ଚିଲିକା କୂଳର ଆଧ୍ୟାତ୍ମିକ ସ୍ଥଳ ମା’ ଚର୍ଚ୍ଚିକା ମନ୍ଦିର
ଓଡ଼ିଶା ଲିଡ୍ସ(ବ୍ରହ୍ମଗିରୀ): ପ୍ରକୃତିର ଅପୂର୍ବ ଦାନ ଚିଲିକା ହ୍ରଦ। ଏହି ହ୍ରଦର ଚତୁଃପାର୍ଶ୍ୱର ମନୋରମ ଶାନ୍ତ ସ୍ନିଗ୍ଧ ପରିବେଶ ଓ ନୀଳ ଜଳରାଶିର ସନ୍ନିକଟରେ ଅବସ୍ଥିତ କୃଷ୍ଣପ୍ରସାଦ ଅଞ୍ଚଳର ଗୁରୁବାଈ ଗ୍ରାମ । ଏହି ପବିତ୍ର ଭୂମିରେ କାଳ କାଳ ଧରି ବିରାଜମାନ କରିଛନ୍ତି ଜନମାନସର ଆରାଧ୍ୟା ଦେବୀ ମା’ ଚର୍ଚ୍ଚିକା । ଶକ୍ତି ସ୍ୱରୂପିଣୀ ମା’ ଚର୍ଚ୍ଚିକାଙ୍କ ଏହି ପୀଠ କେବଳ ଏକ ମନ୍ଦିର ନୁହେଁ, ବରଂ ଅଞ୍ଚଳବାସୀଙ୍କ ପାଇଁ ଏଳ ଆସ୍ଥା ଓ ବିଶ୍ୱାସର କେନ୍ଦ୍ରସ୍ଥଳ । ପୌରାଣିକ ମାନ୍ୟତା ଓ ଲୋକକଥା ଅନୁଯାୟୀ, ମା’ ଚର୍ଚ୍ଚିକା ହେଉଛନ୍ତି ମା’ ଚଣ୍ଡୀ ବା ଶକ୍ତିଙ୍କର ଏକ ସ୍ୱତନ୍ତ୍ର ସ୍ୱରୂପ। ଏହି ପୀଠରେ ମା’ ଅତ୍ୟନ୍ତ ଜାଗ୍ରତ ବୋଲି ଭକ୍ତମାନେ ଦୃଢ଼ ବିଶ୍ୱାସ ରଖନ୍ତି । କୃଷ୍ଣପ୍ରସାଦ ଓ ଏହାର ଆଖପାଖ ଅଞ୍ଚଳର ଲୋକେ ନିଜର ପ୍ରତ୍ୟେକ ଶୁଭକାର୍ଯ୍ୟର ଶୁଭାରମ୍ଭ ମା’ଙ୍କ ଆଶୀର୍ବାଦ ନେଇ ଆରମ୍ଭ କରିଥାନ୍ତି । ପାରିବାରିକ ମଙ୍ଗଳ, ମାନସିକ ପୂରଣ ଏବଂ ସଙ୍କଟ ସମୟରେ ମା’ଙ୍କ ପାଖରେ ଶରଣ ପଶିଲେ ମନୋବାଞ୍ଛା ପୂରଣ ହୁଏ ବୋଲି ଭକ୍ତମାନଙ୍କ ମଧ୍ୟରେ ଦୃଢ଼ ବିଶ୍ୱାସ ରହିଛି । ପ୍ରାକୃତିକ ସୌନ୍ଦର୍ଯ୍ୟ ଓ ପରିବେଶ ଭିତରେ ଚିଲିକାର ଶାନ୍ତ ଓ ସ୍ନିଗ୍ଧ ବାତାବରଣରେ ମନ୍ଦିରଟି ଅବସ୍ଥିତ ଥିବାରୁ ଏହା ଦେଖିବାକୁ ଅତ୍ୟନ୍ତ ଆକର୍ଷଣୀୟ । ଦୂରଦୂରାନ୍ତରୁ ଆସୁଥିବା ପର୍ଯ୍ୟଟକ ଓ ଭକ୍ତମାନେ ମା’ଙ୍କ ଦର୍ଶନ କରିବା ସହ ଚିଲିକାର ପ୍ରାକୃତିକ ଦୃଶ୍ୟକୁ ଉପଭୋଗ କରିଥାନ୍ତି । ମନ୍ଦିରର ପରିବେଶ ଭକ୍ତଙ୍କୁ ଏକ ଅଲୌକିକ ଆଧ୍ୟାତ୍ମିକ ଶାନ୍ତି ପ୍ରଦାନ କରିଥାଏ । ବର୍ଷସାରା ଏଠାରେ ବିଭିନ୍ନ ପୂଜାପର୍ବ ପାଳିତ ହେଉଥିଲେ ହେଁ, ଦୁର୍ଗାପୂଜା, କାଳୀପୂଜା ଏବଂ ମାଣବସା ଗୁରୁବାର ସମୟରେ ମନ୍ଦିରରେ ଭକ୍ତଙ୍କ ପ୍ରବଳ ସମାଗମ ଦେଖିବାକୁ ମିଳେ । ମା’ଙ୍କ ସମ୍ମୁଖରେ ଦୀପ ଜଳାଇବା ଓ ନୈବେଦ୍ୟ ଅର୍ପଣ କରିବା ପାଇଁ ଭକ୍ତଙ୍କ ଲମ୍ବା ଧାଡ଼ି ଲାଗିଥାଏ । ଏହି ପୀଠର ମହିମା ଦିନକୁ ଦିନ ବୃଦ୍ଧି ପାଉଥିବା ବେଳେ, ପର୍ଯ୍ୟଟନ ଓ ଧାର୍ମିକ ଦୃଷ୍ଟିକୋଣରୁ ଏହାର ବିକାଶ ପାଇଁ ସ୍ଥାନୀୟ ବାସିନ୍ଦାମାନେ ଆଶା ରଖିଛନ୍ତି । ଯଦି ପ୍ରଶାସନ ପକ୍ଷରୁ ଏହି ପୀଠର ଉନ୍ନତିକରଣ ଓ ପର୍ଯ୍ୟଟନ ଭିତ୍ତିଭୂମିର ବିକାଶ କରାଯାଏ, ତେବେ ଏହା ଆଗାମୀ ଦିନରେ ଏକ ପ୍ରମୁଖ ପର୍ଯ୍ୟଟନ କେନ୍ଦ୍ର ଭାବେ ଉଭା ହୋଇ ପାରିବ ବୋଲି ମତ ପ୍ରକାଶ ପାଇଛି ।
