ଓଡ଼ିଶା ଲିଡ୍ସ(ବ୍ୟୁରୋ): ରାଜ୍ୟରେ ବିକାଶ କାର୍ଯ୍ୟରେ ଶିଥିଳତା ଦେଖା ଦେଇଥିବା ନେଇ ବିଭିନ୍ନ ମହଲରୁ ଲଗାତାର ଅଭିଯୋଗ ହୋଇ ଆସୁଛି। ଏହି ଭଳି ସମୟରେ ଶାସକ ଦଳ ବିଜେପିର ତିନି ଜଣ ସାଂସଦ ସରକାରଙ୍କୁ ଚିଠି ଲେଖି ଅକଳରେ ପକାଇଦେଇଛନ୍ତି ।ନିଜ ନିଜ ଅଞ୍ଚଳରେ ବିକାଶମୂଳକ କାର୍ଯ୍ୟର ମନ୍ଥର ଗତିକୁ ନେଇ ବଲାଙ୍ଗୀର ସାଂସଦ ସଙ୍ଗୀତା ସିଂହଦେଓ, ବ୍ରହ୍ମପୁର ସାଂସଦ ଡ଼. ପ୍ରଦୀପ ପାଣିଗ୍ରାହୀ ଓ ନବରଙ୍ଗପୁର ସାଂସଦ ବଳଭଦ୍ର ମାଝୀ ଅସନ୍ତୋଷ ପ୍ରକାଶ କରିଛନ୍ତି। ସାଂସଦମାନଙ୍କ ଏହି ଚିଠି ଏବେ କ୍ଷମତା କରିଡରରେ ଚର୍ଚ୍ଚାର ବିଷୟ ହୋଇଥିଲା ବେଳେ ସରକାରଙ୍କ ଚିନ୍ତା ବଢ଼ାଇ ଦେଇଛି ।
ସାଂସଦ ସଙ୍ଗୀତା ସିଂହଦେଓ ପୂର୍ତ୍ତ ମନ୍ତ୍ରୀଙ୍କୁ ଲେଖିଥିବା ଚିଠିରେ ୬୮୦ କୋଟି ଟଙ୍କାର ସମ୍ବଲପୁର-ସୁବର୍ଣ୍ଣପୁର ରାସ୍ତା ପ୍ରକଳ୍ପ ସମ୍ପର୍କରେ ଉଲ୍ଲେଖ କରିଛନ୍ତି। ରାସ୍ତା ପ୍ରଶସ୍ତୀକରଣ ଓ ସୁଦୃଢ଼ୀକରଣ କାମରେ ଆଖିଦୃଶିଆ ଅଗ୍ରଗତି ହେଉ ନଥିବାରୁ ସେ ଅସନ୍ତୋଷ ପ୍ରକାଶ କରିଛନ୍ତି। ଏହି ପ୍ରକଳ୍ପ ଦାୟିତ୍ୱ ଓବିସିସି ହାତକୁ ନେଇଛି । ଠିକ୍ ଭାବେ କାର୍ଯ୍ୟର ତଦାରଖ କରାଯାଉ ନଥିବାରୁ କାର୍ଯ୍ୟ ସରିବାରେ ବିଳମ୍ବ ହେଉଛି। ଏହାକୁ ଦୃଷ୍ଟିରେ ରଖି ଓବିସିସି ବଦଳରେ ସୁବର୍ଣ୍ଣପୁର ଆରଆଣ୍ଡବି ଡିଭିଜନ୍କୁ ତଦାରଖ ଦାୟିତ୍ବ ଦେବାକୁ ସେ ନିଜ ଚିଠିରେ ପ୍ରସ୍ତାବ ଦେଇଛନ୍ତି। ଗତ ମେ’ ମାସରେ ସେ ଏହି ଚିଠି ଲେଖିଥିଲା ବେଳେ ପୂର୍ତ୍ତ ବିଭାଗ ପକ୍ଷରୁ ନିକଟରେ ତାଙ୍କୁ ପ୍ରାପ୍ତି ସ୍ବୀକାରପତ୍ର ଦିଆଯାଇଥିବା ସୂଚନା ମିଳିଛି ।
ଅନ୍ୟ ପକ୍ଷରେ ନବରଙ୍ଗପୁର ସାଂସଦ ବଳଭଦ୍ର ମାଝୀ ନବରଙ୍ଗପୁର ବାଇପାସ୍ କାମର ବିଳମ୍ବକୁ ନେଇ ଅସନ୍ତୋଷ ପ୍ରକାଶ କରିଛନ୍ତି । ୨୦୨୪ ଡିସେମ୍ବରରେ ଏହି ପ୍ରକଳ୍ପ କାମ ଠିକା ସଂସ୍ଥାକୁ ଦିଆଯାଇଥିଲା। ଏହି କାର୍ଯ୍ୟ ଦୁଇ ବର୍ଷ ବା ୨୪ ମାସରେ ଶେଷ କରିବାର ଲକ୍ଷ୍ୟଧାର୍ଯ୍ୟ କରାଯାଇଥିଲା। ଏହା ମଧ୍ୟରେ ୨୧ ମାସ ଅତିକ୍ରାନ୍ତ କରିବା ପରେ ବି କାମ ମାତ୍ର ୧୦ ପ୍ରତିଶତ ଶେଷ ହୋଇଛି । କାର୍ଯ୍ୟର ଅଗ୍ରଗତିରେ ଅହେତୁକ ବିଳମ୍ବର କାରଣ ସମ୍ପର୍କରେ ତଦନ୍ତ କରି ଦାୟୀ ସଂସ୍ଥା ଓ ଅଧିକାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନେବାକୁ ସେ ଦାବି କରିଛନ୍ତି।
ବ୍ରହ୍ମପୁର ସାଂସଦ ଡ଼. ପ୍ରଦୀପ ପାଣିଗ୍ରାହୀ ଗତ ଜୁଲାଇ ମାସରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଏକ ଚିଠି ଲେଖି ତାଙ୍କ ନିର୍ବାଚନମଣ୍ଡଳୀର ଗେଟ୍ ବଜାର ଫ୍ଲାଏ ଓଭର୍ର ନିର୍ମାଣରେ ଅହେତୁକ ବିଳମ୍ବ ଏବଂ ଏଥିରେ ବ୍ୟବହୃତ ସାମଗ୍ରୀର ମାନକୁ ନେଇ ଆପତ୍ତି ଉଠାଇଥିଲେ। ଏହାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ସୃଷ୍ଟି ହେଉଥିବା ମଧ୍ୟ ସେ ଜଣାଇଥିଲେ। ପୂର୍ତ୍ତ ବିଭାଗ ପକ୍ଷରୁ ଜୁଲାଇ ମାସରୁ ଆସୁଥିବା ଏହି ଚିଠିର ପ୍ରାପ୍ତି ସ୍ବୀକାର ୧୦ ଦିନ ତଳେ ସାଂସଦଙ୍କୁ ଦିଆଯାଇଛି। କିନ୍ତୁ ସାଂସଦଙ୍କ ଅଭିଯୋଗ ଉପରେ କାର୍ଯ୍ୟାନୁଷ୍ଠାନ ସମ୍ପର୍କରେ ଏଥିରେ କିଛି ଉଲ୍ଲେଖ କରାଯାଇ ନାହିଁ। ଏହି ତିନି ବରିଷ୍ଠ ସାଂସଦଙ୍କ ଚିଠି ରାଜ୍ୟ ସରକାରଙ୍କ କାର୍ଯ୍ୟ ଦକ୍ଷତାର ଗୁମର ଖୋଲି ଦେଇଥିଲା ବେଳେ ସରକାର ଏହାକୁ ନେଇ କେତେ ଯତ୍ନବାନ ହେଉଛନ୍ତି ତାହା ସମୟ କହିବ । ହେଲେ ତିନି ସାଂସଦଙ୍କ ଚିଠି ଯେ ସରକାରଙ୍କୁ ଅକଳରେ ପକାଇ ଦେଇଛି ଏହା କିନ୍ତି ସତ ।
