ଓଡ଼ିଶା ଲିଡ୍ସ(ବ୍ରହ୍ମଗିରି): ଚିଲିକା ହ୍ରଦର ଜଳସ୍ତର ବୃଦ୍ଧି ପାଇବା କାରଣରୁ କୃଷ୍ଣପ୍ରସାଦ ବ୍ଲକ ଅନ୍ତର୍ଗତ ଶ୍ରୀରାମପୁର ପ୍ରାଥମିକ ବିଦ୍ୟାଳୟ ପରିସରରେ ବର୍ଷାଜଳ ଏବଂ ହ୍ରଦର ପାଣି ପଶି ବିଦ୍ୟାଳୟକୁ ଜଳବନ୍ଦୀ କରିଦେଇଛି । ବିଦ୍ୟାଳୟ ଚାରିପଟେ ପାଣି ଜମି ରହିଛି । ବର୍ଷା ପାଣି ଜମି ରହିବା ଫଳରେ ଛାତ୍ରଛାତ୍ରୀ ଏବଂ ଶିକ୍ଷକଶିକ୍ଷୟିତ୍ରୀମାନେ ବିଦ୍ୟାଳୟକୁ ଯିବାଆସିବା କରିବାରେ ଅସୁବିଧାର ସମ୍ମୁଖୀନ ହେଉଛନ୍ତି । ମିଳିଥିବା ସୂଚନା ଅନୁଯାୟୀ ଅଞ୍ଚଳରେ ଜଳ ନିଷ୍କାସନର କୌଣସି ସୁବ୍ୟବସ୍ଥା ନଥିବାରୁ ସାମାନ୍ୟ ଜଳସ୍ତର ବୃଦ୍ଧି କିମ୍ବା ବର୍ଷା ହେଲେ ବିଦ୍ୟାଳୟ ଚାରିପଟେ ପାଣି ଜମି ରହିଥାଏ।
ବର୍ତ୍ତମାନ ପରିସ୍ଥିତିରେ ବିଦ୍ୟାଳୟର ପ୍ରବେଶପଥ ଏବଂ ପରିସର ଜଳମଗ୍ନ ହୋଇଥିବାରୁ ଛାତ୍ରଛାତ୍ରୀଙ୍କ ସୁରକ୍ଷାକୁ ନେଇ ଅଭିଭାବକମାନେ ଗଭୀର ଚିନ୍ତା ପ୍ରକାଶ କରିଛନ୍ତି ପାଣି ଦେଇ ବିଦ୍ୟାଳୟକୁ ଆସିବାକୁ ହେଉଥିବାରୁ ଛୋଟ ପିଲାମାନଙ୍କ କ୍ଷେତ୍ରରେ ସାପ କିମ୍ବା ଅନ୍ୟାନ୍ୟ ଜଳଚର ଜୀବଜନ୍ତୁଙ୍କ ଭୟ ମଧ୍ୟ ରହିଛି । ତେଣୁ ଜିଲ୍ଲା ପ୍ରଶାସନ ଏବଂ ଶିକ୍ଷା ବିଭାଗ ଏଥିପ୍ରତି ଦୃଷ୍ଟି ଦେଇ ଜରୁରୀକାଳୀନ ଭାବେ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି ହେଉଛି।
