ପିଇଓଙ୍କୁ ମରଣାନ୍ତକ ଆକ୍ରମଣ କରି ଭତ୍ତା ଟଙ୍କା ଛଡାଇ ନେଲେ ଦୁର୍ବୁତ୍ତ, ଥାନାରେ ବିଡ଼ିଓଙ୍କ ଅଭିଯୋଗ

ଓଡ଼ିଶା ଲିଡ୍ସ(ଦଶରଥପୁର): ଦଶରଥପୁର ବ୍ଲକ ଅନ୍ତର୍ଗତ ଇଜାପୁର ପଞ୍ଚାୟତର କାର୍ଯ୍ୟରତ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀଙ୍କୁ କିଛି ଦୁର୍ବୁତ୍ତ ଆକ୍ରମଣ କରିବା ସହିତ ବ୍ୟାଙ୍କରେ ଜମା ଉଦ୍ଦେଶ୍ୟରେ ଥିବା ବଳକା ଭତ୍ତା ଟଙ୍କାକୁ ଛଡାଇ ନେଇଥିବା ଦଶରଥପୁର ଥାନାରେ ଲିଖିତ ଅଭିଯୋଗ ହୋଇଛି। ଅଭିଯୋଗ ଅନୁଯାୟୀ ଦଶରଥପୁର ବ୍ଲକ ଇଜାପୁର ପଞ୍ଚାୟତ ଦାୟୀତ୍ୱରେ ଥିବା ପିଇଓ ବିରଜା ପ୍ରସାଦ ମିଶ୍ର ଆଜି ପୂର୍ବାହ୍ନ ୧୧ଟା ସମୟରେ ବଳକା ଭତ୍ତା ଟଙ୍କାକୁ ବ୍ୟାଙ୍କରେ ଜମା ଦେବାକୁ ପଞ୍ଚାୟତ କାର୍ଯ୍ୟାଳୟରୁ ଯାଜପୁର ଟାଉନ ରାସ୍ତାରେ ବାଇକରେ ଯାଉଥିବା ବେଳେ ଇଜାପୁର ପଞ୍ଚାୟତ ମାଂସଡାବିନ୍ଧା ଅଞ୍ଚଳର ପ୍ରତାପ କୁମାର ସାହୁ ତାଙ୍କୁ ମୋବାଇଲରେ କଲ କରି ଅଶ୍ଳୀଳ ଭାଷାରେ ଗାଳିଗୁଲଜ କରିଥିଲେ। ଏହାର କିଛି ମୁହୂର୍ତ୍ତ ମଧ୍ୟରେ ସେହି ମାଂସଡାବିନ୍ଧା ଅଞ୍ଚଳର ପ୍ରତୀକ କୁମାର ସାହୁ ଓ ଅଜୟ କୁମାର ଦାସ ନାମକ ଦୁଇ କଳିଙ୍ଗପୁର ନିକଟରେ ପିଇଓଙ୍କୁ ଅଟକାଇ ଆକ୍ରମଣ କରିବା ସହିତ ତାଙ୍କ ବ୍ୟାଗରେ ଥିବା ୨୫ହଜାର ଟଙ୍କାକୁ ଛଡାଇ ନେଇ ଫେରାର ହୋଇଯାଇଥିଲେ। ଭୟରେ ପିଇଓ ଶ୍ରୀ ମିଶ୍ର ଘଟଣାକୁ ନେଇ ପ୍ରଥମେ ବିଡ଼ିଓ ଆକାଶ ପଟ୍ଟନାୟକଙ୍କୁ ଅବଗତ କରିଥିଲେ । ବିଡ଼ିଓ ଦଶରଥପୁର ଥାନାଧିକାରୀଙ୍କୁ ଫୋନ ଜରିଆରେ ଜଣାଇବା ପରେ ପୁଲିସ୍ ଘଟଣା ସ୍ଥଳରେ ପହଞ୍ଚି ପିଇଓଙ୍କୁ ସେଠାରୁ ଉଦ୍ଧାର କରି ଥାନାକୁ ଆଣିଥିଲେ। ସେଠାରୁ ପିଇଓ ବ୍ଲକ ଯାଇ ସମସ୍ତ କଥା ବିଡ଼ିଓଙ୍କୁ ଅବଗତ କରିଥିଲେ । ଅଭିଯୋଗ ଆଧାରରେ ଦଶରଥପୁର ପୁଲିସ ଘଟଣାର ତଦନ୍ତ କରୁଥିବା ଜଣାଯାଇଛି।