ଓଡ଼ିଶା ଲିଡ୍ସ(ବ୍ୟୁରୋ): ୟୁପିଆଇ କାରବାର ଉପରେ ଶୁଳ୍କ ଲଗାଇବା ପାଇଁ ପ୍ରସ୍ତୁତି ଚାଲିଥିବା ନେଇ ଚର୍ଚ୍ଚା ଆରମ୍ଭ ହୋଇଛି । ଏହାକୁ ବିରୋଧ କରି କଂଗ୍ରେସ ମଙ୍ଗଳବାର କେନ୍ଦ୍ର ସରକାରକୁ ତୀବ୍ର ଆକ୍ଷେପ କରିଛି । କଂଗ୍ରେସ କହିଛି ବାଣିଜ୍ୟ ଚୁକ୍ତି ଭଳି ଏହି ପ୍ରସଙ୍ଗରେ ମଧ୍ୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆମେରିକା ଆଗରେ ଆତ୍ମସମର୍ପଣ କରିଛନ୍ତି । ରାହୁଲ ଗାନ୍ଧୀ ଦାବି କରିଛନ୍ତି ଯେ, ୨,୦୦୦ ଟଙ୍କାରୁ ଅଧିକ ମୂଲ୍ୟର ବ୍ୟବସାୟିକ ୟୁପିଆଇ କାରବାର ସଂଖ୍ୟା ମାତ୍ର ପ୍ରାୟ ୫ ପ୍ରତିଶତ ହୋଇପାରେ, କିନ୍ତୁ ମୋଟ କାରବାର ମୂଲ୍ୟରେ ଏହାର ଭାଗ ପ୍ରାୟ ୬୫ ପ୍ରତିଶତ ରହିଛି । ଶେଷରେ ଜିନିଷପତ୍ରର ଦର ବୃଦ୍ଧି ମାଧ୍ୟମରେ ଏହାର ବୋଝ ସାଧାରଣ ଗ୍ରାହକଙ୍କ ପକେଟ ଉପରେ ହିଁ ପଡ଼ିବ ।
କେନ୍ଦ୍ର ସରକାର ବ୍ୟାଙ୍କ ଏବଂ ପେମେଣ୍ଟ୍ ସିଷ୍ଟମ ପ୍ରଦାନକାରୀ ସଂସ୍ଥାଗୁଡ଼ିକୁ ୨,୦୦୦ ଟଙ୍କା ପର୍ଯ୍ୟନ୍ତ ୟୁପିଆଇ କାରବାର କିମ୍ବା ରୁପେ ଡେବିଟ୍ କାର୍ଡ ଜରିଆରେ ହେଉଥିବା ଦେୟ ଉପରେ କୌଣସି ଶୁଳ୍କ ନ ଲଗାଇବାକୁ ନିର୍ଦ୍ଦେଶ ଦେଇଛନ୍ତି । ତେବେ ୨,୦୦୦ ଟଙ୍କାରୁ ଅଧିକ କାରବାର ଉପରେ ଶୁଳ୍କ ଲାଗୁ ହେବ କି ନାହିଁ ଏବଂ ଏହି ଶୁଳ୍କ ବ୍ୟବସାୟୀମାନେ ଭରିବେ କି ନାହିଁ, ସେ ନେଇ ସରକାର କୌଣସି ସ୍ପଷ୍ଟୀକରଣ ଦେଇନାହାନ୍ତି । ବିରୋଧୀ ଦଳ ନେତା ରାହୁଲ ଗାନ୍ଧୀ ନିଜ ‘ଏକ୍ସ’ରେ ପୋଷ୍ଟ କରି କହିଛନ୍ତି, “ସରକାର କହୁଛନ୍ତି ଯେ ଗ୍ରାହକଙ୍କ ଠାରୁ କୌଣସି ଶୁଳ୍କ ନିଆଯିବ ନାହିଁ, କିନ୍ତୁ ଦୋକାନୀଙ୍କ ଉପରେ ଲାଗୁଥିବା ଏହି ଫି’ ଶେଷରେ କେଉଁଠୁ ଆସିବ ? ଦରଦାମ ବୃଦ୍ଧି ହୋଇ ଏହା ଗ୍ରାହକଙ୍କ ପକେଟରୁ ହିଁ ଯିବ ।” ସେ ଆହୁରି ଅଭିଯୋଗ କରିଛନ୍ତି ଯେ ଆମେରିକୀୟ ପେମେଣ୍ଟ କମ୍ପାନୀଗୁଡ଼ିକ ଦୀର୍ଘ ଦିନରୁ ଭାରତର ଶୂନ୍ୟ ଏମଡିଆର ନୀତିକୁ ବିରୋଧ କରିଆସୁଥିଲେ ଏବଂ ଏବେ ମୋଦୀ ସରକାର ସେହି ଦିଗରେ ନୀତି ବଦଳାଇବାକୁ ରାସ୍ତା ଖୋଲିଦେଇଛନ୍ତି । ଆମେରିକାର ଚାପ ଆଗରେ ସରକାର ମୁଣ୍ଡ ନୁଆଁଇଛନ୍ତି ବୋଲି ସେ ଅଭିଯୋଗ କରିଛନ୍ତି ।
ଅନ୍ୟ ପକ୍ଷରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ମଧ୍ୟ ୟୁପିଆଇ ଶୁଳ୍କକୁ ନେଇ ସରକାରଙ୍କ ଉପରେ ବର୍ଷିଛନ୍ତି । ସେ କହିଛନ୍ତି ଯେ ସରକାର “ୟୁପିଆଇ ଉପରେ କୌଣସି ଶୁଳ୍କ ନାହିଁ” ବ୍ୟବସ୍ଥାକୁ ବଦଳାଇ କେବଳ ଦୁଇ ହଜାର ଟଙ୍କା ପର୍ଯ୍ୟନ୍ତ ରିହାତି ଦେବା ଦିଗରେ ପାଦ ବଢ଼ାଇଛନ୍ତି । ଖଡ଼ଗେଙ୍କ ଦାବି ଅନୁଯାୟୀ, ଆଗକୁ ପାଞ୍ଚ ହଜାର ଟଙ୍କାର କାରବାର ଉପରେ ୨୫ ଟଙ୍କା ଏବଂ ୧୦ ହଜାର ଟଙ୍କା ଉପରେ ୫୦ ଟଙ୍କା ପର୍ଯ୍ୟନ୍ତ ଶୁଳ୍କ ଆଦାୟ ହେବାର ସମ୍ଭାବନା ରହିଛି । ମହଙ୍ଗା ମାଡ଼ରେ ଛଟପଟ ହେଉଥିବା ଜନତାଙ୍କୁ ଆଶ୍ୱସ୍ତି ଦେବା ବଦଳରେ ସରକାର ସେମାନଙ୍କ ଉପରେ ଅତିରିକ୍ତ ଆର୍ଥିକ ବୋଝ ଲଦିବାକୁ ଯୋଜନା କରୁଛନ୍ତି ବୋଲି ସେ ଅଭିଯୋଗ କରିଛନ୍ତି ।
