ବନ୍ୟା ପାଣିର ପ୍ରଖର ସ୍ରୋତରୁ ଅଳ୍ପକେ ବର୍ତ୍ତିଗଲା ୨୨ଗୋରୁ ଗାଈଙ୍କ ଜୀବନ
ଓଡ଼ିଶା ଲିଡ୍ସ(ଦଶରଥପୁର): ବନ୍ୟା ପାଣି ସହିତ ବର୍ଷା, ଏଭଳି ସ୍ଥିତିରେ ଆଉଟୁ ପାଉଟୁ ହେଉଥିବା ଦଶରଥପୁରବାସୀଙ୍କର ପୁଣି ଚିନ୍ତା ବଢିଛି ବନ୍ୟାକୁ ନେଇ ।ବୈତରଣୀ ଓ ତାର ଶାଖା କାଣୀ ନଦୀରେ ଚଳିତ ବର୍ଷ ୫ଥର ବନ୍ୟା ଆସିବା ସହିତ ଘାଇ ଦେଇ ବନ୍ୟା ପାଣି ମାଡିବାରୁ ଦୀର୍ଘ ୨୫ ଦିନରୁ ଉର୍ଦ୍ଧ୍ଵ ହେବ ବ୍ଲକର ଲକ୍ଷାଧିକ ଲୋକ ଦୁର୍ଦ୍ଦଶାର ସମ୍ମୁଖୀନ ହେଉଥିବା ସମୟରେ ପୁଣି ୬ଷ୍ଠ ଥର ପାଇଁ ବୈତରଣୀ ଓ ଶାଖା କାଣୀ ନଦୀରେ ବନ୍ୟା ଆଶଙ୍କା ବୃଦ୍ଧି ପାଇବାରେ ଲାଗିଛି। ଗତ ୨ଦିନ ହେବ ବର୍ଷା ଲାଗି ରହିଥିବାରୁ ବୈତରଣୀ ଓ ଶାଖା କାଣୀ ନଦୀରେ ଜଳ ସ୍ତର ବୃଦ୍ଧି ପାଇବାରେ ଲାଗିଛି। ବନ୍ୟା ପରିସ୍ଥିତି ଉପରେ ପ୍ରଶାସନ ଓ ଜଳସମ୍ପଦ ବିଭାଗ ପକ୍ଷରୁ ନଜର ରଖାଯିବା ସହ ବନ୍ୟା ସ୍ଥିତିରେ ଆବଶ୍ୟକ ପଦକ୍ଷେପ ନେବାକୁ ପ୍ରଶାସନ ଆଲର୍ଟ ରହିଥିବା ଦଶରଥପୁର ବ୍ଲକର ବନ୍ୟା ମୁକାବିଲା ଦାୟୀତ୍ୱରେ ଥିବା ଅତିରିକ୍ତ ଜିଲ୍ଲାପାଳ ଯୁଧିଷ୍ଠିର ନାୟକ ଓ ବିଡ଼ିଓ ଆକାଶ ପଟ୍ଟନାୟକ କହିଛନ୍ତି ।
ଆଜି ଦିନ ୩ଘଟିକା ସମୟରେ ବୈତରଣୀ ନଦୀ ପାର୍ଶ୍ଵ ଜୟନ୍ତରା ସେବାଶ୍ରମ ବିଦ୍ୟାଳୟ ନିକଟ ବୈତରଣୀ ନଦୀ ପଠାରେ ଘାସ ଚରୁଥିବା ପାଖାପାଖି ୨୨ରୁ ଅଧିକ ଗାଈଗୋରୁଙ୍କ ଜୀବନ ଅଳ୍ପକେ ରକ୍ଷା ପାଇଯାଇଛି। ଅଚାନକ ନଦୀର ବନ୍ୟା ଜଳ ସ୍ତର ବୃଦ୍ଧି ପାଇବା ସହ ପ୍ରଖର ସ୍ରୋତ ଯୋଗୁ ନଦୀ ପଠାରେ ଚରୁଥିବା ଗୋରୁ ଗାଈ ନଦୀ ବନ୍ଧକୁ ଆସି ନପାରି ଫସି ରହିଥିଲେ । ଏହି ଖବର କଛି ଗୋ ପାଳକଙ୍କ ଠାରୁ ପାଇ ଦଶରଥପୁର ଅଗ୍ନିଶମ ଅଧିକାରୀ ଦୈତାରୀ ଜେନାଙ୍କ ନେତୃତ୍ୱରେ ଦଶରଥପୁର ଏବଂ ଦଶରଥପୁର ବ୍ଲକ ଅଞ୍ଚଳର ବନ୍ୟାରେ ଲୋକଙ୍କ ସାହଯ୍ୟ ନିମନ୍ତେ ଆସିଥିବା ଅନୁଗୁଳ ଅଗ୍ନିଶମ ବାହିନୀର କର୍ମଚାରୀମାନେ କିଛି ଗୋ ପାଳକଙ୍କୁ ସାଙ୍ଗରେ ନେଇ ପାଣି ଘେରରେ ଫସି ରହିଥିବା ଗୋ-ସମ୍ପଦକୁ ସୁରକ୍ଷିତ ଭାବେ ଉଦ୍ଧାର କରି ନଦୀ ବନ୍ଧ ଉପରକୁ ଆଣିଥିଲେ। ଗ୍ରାମବାସୀଙ୍କ ପକ୍ଷରୁ ଅଗ୍ନିଶମ ବିଭାଗ କର୍ମଚାରୀଙ୍କୁ କୃତଜ୍ଞତା ପ୍ରଦାନ କରାଯାଇଛି ।
