ଓଡ଼ିଶା ଲିଡ୍ସ(ଯାଜପୁର): ସାରା ରାଜ୍ୟରେ ଶୀତ ଲହରୀ ଜନ ଜୀବନକୁ ବେଶ ପ୍ରଭାବିତ କରୁଛି । ପ୍ରବଳ ଶୀତ ଲହରୀରେ ଯାଜପୁରର ଚର୍ଚ୍ଚିତ ନଗଡ଼ାବାସୀ କଲବଲ ହେଉଛନ୍ତି । ପ୍ରବଳ ଶୀତ ସହିତ କୁହୁଡି ବି ନଗଡାବାସୀଙ୍କୁ ନୟାନ୍ତ କରୁଛି । ନଗଡ଼ାରେ ଦିନର ସର୍ବନିମ୍ନ ତାପମାତ୍ରା ୬ରୁ ୭ ଡିଗ୍ରିକୁ ଖସି ଯାଉଛି । ସପ୍ତାହ ଧରି ନଗଡ଼ାରେ ପ୍ରବଳ ଶୀତ ଅନୁଭୂତ ହେଉଥିଲା ବେଳେ ଦିନ ୧୧ଟା ପର୍ଯ୍ୟନ୍ତ ଘନ କୁହୁଡ଼ିର ଚାଦରରେ ଘୋଡେଇ ହୋଇ ରହୁଛି ନଗଡ଼ା । ନଗଡ଼ା ତୁଳନାରେ ନଗଡା ସନ୍ନିକଟ ତୁମୁଣି, ତଳଡିହ ଓ ଗୁହିଆଶାଳ ଗ୍ରାମବାସୀ ଶୀତରେ ଅଧିକ ମାତ୍ରାରେ ପ୍ରଭାବିତ ହେଉଥିବା ଦେଖାଯାଇଛି। ଲୋକେ ଘରେଘରେ କାଠ ମୁଣ୍ଡିଆ ଜାଳି ନିଆଁ ପୁଉଁଥିବା ଦେଖାଯାଉଛି।
୫ ପାହାଡ଼ମାଳା ସାତକୁଲିଆ, କମ୍ଭାରୁଣି, କମୁଣ୍ଡେଇଥଳ, ଏକୁଲ ଓ ଦେଓଗାଁ ମଧ୍ୟବର୍ତ୍ତୀ ନଗଡ଼ା ଓ ଏହାର ପାରିପାର୍ଶ୍ବିକ ଅଞ୍ଚଳରେ ଏବର୍ଷର ଶୀତ ଯେମିତି ସବୁ ରେକର୍ଡକୁ ଭାଙ୍ଗି ଦେଇଛି । ତଳ, ମଝି ଓ ଉପର ନଗଡ଼ାରେ ୭୫ ଗୋଟି ଜୁଆଙ୍ଗ ପରିବାରକୁ ପ୍ରଧାନମନ୍ତ୍ରୀ ଆବାସ ଯୋଜନାରେ ପକ୍କାଘର ଦିଆଯାଇଥିଲା ବେଳେ ବିଭିନ୍ନ ବିକାଶ ମୂଳକ କାର୍ଯ୍ୟ ହୋଇଛି । ହେଲେ ତୁମୁଣି, ତଳଡିହ ଓ ଗୁହିଆଶାଳ ଗାଁକୁ ଚାରିପଟେ ପାହାଡ଼ ଓ ଘଞ୍ଚ ଜଙ୍ଗଲ ଘେରିରହିଥିଲା ବେଳେ ସ୍ଥାୟୀ ରାସ୍ତା ନାହିଁ। ଏହି ଅଞ୍ଚଳରେ ୭୫ ରୁ ଅଧିକ ଜୁଆଙ୍ଗ ପରିବାର ଝାଟିମାଟି, ଛଣଛପର ଓ ପଲିଥିନ ଢଙ୍କା କୁଡ଼ିଆ ଘରେ ରହୁଛନ୍ତି। ଏମାନଙ୍କୁ ଶୀତ ଅଧିକ ପ୍ରଭାବିତ କରୁଛି ।
