ଦରଦାମ୍ ବୃଦ୍ଧି ପ୍ରତିବାଦ, ସୋସିଆଲ୍ ମିଡିଆରେ ଲୋକେ ଦେଉଛନ୍ତି ବ୍ୟଙ୍ଗାତ୍ମକ ଟିପ୍ପଣୀ

ଓଡ଼ିଶା ଲିଡ୍ସ(ବ୍ରହ୍ମଗିରି): ରାଜ୍ୟରେ ଦିନକୁ ଦିନ ବୃଦ୍ଧି ପାଇ ଆକାଶଛୁଆଁ ହୋଉଛି । ଦରଦାମ ବୃଦ୍ଧି ସାଧାରଣ ଲୋକଙ୍କୁ ଅସ୍ତବ୍ୟସ୍ତ କରି ପକାଇଛି । ନିତ୍ୟବ୍ୟବହାର୍ଯ୍ୟ ଜିନିଷର ମୂଲ୍ୟ ବୃଦ୍ଧିକୁ ନେଇ ସାଧାରଣ ଲୋକ ସାମାଜିକ ଗଣ ମାଧ୍ୟମରେ ଟିପ୍ପଣୀ ଦେବାକୁ ମଧ୍ୟ ପଛାଉ ନାହାନ୍ତି । ବ୍ରହ୍ମଗିରି ଅଞ୍ଚଳର ଜଣେ ସଚେତନ ନାଗରିକଙ୍କ ଏକ ବ୍ୟଙ୍ଗାତ୍ମକ ପୋଷ୍ଟ ଏବେ ସୋସିଆଲ୍ ମିଡିଆରେ ବେଶ୍ ଚର୍ଚ୍ଚାର ବିଷୟ ପାଲଟିଛି । ସାଧାରଣ ବଜାରରେ ଏବେ ସୁନା, ରୂପା ଭଳି ନିତ୍ୟ ବ୍ୟବହାର୍ଯ୍ୟ ଜିନିଷର ଦାମ୍ ମଧ୍ୟ ବଢ଼ିବାରେ ଲାଗିଛି ବୋଲି ପୋଷ୍ଟରେ ଦର୍ଶାଯାଇଛି । ଏବେ ବଜାରରେ ପିଆଜ କିଲୋ ପ୍ରତି ୭୧ ଟଙ୍କା, ଚିନି ୭୫ ଟଙ୍କା ଏବଂ ଖାଦ୍ୟତେଲ ୧୯୯ ଟଙ୍କାରେ ବିକ୍ରି ହେଉଛି । ସେହିପରି ଗୋଟିଏ ଅଣ୍ଡା ଦର ୧୦ ଟଙ୍କାରେ ପହଞ୍ଚିଥିବାରୁ ଏହାକୁ ବ୍ୟାଙ୍କ୍ ଲକରରେ ସୁରକ୍ଷିତ ରଖିବାକୁ ପଡ଼ିବ ବୋଲି ବ୍ୟଙ୍ଗ କରାଯାଇଛି । ଏହି ଅହେତୁକ ଦରବୃଦ୍ଧି ଯୋଗୁଁ ସାଧାରଣ ପରିବାରର ହାଣ୍ଡିଶାଳ ଚଳାଇବା କଷ୍ଟକର ହୋଇପଡ଼ିଛି ଏବଂ ଗୃହିଣୀମାନଙ୍କ ମଧ୍ୟରେ ଏହାକୁ ନେଇ ଗଭୀର ଅସନ୍ତୋଷ ଦେଖାଦେଇଛି । ସରକାରୀ ବ୍ୟବସ୍ଥା ଓ ଦର ନିୟନ୍ତ୍ରଣକୁ ନେଇ କଟାକ୍ଷ କରାଯାଇ କୁହାଯାଇଛି ଯେ, ବର୍ତ୍ତମାନର ଦରଦାମ୍ ସ୍ଥିତିରେ ପ୍ରତିବାଦ କରିବା ପାଇଁ ନା ତଳେ ଦୀପ ଜାଳିବାକୁ ତେଲ ଅଛି, ନା ଥାଳି ବାଡ଼େଇବାକୁ ଥାଳି ବଳକା ଅଛି । ସରକାର ଶୁଣୁ ନଥୁବାରୁ ଶେଷରେ ସାଧାରଣ ଜନତା ବାଧ୍ୟ ହୋଇ ସୋସିଆଲ୍ ମିଡିଆରେ ନିଜର ଦୁଃଖ ପ୍ରକାଶ କରି ସାନ୍ତ୍ୱନା ପାଉଛନ୍ତି । ବଢ଼ି ଚାଲିଥିବା ମହଙ୍ଗା ମାଡ଼ କିପରି ସାଧାରଣ ମଧ୍ୟବିତ୍ତ ପରିବାରର ମେରୁଦଣ୍ଡ ଭାଙ୍ଗି ଦେଉଛି, ଏହି ଘଟଣା ତାହାର ଏକ ବାସ୍ତବ ଚିତ୍ର ଉପସ୍ଥାପନ କରୁଛି ।