ଓଡ଼ିଶା ଲିଡ୍ସ(ବ୍ୟୁରୋ):ଆଜି ପବିତ୍ର ମହା ଶିବରାତ୍ରୀ । ଆଜିର ପବିତ୍ର ଦିନକୁ କୋଟି କୋଟି ଶୈବ ଭକ୍ତ ଚାହିଁ ରହିଥାନ୍ତି । ଦେବ ଦେବ ମହାଦେବଙ୍କୁ ପୂଜାର୍ଚ୍ଚନା କରି ଆଶିଷ କାମନା କରନ୍ତି । ଆଜିର ଦିନକୁ ମଧ୍ୟ ବେଶ କିଛିଦିନ ହେଲା ଅପେକ୍ଷା କରି ରହିଛନ୍ତି କୋଟି କୋଟି କ୍ରିକେଟ ପ୍ରେମୀ । T-20 ବିଶ୍ୱକପର ଲିଗ ପର୍ଯ୍ୟାୟରେ ଆଜି ବିଶ୍ୱ କ୍ରିକେଟର ଦୁଇ ଚିର ପ୍ରତିଦ୍ୱନ୍ଦୀ ଭାରତ ଓ ପାକିସ୍ତାନ ଭେଟା ଭେଟି ହେଉଛନ୍ତି । ଏହି ହାଇଭୋଲ୍ଟେଜ ମ୍ୟାଚ ଉପରେ ସାରା ବିଶ୍ୱର କ୍ରିକେଟ ପ୍ରେମୀଙ୍କ ନଜର ରହିଛି ।
ଚଳିତ ବିଶ୍ୱକପରେ ଭାରତ ସହିତ ନଖେଳିବାକୁ ପାକିସ୍ତାନ ନିଷ୍ପତି ନେଇଥିଲା । ହେଲେ ଚାପ ଆଗରେ ନିଜର ନିଷ୍ପତି ବଦଳାଇବାକୁ ବାଧ୍ୟ ହୋଇଥିଲା ପାକିସ୍ତାନ । ଆଜିର ଏହି ହାଇଭୋଲ୍ଟେଜ ମ୍ୟାଚ ଶ୍ରୀଲଙ୍କାର ରାଜଧାନୀ କଲମ୍ବୋରେ ଆୟୋଜିତ ହେବ । ଉଭୟ ଦଳ ଆଉ କିଛି ସମୟ ପରେ ମୁହାଁମୁହିଁ ହେବାକୁ ଯାଉଥିଲା ବେଳେ ବିସିସିଆଇ ଓ ପିସିବିର ବରିଷ୍ଠ ଅଧିକାରୀଙ୍କ ସହିତ ବିଭିନ୍ନ ଦେଶର କ୍ରିକେଟ ବୋର୍ଡ ମୁଖ୍ୟ କଲମ୍ବୋରେ ପହଞ୍ଚି ସାରିଛନ୍ତି ଏହି ମ୍ୟାଚ ଦେଖିବାକୁ । ବିଗତ କିଛି ଦିନ ମଧ୍ୟରେ ପାକିସ୍ତାନ ଦଳ ଭାରତ ନିକଟରୁ ପରାଜିତ ହେଉଥିଲା ବେଳେ ଆଜି ମ୍ୟାଚ କିଏ ଜିତିବ ତାକୁ ନେଇ ଉତ୍କଣ୍ଠା ବଢି ଯାଇଛି । କ୍ରିକେଟ ଅନିଶ୍ଚିତତାର ଖେଳ ହୋଇଥିବାରୁ ଉଭୟ ଦଳ ବିଜୟୀ ହେବାକୁ ପଡିଆରେ ଜୋରଦାର ସଂଘର୍ଷ କରିବେ । ସୂର୍ଯ୍ୟସେନା ସହିତ ସଲମାନ ସେନା ଏହି ହାଇଭୋଲ୍ଟେଜ ମ୍ୟାଚ ଖେଳିବାକୁ ଯାଉଥିଲା ବେଳେ ଭାରତର ଅଭିଷେକ ଶର୍ମା ଓ ପାକିସ୍ତାନର ବିସ୍ମୟ ସ୍ପିନର ଉସମାନ ତାରିକଙ୍କ ଉପରେ ସମସ୍ତଙ୍କ ନଜର ରହିବ । ଏହି ମ୍ୟାଚରେ ବର୍ଷା ବାଧକ ସାଜିବାର ଆଶଙ୍କା ମଧ୍ୟ ସୃଷ୍ଟି ହୋଇଛି ।
