ଓଡ଼ିଶା ଲିଡ୍ସ(ବ୍ୟୁରୋ): ରାଷ୍ଟ୍ରପତି ଦ୍ରୌପଦୀ ମୁର୍ମୁ ଶନିବାର ଦିନ ପଶ୍ଚିମବଙ୍ଗ ବାଗଡୋଗ୍ରା ବିମାନବନ୍ଦର ନିକଟରେ ଆୟୋଜିତ ଏକ ଆଦିବାସୀ ସମ୍ପ୍ରଦାୟର କାର୍ଯ୍ୟକ୍ରମରେ ଯୋଗଦାନ କରିଥିଲେ । ହେଲେ ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏବଂ ତାଙ୍କ ରାଜ୍ୟର ମନ୍ତ୍ରୀମାନେ ଉପସ୍ଥିତ ନଥିଲେ । ଏହା ସହିତ ଶେଷ ମୁହୂର୍ତ୍ତରେ ରାଷ୍ଟ୍ରପତିଙ୍କ କାର୍ଯ୍ୟକ୍ରମର ସ୍ଥାନ ମଧ୍ୟ ପରିବର୍ତ୍ତନ କରିଥିଲେ । ଏହାକୁ ନେଇ ରାଷ୍ଟ୍ରପତି ପ୍ରଶ୍ନ ଉଠାଇଥିଲେ । ରାଷ୍ଟ୍ରପତିଙ୍କ ପଶ୍ଚିମବଙ୍ଗ ଗସ୍ତ ସମୟରେ ପ୍ରୋଟୋକଲ୍ରେ ଗୁରୁତର ତ୍ରୁଟି ହୋଇଥିବା ଘଟଣା ଏବେ ଜୋର ଧରିଛି ।
କେନ୍ଦ୍ର ଗୃହ ସଚିବ ଏହି ମାମଲାରେ ହସ୍ତକ୍ଷେପ କରି ପଶ୍ଚିମବଙ୍ଗର ମୁଖ୍ୟ ସଚିବଙ୍କୁ ସମନ କରିଛନ୍ତି । ତାଙ୍କୁ ରବିବାର ଅପରାହ୍ନ ୫ଟା ସୁଦ୍ଧା ସ୍ପଷ୍ଟୀକରଣ ଦେବାକୁ କୁହାଯାଇଛି ଏବଂ ରାଷ୍ଟ୍ରପତିଙ୍କ ଗସ୍ତ ସମୟରେ କାହିଁକି ପ୍ରୋଟୋକଲ୍ ପାଳନ କରାଯାଇ ନଥିଲା ତାହା ମଧ୍ୟ ପଚରାଯାଇଛି । କେନ୍ଦ୍ର ଗୃହ ସଚିବ ପଶ୍ଚିମବଙ୍ଗ ମୁଖ୍ୟ ସଚିବଙ୍କୁ ରାଷ୍ଟ୍ରପତିଙ୍କ ଗସ୍ତ ସହିତ ଜଡିତ ସୁରକ୍ଷା ଏବଂ ପ୍ରୋଟୋକଲ୍ ନିୟମର ବ୍ଲୁ ବୁକ୍ କାହିଁକି ପାଳନ କରାଯାଇ ନାହିଁ ଓ କାର୍ଯ୍ୟକ୍ରମର ସ୍ଥାନ କାହିଁକି ପରିବର୍ତ୍ତନ କରାଯାଇଥିଲା ତାହା ସ୍ପଷ୍ଟ କରିବାକୁ କହିଛନ୍ତି ।
ଅନ୍ୟ ପକ୍ଷରେ ବାଗଡୋଗ୍ରା ନିକଟରେ ଅନୁଷ୍ଠିତ କାର୍ଯ୍ୟକ୍ରମରେ ଲୋକଙ୍କ ଉପସ୍ଥିତି କମ୍ ଥିବାରୁ ରାଷ୍ଟ୍ରପତି ଅସନ୍ତୋଷ ପ୍ରକାଶ କରିଥିଲେ । ଏହି କାର୍ଯ୍ୟକ୍ରମ ପ୍ରଥମେ ବିଧାନନଗରରେ ଅନୁଷ୍ଠିତ ହେବାକୁ ସ୍ଥିର କରାଯାଇଥିଲା କିନ୍ତୁ ପରେ ସ୍ଥାନ ପରିବର୍ତ୍ତନ କରାଯାଇଥିଲା । ସମାବେଶକୁ ସମ୍ବୋଧିତ କରି ରାଷ୍ଟ୍ରପତି ମୁର୍ମୁ କହିଥିଲେ, ସାଧାରଣତଃ, ଯେତେବେଳେ ରାଷ୍ଟ୍ରପତି କୌଣସି ରାଜ୍ୟ ଗସ୍ତ କରନ୍ତି, ମୁଖ୍ୟମନ୍ତ୍ରୀ ତାଙ୍କୁ ସ୍ୱାଗତ କରନ୍ତି ଏବଂ ଅନ୍ୟ ମନ୍ତ୍ରୀମାନେ ଉପସ୍ଥିତ ଥାଆନ୍ତି। କିନ୍ତୁ ମମତା ବାନାର୍ଜୀ ଆସି ନାହାନ୍ତି କି ମନ୍ତ୍ରୀ ମଣ୍ଡଳର କୌଣସି ସଦସ୍ୟ ଆସି ନାହାନ୍ତି । ରାଜ୍ୟପାଳଙ୍କୁ ବଦଳି କରାଯାଇଛି ବୋଲି ସେ ମଧ୍ୟ ଆସିପାରି ନାହାନ୍ତି। ତାରିଖ ପୂର୍ବରୁ ସ୍ଥିର ହୋଇସାରିଥିବାରୁ ମୁଁ ଏଠାକୁ ଆସିଛି। ସଭାକୁ ଆସିଥିବା ପାଇଁ ସମସ୍ତଙ୍କୁ ଧନ୍ୟବାଦ ଦେଇଥିଲେ ରାଷ୍ଟ୍ରପତି । ରାଷ୍ଟ୍ରପତି କହିଥିଲେ, ମମତା ବାନାର୍ଜୀ ମୋ ସାନ ଭଉଣୀ ପରି। ମୁଁ ମଧ୍ୟ ବଙ୍ଗଳାର ଝିଅ, କିନ୍ତୁ ମୁଁ ବୁଝିପାରୁନାହିଁ ଯେ, ମୋତେ ସେଠାକୁ ଯିବାକୁ କାହିଁକି ଅନୁମତି ଦିଆଗଲା ନାହିଁ। ମୁଁ ଜାଣିନାହିଁ ସେ ଅସନ୍ତୁଷ୍ଟ ଅଛନ୍ତି କି ନାହିଁ, କିନ୍ତୁ ଏଥିରେ କୌଣସି ଫରକ ପଡ଼େ ନାହିଁ। ଆପଣମାନେ ସମସ୍ତେ ଖୁସି ହୁଅନ୍ତୁ ବୋଲି ମଧ୍ୟ ରାଷ୍ଟ୍ରପତି କହିଥିଲେ । ଏହି ବିବାଦ ଏବେ ସାରା ଦେଶରେ ଚର୍ଚ୍ଚା ସୃଷ୍ଟି କରିବା ସହିତ ମମତା ତୀବ୍ର ବିରୋଧର ସମ୍ମୁଖୀନ ହୋଇଛନ୍ତି ।
