ଓଡ଼ିଶା ଲିଡ୍ସ(ବ୍ରହ୍ମଗିରି): ଆଜି ପବିତ୍ର ଗହ୍ମା ପୂର୍ଣ୍ଣିମା । ବଡ଼ ଠାକୁର ବଳଦେବଙ୍କ ଜନ୍ମ ଦିନ । ଆଜିର ଦିନକୁ ରକ୍ଷା ବନ୍ଧନ ଦିବସ ଭାବେ ପାଳନ କରାଯାଏ । ବିଶେଷ କରି ରକ୍ଷାବନ୍ଧନ ପର୍ବରେ ଭଉଣୀ ଭାଇ ହାତରେ ରାକ୍ଷୀ ବାନ୍ଧି ତାର ଶୁଭ ମନାସୀ ଥାଏ । ଚାଷୀ ପରିବାରରେ ଘରେ ଗହ୍ମା ପର୍ବରେ ଗୋପୂଜନ କରାଯାଏ । ଆଜି ଏହି ପର୍ବକୁ ନିଆରା ଢଙ୍ଗରେ ପାଳନ କରିଛନ୍ତି ପଣସପଦା ଜୁନିଅର କଲେଜର ଛାତ୍ରଛାତ୍ରୀ ମାନେ । ବୃକ୍ଷରେ ରାକ୍ଷୀ ବାନ୍ଧି ଏହି ପର୍ବ ନିଆରା ଭାବେ ପାଳନ କରିଛନ୍ତି ଛାତ୍ରଛାତ୍ରୀ ।
ସେମାନଙ୍କ ମତରେ ବୃକ୍ଷ ଆମର ଉପକାରୀ ବନ୍ଧୁ । ଭାଇ ସମାନ ଆମର ଉପକାର କରିଥାଏ। ଆମକୁ ସୁରକ୍ଷା ଦେଇଥାଏ। ବୃକ୍ଷ ଆମକୁ ଅନେକ କିଛି ପ୍ରଦାନ କରିଥାଏ। ବୃକ୍ଷ ନଥିଲେ ପୃଥିବୀରେ ଜୀବ ଜଗତ ନଥାନ୍ତା। ବିଶେଷ କରି ଜୀବଜଗତ ପାଇଁ ଅତ୍ୟନ୍ତ ଦରକାରୀ ଅମୃତ ଅମ୍ଳଜାନ ପ୍ରଦାନ କରି ମାନବ ସମାଜ ସହିତ ଜୀବଜଗତକୁ ସୁରକ୍ଷିତ ରଖିଥାଏ। ଅନ୍ୟ ପକ୍ଷରେ ଶ୍ରୀଜଗନ୍ନାଥ ସଂସ୍କୃତିରେ ଶ୍ରୀଜଗନ୍ନାଥ ଦାରୁଦେବତା ଅଟନ୍ତି। ଏଣୁ ଇକୋକ୍ଳବର ପିଲାମାନେ ପବିତ୍ର ରାକ୍ଷୀ ପୂର୍ଣ୍ଣମୀରେ ବୃକ୍ଷରେ ରାକ୍ଷୀ ବାନ୍ଧିଥିଲେ। ବିଦ୍ୟାଳୟ ପରିସରରେ ସମସ୍ତ ଗଛର ସେବାଯତ୍ନ ସହ ରାକ୍ଷୀ ବାନ୍ଧିଥିଲେ ଛାତ୍ରଛାତ୍ରୀ। ଏହି ଅବସରେ ଆୟୋଜିତ ସଭାରେ ବିଦ୍ୟାଳୟର ଅଧ୍ୟକ୍ଷ ସୁବର୍ଣ୍ଣ ସାମନ୍ତରାୟ ଯୋଗଦେଇ ବୃକ୍ଷର ଉପକାରିତା, ବୃକ୍ଷ ଆମକୁ କିପରି ସୁରକ୍ଷିତ ରଖୁଛି, ରକ୍ଷାବନ୍ଧନର ପରମ୍ପରା ଏବଂ ପୌରାଣିକ ମହତ୍ୱ ସହିତ ଏହାର ସାମାଜିକ ଆବଶ୍ୟକତା ସଂପର୍କରେ ବୁଝାଇଥିଲେ। ଅଧ୍ୟାପକ ରଣଜିତ ସାମଲ, ଅରୁନ୍ଧତୀ ସ୍ବାଇଁ, ଦେବାଶିଷ ପାତ୍ର, କୃତିସୁନ୍ଦର ସେଠୀ, ଉମେଶ ବେହେରା, ଗୟାଧର ପ୍ରଧାନ ପ୍ରମୁଖ ଯୋଗଦେଇ ପିଲାମାନଙ୍କୁ ଉତ୍ସାହିତ କରିଥିଲେ। ଇକୋ କାଶୀନାଥ ନାୟକ କାର୍ଯ୍ୟକ୍ରମକୁ ପରିଚାଳନା କରିଥିଲେ।
