ଓଡ଼ିଶା ଲିଡ୍ସ(ବ୍ୟୁରୋ): ଯାଜପୁର ଜିଲ୍ଲା ସୁକିନ୍ଦା ବ୍ଲକ ନଗଡାର ପାଦ ଦେଶରେ ରହିଛି ପାହାଡ଼ ଘେରା ତୁମୁଣି ଗାଁ । ଏହି ଗାଁରେ ରହୁଛନ୍ତି ଜୁଆଙ୍କ ଜନ ଜାତିର ୨୪ ପରିବାରର ଦେଢ଼ ଶହରୁ ଅଧିକ ସଦସ୍ୟ । ନଗଡ଼ାର ପାଦ ଦେଶ ନାଲିଆଡାଵ ଠାରୁ ବାମ ପଟରେ ପ୍ରାୟ ୪ କିମି ଦୁର୍ଗମ ବିପଦ ପୂର୍ଣ୍ଣ ପାହାଡିଆ ରାସ୍ତାରେ ଚାଲି ଚାଲି ଗଲେ ଚାରି ପଟରୁ ପାହାଡ଼ ଘେରି ରହିଥିବା ତୁମୁଣି ଗାଁ ପଡିବ । ଗ୍ରାମରେ ହାତ ଗଣତି ଦୁଇଟି କି ତିନୋଟି ଟିଣ ଓ ଆଜବେଷ୍ଟସ ଘର ଥିଲା ବେଳେ ଆଉ ସବୁ ଅତ୍ୟନ୍ତ ଦୟନୀୟ ଅବସ୍ଥାରେ ଥିବା ଝାଟି ମାଟି ଘର । ଏହାରି ଭିତରେ ଜୀବନ ବଞ୍ଚୁଛନ୍ତି ଦେଢ଼ ଶହ ଲୋକ ।
ତୁମୁଣିବାସୀ ମୌଳିକ ସୁବିଧାରୁ ବଞ୍ଚିତ । ପ୍ରାୟ ୪ କିମି ବିପଦପୂର୍ଣ୍ଣ ପାଦ ଚଲା ରାସ୍ତାରେ ଆସିଲେ ପହଞ୍ଚିବେ ମୁଖ୍ୟ ରାସ୍ତାରେ । ସେଠାରୁ କାଳିଆପାଣି ଯାଇ ଆବଶ୍ୟକୀୟ ଜିନିଷ ସଂଗ୍ରହ କରିବେ । ପାହାଡ଼ରୁ ବିଭିନ୍ନ ଜିନିଷ ସଂଗ୍ରହ କରି ତାକୁ ବିକ୍ରି କରି ନିଜ ପରିବାର ଚଳାନ୍ତି ତୁମୁଣିବାସୀ ।ନଗଡ଼ା ବିକାଶ ସମୟରେ ଏହି ଗାଁକୁ ସରକାରଙ୍କ ପକ୍ଷରୁ କିଛି ସାହାଯ୍ୟ ମିଳିଥିଲା । ହେଲେ ତାହା ସମୁଦ୍ରକୁ ଶଙ୍ଖେ ଭଳି । ଗ୍ରାମରେ କୁଛି ସୋଲାର ଲାଇଟ ଲାଗିଥିଲା ବେଳେ ତାହା ରାତିର ଅନ୍ଧାର ଦୂର କରୁଛି । ପୂର୍ବରୁ ଏକ ନଳକୂପ ଖୋଳା ଯାଇଥିଲା ବେଳେ ଏବେ ଆଉ ସେଥିରୁ ପାଣି ବାହାରୁ ନାହିଁ । ଗାଁ ଠାରୁ ପାଞ୍ଚ ଶହ ମିଟର ଦୂରରେ ଥିବା ଝରଣା ନିକଟରେ ଚୁଆ ଖୋଳି ସେଠାରୁ ପାଣି ସଂଗ୍ରହ କରନ୍ତି ଗ୍ରାମବାସୀ । ସେଇ ଚୁଆରୁ ବନ୍ୟ ଜନ୍ତୁ ମଧ୍ୟ ପାଣି ପିଉଥିବା କହନ୍ତି ଗ୍ରାମବାସୀ । ପାଣି ଗୋଳିଆ ହେଲେ ସେଠାରୁ ପାଣି ସଂଗ୍ରହ କରିବାକୁ ଅପେକ୍ଷା କରନ୍ତି ଗ୍ରାମବାସୀ । ଗ୍ରାମର ନାବାଳିକା ମାନେ ଧାଡିରେ ଯାଇ ଗରାରେ ପାଣି ମୁଣ୍ଡାଇ ଗାଁକୁ ଆଣନ୍ତି । ଯଦି ଗ୍ରାମରେ ବିବାହ କିମ୍ବା ଶୁଦ୍ଧି କାର୍ଯ୍ୟ ହୁଏ ତେବେ ପୁରୁଷ ମାନେ ଭାର ସାହାଯ୍ୟରେ ପାଣି ଆଣନ୍ତି । ଚାରି କିମି ବିପଦପୂର୍ଣ୍ଣ ରାସ୍ତା ଅତିକ୍ରମ କରି ପିଲାମାନେ ସ୍କୁଲ ଯିବା ମଧ୍ୟ ସମ୍ଭବ ନୁହେଁ ।
ଗାଁର ଯଦି କେହି ରୋଗାକ୍ରାନ୍ତ ହୁଅନ୍ତି ତାଙ୍କୁ ବହୁ କଷ୍ଟରେ ମୁଖ୍ୟ ରାସ୍ତାକୁ ଆଣାଯାଏ । ଏବେ ଗ୍ରାମବାସୀ ନିଜ ଉଦ୍ୟମରେ ସ୍ଥାୟୀ ଗୃହ ନିର୍ମାଣ କରୁଥିବା କହିଛନ୍ତି ଗ୍ରାମବାସୀ । ତାହା ପୁଣି ସମସ୍ତଙ୍କ ପାଇଁ ସମ୍ଭବ ନୁହେଁ । ବର୍ଷା ବାତ୍ୟା ଓ ଅଗ୍ନିକାଣ୍ଡର ଭୟ ଭିତରେ ବଞ୍ଚୁଛନ୍ତି ଏମାନେ । ଅଗ୍ନିକାଣ୍ଡ ହେଲେ ଏହାକୁ ରୋକିବାକୁ ପାଣି ମିଳେନାହିଁ ଏମାନଙ୍କୁ । ପାହାଡ଼ କୋଳରେ ଜୀବନ ବଞ୍ଚୁଥିବା ଏହି ଗ୍ରାମବାସୀ ଯେ ଦୁଃଖର ପାହାଡ଼କୁ ମୁଣ୍ଡାଇ ଚାଲିଛନ୍ତି ତାକୁ ଯେ କେହି ଦେଖିଲେ ଅନୁମାନ କରି ପାରିବ ।
ଏଇଭଳି ଅନେକ ସମସ୍ୟା ଦେଇ ଗ୍ରାମବାସୀ ଗତି କରୁଥିଲା ବେଳେ ସରକାର କେବେ ଦୃଷ୍ଟି ଦେଇ ସେମାନଙ୍କ ମୌଳିକ ସମସ୍ୟାକୁ ସମାଧାନ କରିବେ ତାକୁ ଏହି ଶାନ୍ତ ସରଳ ମଣିଷ ମାନେ ଅପେକ୍ଷା କରିଛନ୍ତି । ସରକାର ପଦକ୍ଷେପ ନେଲେ ଏମାନେ ସମାଜର ମୁଖ୍ୟସ୍ରୋତରେ ସାମିଲ ହୋଇ ପାରିବେ । ଆଉ କୋମଳମତୀ ଛୋଟ ପିଲାମାନେ ଶିକ୍ଷା, ସ୍ୱାସ୍ଥ୍ୟ ସହିତ ଭଲ ଘରେ ରହି ଭବିଷ୍ୟତର ସ୍ୱପ୍ନ ଦେଖି ପାରିବେ ।
