ବୁଲା ବିକାଳିଙ୍କଠାରୁ ଦହିବରା ଖାଇ ୫୦ରୁ ଅଧିକ ଅସୁସ୍ଥ, ଅଧିକାଂଶ ଶିଶୁ

ଓଡ଼ିଶା ଲିଡ୍ସ(ବ୍ରହ୍ମଗିରି): ପୁରୀ ଜିଲ୍ଲା କାକଟପୁର ଅଞ୍ଚଳରେ ବୁଲା ବିକାଳି ଠାରୁ ଦହିବରା ଖାଇ ଶତାଧିକ ବ୍ୟକ୍ତି ଅସୁସ୍ଥ ହୋଇଥିଲା ବେଳେ ସେମାନଙ୍କ ମଧ୍ୟରେ ଅନେକ ଶିଶୁ ରହିଛନ୍ତି । ବାଙ୍ଗୁରିଗାଁ ପଞ୍ଚାୟତ ଅନ୍ତର୍ଗତ ତେନ୍ତୁଳି ଗାଁରେ ଜଣେ ବୁଲା ବିକାଳିଙ୍କଠାରୁ ଦହିବରା ଖାଇ ଲୋକ ମାନେ ଅସୁସ୍ଥ ହୋଇପଡ଼ିଛନ୍ତି । ଗାଁରେ ଜଣେ ବୁଲା ବିକାଳି ଦହିବରା ବିକ୍ରି କରିଥିଲେ, ତାହାକୁ ଖାଇବା ପରେ ସ୍ଥାନୀୟ ଲୋକଙ୍କଠାରେ ହଠାତ୍ ବାନ୍ତି, ଝାଡ଼ା ଏବଂ ପେଟ ବିନ୍ଧା ଭଳି ଲକ୍ଷଣ ଦେଖାଦେଇଥିଲା । ଏହାକୁ ନେଇ ଗ୍ରାମରେ କିଛି ସମୟ ପାଇଁ ଆତଙ୍କ ଖେଳିଯାଇଥିଲା । ପରେ ସମସ୍ତ ଅସୁସ୍ଥଙ୍କୁ ତୁରନ୍ତ ସ୍ଥାନୀୟ ବାଙ୍ଗୁରିଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତରୀ ଦଳଙ୍କ ଦ୍ୱାରା ସଠିକ୍ ସମୟରେ ଏବଂ ତ୍ୱରିତ ଚିକିତ୍ସା ସେବା ଯୋଗାଇ ଦିଆଯିବାରୁ ସମସ୍ତେ ସୁସ୍ଥ ହୋଇ ଘରକୁ ଫେରିଥିବା ଜଣାପଡ଼ିଛି । ସମସ୍ତେ ବିପଦମୁକ୍ତ ଥିବାରୁ ପ୍ରଶାସନ ଓ ଗ୍ରାମବାସୀ ଆଶ୍ୱସ୍ତି ଅନୁଭବ କରିଛନ୍ତି । ଏଭଳି ଘଟଣା ପରେ ଗ୍ରାମାଞ୍ଚଳରେ ବୁଲୁଥିବା ବୁଲା ବିକାଳିଙ୍କ ଖାଦ୍ୟର ଗୁଣବତ୍ତା ଏବଂ ସ୍ୱଚ୍ଛତାକୁ ନେଇ ପୁଣିଥରେ ପ୍ରଶ୍ନବାଚୀ ସୃଷ୍ଟି ହୋଇଛି । ସ୍ଥାନୀୟ ଲୋକେ ଖାଦ୍ୟ ସୁରକ୍ଷା ବିଭାଗ ପକ୍ଷରୁ ଏହାର ତଦନ୍ତ କରାଯିବାକୁ ଦାବି କରିଛନ୍ତି ।