ଓଡ଼ିଶା ଲିଡ୍ସ(ବ୍ୟୁରୋ): ସରକାର ବଦଳିବା ପରେ ଯାଜପୁର ବିଜେଡିରେ ଭୂକମ୍ପ ସୃଷ୍ଟି ହୋଇଛି । ନିର୍ବାଚନ ପରାଜୟ ପରେ ବିଜେଡି ପୁଣି ଏକତ୍ରିତ ହେବ ଓ ମୁଖ୍ୟ ଵିରୋଧି ଦଳ ଭାବେ ଶାସକ ଦଳ ବିରୁଦ୍ଧରେ ଲଢେଇ କରିବ, ଏମିତି କିଛି ଭାବିଥିଲେ ଯାଜପୁର ବିଜେଡି କର୍ମୀମାନେ । ହେଲେ ମାତ୍ର ଗୋଟିଏ ସପ୍ତାହ ଭିତରେ ବିଜେଡି ହାତରୁ ଦୁଇଟି ପ୍ରମୁଖ ପଞ୍ଚାୟତ ସମିତି ଖସି ଯାଇଛି । ନିକଟରେ ଧର୍ମଶାଳା ପଞ୍ଚାୟତ ସମିତି ଅଧ୍ୟକ୍ଷ ପ୍ରଭାତ ବଳବନ୍ତ ରାୟ ଅନାସ୍ଥାକୁ ସମ୍ମୁଖିନ ହେବା ପୂର୍ବରୁ ନିଜ ପଦରୁ ଇସ୍ତଫା ଦେଇଥିଲେ । ଆଜି ବଡ଼ଚଣା ପଞ୍ଚାୟତ ସମିତି ଅଧ୍ୟକ୍ଷା ଓ ଉପାଧ୍ୟକ୍ଷଙ୍କ ସମେତ ବିଭିନ୍ନ ପଞ୍ଚାୟତର ସମିତି ସଭ୍ୟ, ସରପଞ୍ଚ, ୱାର୍ଡ ସଭ୍ୟଙ୍କ ସହିତ ଦୁଇଜଣ ଜିଲ୍ଲା ପରିଷଦ ସଭ୍ୟ ମଧ୍ୟ ବିଜେଡି ଛାଡି ବିଜେପିରେ ସାମିଲ ହୋଇ ଯାଇଛନ୍ତି । ରାଜ୍ୟ ସଭାପତି ମନମୋହନ ସାମଲ, ବଡ଼ଚଣା ବିଧାୟକ ଅମର ନାୟକ, ଧର୍ମଶାଳା ବିଧାୟକ ହିମାଂଶୁ ଶେଖର ସାହୁଙ୍କ ଉପସ୍ଥିତିରେ ରାଜ୍ୟ କାର୍ଯ୍ୟାଳୟରେ ଏହି ମିଶ୍ରଣ ପର୍ବ ଅନୁଷ୍ଠିତ ହୋଇଥିଲା । ଫଳରେ ବର୍ଷ ବର୍ଷ ହେଲା ଯେଉଁ ନିର୍ବାଚନ ମଣ୍ଡଳୀରେ ବିଜେଡିର ସବୁଜ ପତାକା ଲହଡି ଭାଙ୍ଗୁଥିଲା ସେଠାରେ ବିଜେପିର ଗେରୁଆ ପତାକା ଲହଡି ଭାଙ୍ଗିଛି । ବିଜେଡିରେ ଏହି ଭୂକମ୍ପ ବଡ଼ଚଣା ବିଜେଡିକୁ ଏକ ପ୍ରକାର ସ୍ତବ୍ଧ କରିଦେଇଛି । ଗତ ନିର୍ବାଚନରେ ରାଜ୍ୟର ଅନ୍ୟତମ ବରିଷ୍ଠ ତଥା ଅନୁଭବୀ ନେତା ଅମର ପ୍ରସାଦ ଶତପଥୀଙ୍କୁ ଟିକେଟ ନଦେଇ ବିଜେଡି ଯେଉଁ ଭୁଲ କରିଥିଲା ଆଜି ତାର ଫଳ ଭୋଗିଛି ।
ଅମର ବିଜେଡିରୁ ଦୁରେଇ ଯାଇଥିଲା ବେଳେ ତାଙ୍କର ସମସ୍ତ ସମର୍ଥକ ଏବେ ବିଜେପିରେ ସାମିଲ ହୋଇ ଯାଇଛନ୍ତି କହିଲେ ଅତ୍ୟୁକ୍ତି ହେବ ନାହିଁ । ରାଜ୍ୟରେ କଂଗ୍ରେସ ନିଜକୁ ସଙ୍ଗଠିତ କରୁଥିଲା ବେଳେ ବିଗତ ଦିନର କଂଗ୍ରେସ ନେତା ରାଜ ନାରାୟଣ ମହାପାତ୍ର କଂଗ୍ରେସ ଛାଡି ବିଜେଡିକୁ ଆସିଥିଲେ । ହେଲେ ବଡ଼ଚଣା ବିଜେଡି ତାଙ୍କୁ ସମର୍ଥନ ଦେଇନଥିଲା । ଦଳ ମଧ୍ୟ ତାଙ୍କୁ ଟିକେଟ ନଦେଇ ବର୍ଷା ପ୍ରିୟଦର୍ଶିନୀଙ୍କୁ ଟିକେଟ ଦେଇଥିଲା । ପରାଜୟ ପରେ ବର୍ଷା କିନ୍ତୁ ବଡ଼ଚଣାକୁ ସମ୍ପୂର୍ଣ୍ଣ ଭୁଲି ଗଲେ । ଦଳର ଏବେ ନେତୃତ୍ୱ ନେଉଛନ୍ତି ରାଜ ନାରାୟଣ । ହେଲେ ଦଳର କର୍ମୀ ଓ ନେତା ଦଳ ଛାଡୁଥିଲା ବେଳେ ଏହାର ପ୍ରତିରୋଧ କରି ପାରୁ ନାହାନ୍ତି ରାଜ ନାରାୟଣ । ଧର୍ମଶାଳା ଓ ବଡ଼ଚଣା ପରେ ବିଜେପି ଏବେ କେଉଁ ସମିତିକୁ ଦାଖଲ କରିବ ତାକୁ ନେଇ ଆଶଙ୍କାରେ ପଡି ଯାଇଛି ବିଜେଡି । ଦୁଇଟି ପଞ୍ଚାୟତ ସମିତି ବିଜେଡି ହାତରୁ ଖସିଯିବା ପରେ ବିଜେଡି କର୍ମୀ ଆଗାମି ଭବିଷ୍ୟତ ନେଇ ଚିନ୍ତାରେ ପଡ଼ି ଯାଇଛନ୍ତି । ଯାହା ସ୍ୱାଭାବିକ ମଧ୍ୟ ।
