ରାସ୍ତାରେ ପାଣି ଥିଲା ବେଳେ ଆଜି ସାମାନ୍ୟ କମିଛି । ରୋଗୀ ଓ ଆମ୍ବୁଲାନ୍ସ ପାଣିରେ ପଶି ଗତାଗତ କରୁଛନ୍ତି । ମେଡିକାଲ ପରିସରରେ ମଧ୍ୟ ପାଣି ରହିଛି ।
ବ୍ଲକ କାର୍ଯ୍ୟାଳୟ ନିକଟରେ ଥିବା ଏହି ପଞ୍ଚାୟତର ବିଭିନ୍ନ ଗ୍ରାମରେ ଜଳ ନିଷ୍କାସନ ନହେବା ପଞ୍ଚାୟତବାସୀଙ୍କ ପାଇଁ ଚିନ୍ତାର ବିଷୟ ହୋଇଛି । ତୁରନ୍ତ ପ୍ରଶାସନ ଏଦିଗରେ ପଦକ୍ଷେପ ନେଇ ଜଳ ନିଷ୍କାସନ ବ୍ୟବସ୍ଥା କରିବାକୁ ପୂର୍ବତନ ଜିଲ୍ଲା ପରିଷଦ ସଦସ୍ୟ ସୁଲଭ ବେଉରିଆଙ୍କ ସହିତ ଅନ୍ୟ ଗ୍ରାମବାସୀ ଦାବି କରିଛନ୍ତି ।
